پاكىستان ئارمىيەسى ئۇچۇر-ئالاقە بۆلۈمىنىڭ بايان قىلىشىچە، سەيشەنبە كۈنى خەۋپسىزلىك كۈچلىرى بىلەن قانۇن ئىجرا قىلىش ئورگانلىرى غەربىي شىمالدا بىرلەشمە ھەربىي ھەرىكەت ئېلىپ بارغان. بۇ جەرياندا شىددەتلىك توقۇنۇش يۈز بېرىپ، تېررورلۇق تەشكىلاتى ئەزالىرى يوقىتىلغان. ئافغانىستان چېگراسىغا يېقىن خەيبەر رايونىدا يۈز بەرگەن مەزكۇر توقۇنۇشتا، 10 ياشلىق بىر بالا ئوق تېگىپ قازا قىلغان.
باش مىنىستىر شاھباز شەرىف باش مىنىستىرلىق مەھكىمىسى ئارقىلىق ئېلان قىلغان باياناتىدا، تېررورچىلارنىڭ سەۋەبسىز ئوق چىقىرىشى بىلەن 10 ياشلىق بىر بالىنىڭ شېھىت بولغانلىقىدىن قاتتىق ئەپسۇسلىنىدىغانلىقىنى بىلدۈردى.
يېقىنقى يىللاردىن بۇيان، بولۇپمۇ ئافغانىستان بىلەن چېگراداش بولغان ئۆلكىلەردە تېررورلۇق ھۇجۇملىرى كۆرۈنەرلىك كۆپەيدى. بۇ ھۇجۇملارنىڭ كۆپىنچىسىنى پاكىستان تالىبانلىرى (ت پ گ) تېررورلۇق تەشكىلاتى ئۆز ئۈستىگە ئالماقتا.
پاكىستان ھۆكۈمىتى 2021-يىلى ئافغانىستان تالىبانلىرى ھۆكۈمەت بېشىغا چىققاندىن بېرى، كابۇلنى تېررورچىلارنى پاناھ جاي بىلەن تەمىنلەش بىلەن ئەيىبلەپ كەلمەكتە؛ كابۇل دائىرىلىرى بولسا، بۇ ئەيىبلەشلەرنى قايتا-قايتا رەت قىلدى. بۇ خىل جىددىيچىلىكلەر ئىككى قوشنا دۆلەت ئوتتۇرىسىدىكى ئالاقىلەرگە زىيان يەتكۈزۈش بىلەن بىرگە، چېگرادا پات-پات قوراللىق سۈركىلىشلەرنىڭ كېلىپ چىقىشىغا سەۋەب بولماقتا.
پاكىستان ئارمىيەسى بۇ يىل بىر قاتار قانلىق بومبا ھۇجۇملىرىدىن كېيىن، ئافغانىستان تەۋەلىكىدە كەڭ كۆلەملىك زەربە بېرىش ھەرىكىتىنى باشلىغان بولۇپ، پاكىستان مۇداپىئە مىنىستىرى بۇ ۋەزىيەتنى «ئاشكارا ئۇرۇش» دەپ تەسۋىرلىگەن ئىدى.
