ئىسرائىلىيەنىڭ «ھائارېتز» (Haaretz) گېزىتى پەيشەنبە كۈنى لىۋاننىڭ جەنۇبىدىكى بىر زاپاس ئەسكەر تەرىپىدىن ئەۋەتىلگەنلىكى بىلدۈرۈلگەن بىر ئۇچۇرنى تاپشۇرۇۋالغانلىقىنى؛ ئۇچۇردا ئەسكەرلەرنىڭ بىر خىزمەتدىشىنىڭ ئالتۇن پارچىلىرىنى ئوغرىلىغانلىقىغا شاھىت بولغانلىقىنى خەۋەر قىلدى. مەزكۇر خەۋەر، گېزىتنىڭ رايوندىكى ئۆي ۋە خىزمەت ئورۇنلىرىنى بۇلاڭ-تالاڭ قىلغان ئەسكەرلەر ھەققىدە بىرنەچچە خەۋەر ئېلان قىلىشىدىن كېيىن ئوتتۇرىغا چىقتى.

گېزىتنىڭ خەۋىرىگە قارىغاندا، ئارمىيە بۇلاڭ-تالاڭ ۋەقەلىرى بىلەن مۇناسىۋەتلىك بىر تەكشۈرۈش باشلىغان بولسىمۇ، ئەمما بۇ ئالاھىدە ۋەقەدىن خەۋەرسىز ئىكەن.

مال – مۈلۈك بۇلاڭ-تالاڭ قىلىش ئىسرائىلىيە ئارمىيەسى ئىچىدە يېڭى بىر ئەھۋالمۇ ئەمەس. ئىسرائىلىيە تاراتقۇلىرىنىڭ نۇرغۇنلىغان خەۋەرلىرىدە، ئىسرائىلىيەنىڭ غەززەدىكى ئىرقىي قىرغىنچىلىقى جەريانىدىمۇ كەڭ كۆلەملىك ئوغرىلىق ۋەقەلىرىنىڭ يۈز بەرگەنلىكى ھۆججەتلەشتۈرۈلگەن ئىدى.

«ھائارېتز» گېزىتىنىڭ خەۋىرىگە ئاساسلانغاندا، ئىسرائىلىيەلىك ئەسكەرلەر يەنە، خىزمەتداشلىرىنىڭ لىۋاننىڭ جەنۇبىدىكى ئۆي ۋە سودا ئورۇنلىرىدىن ناھايىتى كۆپ مىقداردا پۇقرالارنىڭ بۇيۇملىرىنى بۇلاڭ-تالاڭ قىلغانلىقىنى، قوماندانلىرىنىڭ بولسا بۇنىڭدىن خەۋەردار ئىكەنلىكىنى ئاشكارىلىغان.

ئىسرائىلىيە ئارمىيەسى «سېرىق لىنىيە» دەپ ئاتىغان چېگرا ئىچىدىكى لىۋاننىڭ جەنۇبىغا جايلاشقان 55 يېزىنىڭ تولۇق كونتروللۇقىنى قولغا كىرگۈزگەنلىكىنى، يۇرتىدىن ئايرىلغان ئاھالىلەرنىڭ قايتىپ كېلىشىنى چەكلىگەنلىكىنى ۋە رايونغا يېقىنلاشقان ھەرقانداق كىشىنى ھۇجۇم نىشانى قىلىدىغانلىقىنى جاكارلىغان ئىدى.

گېزىت خەۋىرىدە: «خەۋەرلەرگە قارىغاندا، موتوسىكلىت، تېلېۋىزور، رەسىم، دىۋان ۋە گىلەم ئوغرىلىقلىرى كەڭ كۆلەمدە يۈز بەرمەكتە ۋە بۇ بىر خىل ئادەتكە ئايلىنىپ قالماقتا. مەيلى يۇقىرى دەرىجىلىك بولسۇن ياكى تۆۋەن دەرىجىلىك بولسۇن، قوماندانلارنىڭ بۇ ئەھۋالدىن خەۋىرى بار، ئەمما بۇنىڭ ئالدىنى ئېلىش ئۈچۈن ھېچقانداق ئىنتىزام جازاسى قوللانمىغان» دەپ يازدى. گېزىت يەنە، بۇ ئەھۋالنىڭ زاپاس ئەسكەرلەر ئارىسىدا تېخىمۇ كۆپ ئىكەنلىكىنى ئەسكەرتتى.

«ھائارېتز» گېزىتىنىڭ ئىلگىرىكى خەۋىرىگە جاۋابەن، ئىسرائىلىيە باش ئىشتاب باشلىقى ئەيال زامىر لىۋاننىڭ جەنۇبىدىكى بۇلاڭ-تالاڭ ۋەقەلىرى بىلەن مۇناسىۋەتلىك ھەربىي ساقچى تەكشۈرۈشى باشلاشقا بۇيرۇق بەردى. گېزىت يەنە: «ئۇ يەنە چېگرا بويىدىكى بارلىق كىرىش-چىقىش نۇقتىلىرىغا ھەربىي ساقچى كۈچلىرىنى كۆپەيتىشكە بۇيرۇق بەردى ۋە توقۇنۇش رايونىغا كىرگەن ۋە چىققان ھەر بىر ئاپتوموبىلنى ئەتراپلىق تەكشۈرۈشنى تەلەپ قىلدى» دەپ يازدى.

ئىسرائىلىيە ئارمىيەسى 2-مارتتىن بۇيان لىۋان مىقياسىدا ئېلىپ بارغان ھۇجۇملىرىدا 2475 تىن ئارتۇق كىشىنى ئۆلتۈردى، تەخمىنەن 7700 كىشىنى يارىلاندۇردى ۋە 1 مىليون 600 مىڭدىن ئارتۇق كىشىنى ئۆي-ماكانلىرىدىن ئايرىدى.

ئامېرىكا پىرېزىدېنتى دونالد ترامپ پەيشەنبە كۈنى ئاقسارايدا ئۆتكۈزۈلگەن باش ئەلچى دەرىجىلىك سۆھبەتلەردىن كېيىن، ئىسرائىلىيە بىلەن لىۋان ئوتتۇرىسىدىكى ئۇرۇش توختىتىش كېلىشىمىنىڭ مۇددىتىنىڭ يەنە ئۈچ ھەپتە ئۇزارتىلغانلىقىنى ئۇقتۇرغان ئىدى. 16-ئاپرېل باشلانغان ۋە ئەسلىدە ئامېرىكا مۇرەسسەچىلىك قىلغان 10 كۈنلۈك ئۇرۇش توختىتىش كېلىشىمى، ۋاشىنگتوندا لىۋان ۋە ئىسرائىلىيە ھۆكۈمەتلىرى ئوتتۇرىسىدا ئېلىپ بېرىلغان سۆھبەتلەردىن كېيىن ھاسىل قىلىنغان ئىدى.