يېقىنقى ھەپتىلەردە بېيجىڭ بىلەن ۋاشىنگتون ئوتتۇرىسىدىكى جىددىيچىلىك، بېيجىڭنىڭ كەم ئۇچرايدىغان مېتاللار ساھەسىدىكى ئېكسپورتىغا كەڭ كۆلەملىك چەكلىمىلەرنى يولغا قويۇشىدىن كېيىن يۇقىرى پەللىگە چىقتى.

ئىقتىسادىي ماگناتلار ئوتتۇرىسىدىكى سودا ئۇرۇشى داۋاملىشىۋاتقان بىر پەيتتە، خىتاي ئامېرىكا قوشما ئىشتاتلىرىنى «باراۋەر تۇرۇپ دىيالوگ» ئۆتكۈزۈشكە چاقىرىق قىلدى. بۇ چاقىرىق، ئالما شىركىتىنىڭ باش ئىجرائىيە ئەمەلدارى تىم كۇكنىڭ بېيجىڭ زىيارىتى جەريانىدا ئېلان قىلىندى.

ئۆتكەن ھەپتە بېيجىڭ كەم ئۇچرايدىغان مېتاللار ئېكسپورتىنى كەڭ كۆلەمدە كونترول قىلىش تەدبىرلىرىنى ئېلان قىلغانىدى. بۇنىڭغا قارىتا ئامېرىكا پىرېزىدېنتى دونالد ترامپ 1-نويابىردىن باشلاپ خىتايغا %100 لىك تاموژنا بېجى يۈرگۈزىدىغانلىقىنى جاكارلىدى. بىراق، خىتاي دۆلەت رەئىسى شى جىنپىڭ بىلەن ئۆتكۈزۈلمەكچى بولغان بىر قېتىملىق ئۇچرىشىش، بۇ جىددىيچىلىكنى پەسەيتىش ئۈچۈن بىر پۇرسەت يارىتىپ بېرىشى مۇمكىن.

ئالما شىركىتىنىڭ مۇھىم بازىرى ۋە ئىشلەپچىقىرىش مەركىزى بولغان خىتاينى دائىم زىيارەت قىلىپ تۇرىدىغان كۇك پەيشەنبە كۈنى خىتاي سودا مىنىستىرى ۋاڭ ۋېنتاۋ بىلەن كۆرۈشتى. رەسمىي باياناتقا ئاساسلانغاندا، ۋاڭ سۆھبەت جەريانىدا بېيجىڭ بىلەن ۋاشىنگتوننىڭ «باراۋەر دىيالوگ ۋە كېڭىشىش ئارقىلىق مەسىلىلەرنى ھەل قىلىش چارىسى ئۈستىدە ئىزدىنىشى» كېرەكلىكىنى تەكىتلىگەن.

ۋاڭ يەنە، ئالما شىركىتىنىڭ خىتايدىكى «كۈنسېرى ئېشىۋاتقان مەبلەغ سېلىشى»نى قارشى ئالىدىغانلىقىنى بىلدۈردى. سودا مىنىستىرلىقىنىڭ باياناتىغا ئاساسلانغاندا، كۇك خىتاي بىلەن ئامېرىكا ئوتتۇرىسىدىكى ياخشى ئىقتىسادىي ئالاقىلەرنىڭ «زور ئەھمىيەتكە ئىگە ئىكەنلىكى»نى ئىپادىلىگەن.

ئالما شىركىتىنىڭ باش ئىجرائىيە ئەمەلدارى يەنە، خىتاينىڭ سودا ئىشلىرى بويىچە باش ۋەكىلى بولغان مۇئاۋىن باش مىنىستىر خې لىفېڭ بىلەنمۇ ئۇچراشتى. شىنخۇا ئاگېنتلىقىنىڭ خەۋىرىگە قارىغاندا، كۇك چىڭخۇا ئۇنىۋېرسىتېتى ئىقتىساد ۋە باشقۇرۇش ئىنىستىتۇتى مەسلىھەتچىلەر ھەيئىتىدە قىلغان سۆزىدە، خىتاينىڭ «دۇنيادىكى ھەرقايسى دۆلەتلەر بىلەن ئۆزئارا مەنپەئەت يەتكۈزىدىغان ھەمكارلىقنى چوڭقۇرلاشتۇرۇشقا ھازىر ئىكەنلىكى»نى ئېيتقان.

«بىلەكستون» شىركىتىنىڭ باش ئىجرائىيە ئەمەلدارى ستېفىن ئا. شۋارزمانمۇ شۇ مەزگىلدە بېيجىڭدا بولۇپ، تاشقى ئىشلار مىنىستىرى ۋاڭ يى بىلەن كۆرۈشتى. رەسمىي باياناتقا ئاساسلانغاندا، ۋاڭ يى شۋارزمانغا: «خىتاي-ئامېرىكا ئالاقىلىرى بۈگۈنكى كۈندە دۇنيادىكى ئەڭ مۇھىم ئىككى تەرەپلىك مۇناسىۋەت ھېسابلىنىدۇ» دېگەن.

ئۇ سۆزىنى داۋاملاشتۇرۇپ: «ئالاقىنى ئۈزۈش ۋە ئايرىلىپ كېتىش رېئاللىققىمۇ، ئەقىلگىمۇ ئۇيغۇن بولمىغان بىر تاللاشتۇر. توقۇنۇش ھەر ئىككى تەرەپكە زىيان ئېلىپ كېلىدۇ» دېگەن. باياناتقا ئاساسلانغاندا، شۋارزمان ئىككى تەرەپنىڭ «ئۆزئارا چۈشىنىشمەسلىكلەرنى تۈگىتىشى»نى ئۈمىد قىلىدىغانلىقىنى بىلدۈرگەن.