قازاقىستان پىرېزىدېنتى قاسىم جۆمەرت توقايېۋ تۈرك دۆلەتلىرى تەشكىلاتىغا ئەزا دۆلەتلەرنىڭ ئالىي سوت ئورگانلىرىنىڭ رەئىسلىرىنى ئاقوردا پىرېزىدېنت سارىيىدا قوبۇل قىلدى. ئۇچرىشىشقا تۈركىيە ئالىي سوت مەھكىمىسىنىڭ رەئىسى ئۆمەر كەركەز ۋە دۆلەت شۇرا مەھكىمىسىنىڭ رەئىسى زەكى يىگىت، ئەزەربەيجان ئالىي سوت مەھكىمىسىنىڭ رەئىسى ئىنام كېرىموۋ، قىرغىزىستان ئالىي سوت مەھكىمىسىنىڭ رەئىسى مەدېربېك ساتىيېۋ ۋە ئۆزبېكىستان ئالىي سوت مەھكىمىسىنىڭ بىرىنچى مۇئاۋىن رەئىسى ئەلىشەر ئوسمانوۋ قاتناشتى.
تۈرك دۆلەتلىرى تەشكىلاتى ئالىي سوت مەھكىمىلىرىنىڭ ئىككىنچى قېتىملىق يىغىنى دائىرىسىدە ئۆتكۈزۈلگەن قوبۇل قىلىشتا، توقايېۋ تۈرك دۆلەتلىرى تەشكىلاتىنىڭ تۈرك دۆلەتلىرى ئوتتۇرىسىدىكى ھەمكارلىقنى تەرەققىي قىلدۇرۇشتا مۇھىم رول ئويناۋاتقانلىقىنى تەكىتلىدى. ئەزا دۆلەتلەر ئوتتۇرىسىدا بولۇپمۇ ئەدلىيە ۋە دۆلەت خەۋپسىزلىكى كۈچلىرى ساھەسىدىكى ھەمكارلىقنىڭ بارغانسېرى كۈچىيىۋاتقانلىقىنى تىلغا ئالغان توقايېۋ، تۈركىستان شەھىرىدە ئۆتكۈزۈلىدىغان يىغىننىڭ بۇنىڭ تىپىك ئىپادىسى ئىكەنلىكىنى ئېيتتى.
ئەدلىيە سىستېمىسىنىڭ دۆلەتلەرنىڭ تەرەققىياتى ۋە پاراۋانلىقى جەھەتتىن ئىستراتېگىيەلىك ئەھمىيەتكە ئىگە ئىكەنلىكىنى بىلدۈرگەن توقايېۋ، ئالىي سوت مەھكىمىلىرى ئوتتۇرىسىدىكى مۇناسىۋەتلەرنىڭ چوڭقۇرلىشىشىنىڭ قېرىنداش خەلقلەرنىڭ ئورتاق مەنپەئەتىگە خىزمەت قىلىدىغانلىقىنى قەيت قىلدى. رەقەملىك ئۆزگىرىش جەريانى توغرىلىقمۇ توختىلىپ، دۆلەتلەرنىڭ بۇ ساھەدە ئورتاق ھەرىكەت قىلىشى كېرەكلىكىنى تەكىتلىدى.
يىغىندا ئەدلىيەنى رەقەملەشتۈرۈش، مەبلەغ سالغۇچىلارنىڭ ھوقۇقىنى قوغداش ۋە نۆۋەتتىكى قانۇنىي مەسىلىلەرنىڭ مۇزاكىرە قىلىنىدىغانلىقىنى ئەسكەرتكەن توقايېۋ، ئۆزئارا پىكىر ئالماشتۇرۇشنىڭ تۈرك دۆلەتلىرى تەشكىلاتىنىڭ تەرەققىياتىغا ۋە خەلقئارالىق ئابرويىنىڭ يۇقىرى كۆتۈرۈلۈشىگە تۆھپە قوشىدىغانلىقىنى بىلدۈردى. قازاقىستاننىڭ تۈرك دۆلەتلىرى تەشكىلاتى دائىرىسىدىكى ئىجادىي تەشەببۇسلارنى داۋاملىق قوللايدىغانلىقىنىمۇ تىلغا ئالدى.
يەنە بىر تەرەپتىن، قازاقىستان ئالىي سوت مەھكىمىسىنىڭ رەئىسى ئاسلانبېك مەرگالىيېۋ تۈركىيە ئالىي سوت مەھكىمىسىنىڭ رەئىسى ئۆمەر كەركەز ۋە دۆلەت شۇرا مەھكىمىسىنىڭ رەئىسى زەكى يىگىت بىلەن ئايرىم-ئايرىم سۆھبەت ئۆتكۈزدى. كەركەز تۈرك دۆلەتلىرى تەشكىلاتى ئالىي سوت مەھكىمىلىرى بىرلىكىنىڭ ئۇلىنىڭ 2023-يىلى شۇشادا سېلىنغانلىقىنى، بىرلىكنىڭ 2024-يىلى ئانتاليادا رەسمىي سالاھىيەتكە ئېرىشكەنلىكىنى ئەسلىتىپ ئۆتتى. يىگىت بولسا بۇ قېتىملىق يىغىننىڭ تۈرك دۆلەتلىرى ئوتتۇرىسىدىكى تارىخىي ۋە مەدەنىيەت رىشتىسىنى كۈچەيتىشكە مۇھىم تۆھپىلەرنى قوشىدىغانلىقىنى بىلدۈردى.
