ترامپ «Truth Social» دىكى يازمىسىدا، رۇسىيە بىلەن ئۇكرائىنا ئوتتۇرىسىدىكى تىنچلىق سۆھبەتلىرىنى داۋاملاشتۇرۇۋاتقانلىقىنى بىلدۈردى. ئۇ رۇسىيەنى مۇزاكىرە ئۈستىلىدىن «ئەخمەقلەرچە» يىراقلاشتۇرىدىغان ھېچقانداق ئىش قىلىشنى خالىمايدىغانلىقىنى ئېيتتى.
ترامپ تۇتقۇنلار مەسىلىسىگە دائىر نۆۋەتتىكى سۆھبەتلەرنىمۇ ئۆز ئىچىگە ئالغان مۇزاكىرىلەردە زور ئىلگىرىلەش بولغانلىقىنى ئىلگىرى سۈرۈپ، تىنچلىق ھۆججىتىنى «خالىغان ۋاقىتتا ئىمزالىيالايدىغانلىقى»نى بىلدۈردى. ئۇنىڭ ئېيتىشىچە، رۇسىيە ئىرانغا ناھايىتى ئاز ياردەم قىلغان، ھەتتا ياردەم قىلمىغان بولۇشىمۇ مۇمكىن. ترامپ: «مەن بۇ ھالەتنىڭ ساقلىنىشىنى خالايمەن؛ ئەخمەق كىشىلەر ئارىغا كىرمىسە، شۇنداق بولىدۇ» دېدى.
ترامپ زېلېنىسكىينىڭ رۇسىيەدىكى دىزېل يېقىلغۇسىنى ئايرىش زاۋۇتلىرىغا ھۇجۇم قىلىش ئارقىلىق ئامېرىكانىمۇ ئۆز ئىچىگە ئالغان دۇنيا دىزېل بازىرىغا ئېغىر زىيان يەتكۈزۈۋاتقانلىقىنى بىلىدىغانلىقىنى ئىلگىرى سۈردى. ئۇ بۇ ھۇجۇملارنىڭ دېھقانلار ۋە باشقا كارخانىلارغا زور زىيان سالغانلىقىنى، شۇنىڭ بىلەن بىرگە رۇسىيەنىڭ دۇنياغا يەنىلا مىليونلىغان ۋارىل دىزېل يېقىلغۇسىنى ئەرزان باھادا ئەۋەتىۋاتقانلىقىنى ئېيتتى.
ترامپ: «زېلېنىسكىي بۇنىڭغا پەرۋا قىلمايدۇ. ئوچۇقىنى ئېيتقاندا، ياۋروپا ۋە ئالدامچى جو بايدىن ئىلگىرى ئۇنىڭغا شۇنچە كۆپ پۇل بەرگەن بولسىمۇ، ئۇ بۇ ئۇرۇشنى ئاخىرلاشتۇرۇشنى خالىمايدۇ، بەلكىم ئەزەلدىن خالىمىغان بولۇشى مۇمكىن. ئىككى يىل بۇرۇن ھازىرقىدىن ياخشىراق كېلىشىم تۈزەلەيتتى» دېدى.
ئۇ زېلېنىسكىينىڭ دۆلىتىنىڭ ئېغىر ئەھۋالدا ئىكەنلىكىنى، زېمىنىنىڭ زور بىر قىسمىنى يوقىتىپ قويغانلىقىنى، ئەرلەرنىڭ يېرىمىنىڭ يارىلانغان ياكى ئۆلگەن ھالەتتە ئىكەنلىكىنى تىلغا ئېلىپ، 2022-يىلى فېۋرالدىن بۇيان داۋاملىشىۋاتقان ئۇرۇشنىڭ ئاخىرلىشىشىنى خالايدىغانلىقىنى بىلدۈردى.
