تۈركىيە ئېكسپورتچىلار مەجلىسى (TİM) گىلەمچىلىك ساھەسى كومىتېتىنىڭ رەئىسى ئىسكەندەر قاپلان مۇنداق دېدى: «بىز ھەر كۈنى يېڭى مودا، يېڭى لايىھە تەتقىق قىلىپ تەرەققىي قىلدۇرۇش ۋە يېڭىلىق يارىتىش خىزمەتلىرىنى ئىنتايىن كۈچلۈك ئېلىپ بېرىۋاتىمىز، سېتىش مىقدارىمىزمۇ تېز سۈرئەتتە ئاشماقتا.»
ئانادولۇ ئاگېنتلىقى (AA) مۇخبىرىنىڭ تۈركىيە ئېكسپورتچىلار مەجلىسىنىڭ سانلىق مەلۇماتلىرىدىن توپلىغان ئۇچۇرلىرىغا قارىغاندا، بۇ يىلنىڭ دەسلەپكى تۆت ئېيىدا ئېكسپورت قىلىنغان 172 مىليون 946 مىڭ كۋادرات مېتىر گىلەمدىن 871 مىليون 732 مىڭ دوللار كىرىم قىلىنغان.
ئۆتكەن يىلنىڭ شۇ مەزگىلىگە سېلىشتۇرغاندا، ئېكسپورت قىممىتى جەھەتتىن %2.1، مىقدارى جەھەتتىن بولسا %2 تۆۋەنلىگەن.
ئەڭ كۆپ ئېكسپورت 250 مىليون 298 مىڭ دوللار بىلەن ئامېرىكا قوشما ئىشتاتلىرىغا، 120 مىليون 951 مىڭ دوللار بىلەن سەئۇدى ئەرەبىستانغا ۋە 68 مىليون 400 مىڭ دوللار بىلەن ئەنگلىيەگە قىلىنغان.
بۇ يىلنىڭ ئاخىرىغا بارغاندا ئېكسپورت سوممىسىنى 3 مىليارد 500 مىليون دوللارغا يەتكۈزۈش نىشان قىلىنماقتا
تۈركىيە ئېكسپورتچىلار مەجلىسى گىلەمچىلىك ساھەسى كومىتېتىنىڭ رەئىسى ئىسكەندەر قاپلان، ئانادولۇ ئاگېنتلىقى مۇخبىرىغا بەرگەن باياناتىدا، تۈركىيە ئەڭ كۈچلۈك بولغان ساھەلەرنىڭ ئارىسىدا گىلەمچىلىكنىڭمۇ بارلىقىنى تىلغا ئېلىپ مۇنداق دېدى: «بىز ھەر كۈنى يېڭى مودا، يېڭى لايىھە تەتقىق قىلىپ تەرەققىي قىلدۇرۇش ۋە يېڭىلىق يارىتىش خىزمەتلىرىنى ئىنتايىن كۈچلۈك ئېلىپ بېرىۋاتىمىز، سېتىش مىقدارىمىزمۇ تېز سۈرئەتتە ئاشماقتا. يەر شارى خاراكتېرلىك ئۇرۇشلار سەۋەبىدىن ئەلۋەتتە بەلگىلىك تەسىرلەر بولۇۋاتىدۇ. بولۇپمۇ ئوتتۇرا شەرق بىز ئۈچۈن ئىنتايىن چوڭ بازار بولغاچقا، ئىران ئۇرۇشى بىلەن مۇناسىۋەتلىك تەمىنلەش ۋە ئەشيا ئوبوروتى مەسىلىلىرىدە بەزى قىيىنچىلىقلار كۆرۈلۈۋاتىدۇ. بۇلارنىڭمۇ ۋاقىتنىڭ ئۆتۈشىگە ئەگىشىپ ھەل قىلىنىدىغانلىقىغا ئىشىنىمەن.»
قاپلان بۇ يىل ئېكسپورت نىشانىنى تېخىمۇ چوڭايتقانلىقلىرىنى ئەسكەرتىپ مۇنداق دېدى:
«بىز ئۆتكەن يىلىنى 2 مىليارد 800 مىليون دوللار بىلەن ئاخىرلاشتۇرغان ئىدۇق، بۇ يىلقى نىشانىمىز 3 مىليارد 500 مىليون دوللار ئەتراپىدا بولىدۇ.»
