ئامېرىكا پىرېزىدېنتى  ترامپ جۈمە (2026-يىلى 1-ماي) كۈنى ئاقسارايدا مۇخبىرلارغا: «ئۇلار توغرا كېلىشىمنى تېپىشى كېرەك. مەن ھازىرچە رازى ئەمەس» دېدى.

نېمە ئۈچۈن رازى بولمىغانلىقى سورالغىنىدا، ئۇ: «ئۇلار مەن قوبۇل قىلالمايدىغان نەرسىلەرنى تەلەپ قىلىۋاتىدۇ» دەپ جاۋاب بەردى.

ئۇ يەنە: «ئۇلارنىڭ ھەممىسى كېلىشىم تۈزۈشنى خالايدۇ، ئەمما ھەممىسى قالايمىقانچىلىق ئىچىدە» دەپ سۆزىگە ئىلاۋە قىلدى.

ئۇ سۆھبەتنىڭ پاكىستاننىڭ قاتنىشىشى بىلەن داۋاملىشىۋاتقانلىقىنى تىلغا ئېلىپ، ئىسلامئابادتىكى مەسئۇللارنىڭ ۋاشىنگتون بىلەن ھەمكارلاشقانلىقىنى ماختىدى، بىراق «بۇ مۇساپە ئىنتايىن ئۇزۇن» دەپ ئاگاھلاندۇردى.

ترامپ ئىراننى بومباردىمان قىلىشنى قايتا باشلىماسلىقنى ئەۋزەل كۆرىدىغانلىقىنى بىلدۈردى.

ئۇ: «ئىنسانىيەت نۇقتىسىدىن ئېيتقاندا، بومباردىمان قىلماسلىقنى ياخشى كۆرىمەن. ئەمما، يەنە بىر تاللاش يولى مۇنداق: بىز ئۇ يەرگە شىددەت بىلەن كىرىپ، ھەممىسىنى يوقىتىۋېتەمدۇق ياكى باشقا ئىش قىلامدۇق؟» دېدى.

ئېنېرگىيە باغلىنىشى

ئۇ: «ئۇلار ئىلگىرىلەش ھاسىل قىلدى، ئەمما مەن ئۇلارنىڭ ئۇ نىشانغا يېتەلەيدىغان-يېتەلمەيدىغانلىقىنى جەزم قىلالمايمەن»، دېدى ۋە ئىران رەھبەرلىرى ئارىسىدا «چوڭ ماسلاشماسلىق» بارلىقىنى بىلدۈردى.

ئۇ: «رەھبەرلىك ئىنتايىن پارچىلىنىپ كەتكەن. ئىككى-ئۈچ گۇرۇپپا بار، بەلكىم تۆت بولۇشى مۇمكىن، رەھبەرلىك قاتلىمى تولىمۇ تارقاق. شۇنداق بولۇشىغا قارىماي، ئۇلارنىڭ ھەممىسى بىر كېلىشىم تۈزۈشنى خالايدۇ، لېكىن ھەممىسى قالايمىقانچىلىق ئىچىدە» دېدى .

ئۇ ئۇرۇشنىڭ ئاخىرلىشىشىنىڭ دۇنيا ئېنېرگىيە بازارلىرى بىلەن مۇناسىۋەتلىك ئىكەنلىكىنى تىلغا ئېلىپ، ھازىر ھورمۇز بوغۇزى ئەتراپىدا قاپسېلىپ قالغان نېفىت پاراخوتلىرىنىڭ پات يېقىندا يولغا چىقىدىغانلىقىنى ئېيتتى.

ئۇ: «ئۇرۇش ئاخىرلاشقاندا، بېنزىن باھاسى ئىلگىرىكى سەۋىيەدىنمۇ تۆۋەنلەيدۇ» دېدى.

ئامېرىكا بىلەن ئىسرائىلىيە 28-فېۋرال (2026) ئىرانغا ھۇجۇم قىلغان بولۇپ، بۇ تېھراننىڭ ئىسرائىلىيەگە ۋە ئامېرىكا بازىلىرى جايلاشقان پارس قولتۇقى دۆلەتلىرىگە قارىتا ئۆچ ئېلىش ھەرىكىتى ئېلىپ بېرىشىنى ھەمدە ھورمۇز بوغۇزىنىڭ تاقىلىپ قېلىشىنى كەلتۈرۈپ چىقارغان ئىدى.

پاكىستاننىڭ مۇرەسسە قىلىشى بىلەن 8-ئاپرېل  ئىككى ھەپتىلىك ئوق چىقىرىشنى توختىتىش ئېلان قىلىنغان. ئۇنىڭدىن كېيىن 11-ئاپرېل ئىسلامئابادتا بىۋاسىتە سۆھبەت ئۆتكۈزۈلگەن، ئەمما ئۇزۇن مۇددەتلىك ئۇرۇش توختىتىش مەسىلىسىدە كېلىشىم ھاسىل قىلىنالمىغان ئىدى.

ئامېرىكا پىرېزىدېنتى دونالد ترامپ پاكىستاننىڭ تەلىپىگە بىنائەن، كېيىنچە ئۇرۇش توختىتىش مۇددىتىنى يېڭى ۋاقىت بېكىتمەي تۇرۇپ ئۇزارتقان ئىدى.