ئۆزبېكىستان پىرېزىدېنتى شەۋكەت مىرزىيايېۋ يىلنىڭ ئالدىنقى يېرىمىغا ئائىت ئىقتىسادىي نەتىجىلەر ۋە يىل ئاخىرىغىچە ئەمەلگە ئاشۇرۇلىدىغان نىشانلار مۇھاكىمە قىلىنغان يىغىندا سۆز قىلىپ، دۆلەت ئىقتىسادىنىڭ بۇ يىلنىڭ يانۋار-ئىيۇن مەزگىلىدە ئۆتكەن يىلنىڭ ئوخشاش مەزگىلىگە سېلىشتۇرغاندا %8.5 ئاشقانلىقىنى بىلدۈردى.
يىلنىڭ ئالدىنقى يېرىمىدا يېزا ئىگىلىك ساھەسىنىڭ %4.7، سانائەت ئىشلەپچىقىرىشىنىڭ %8، قۇرۇلۇش ساھەسىنىڭ %13.8 ۋە مۇلازىمەت ساھەسىنىڭ %16.9 ئاشقانلىقىنى قەيت قىلغان مىرزىيايېۋ، بۇ مەزگىلدە دۆلەتتىكى مەبلەغ سېلىش كۆلىمىنىڭ 28 مىليارد دوللارغا، ئېكسپورتنىڭ بولسا 14.4 مىليارد دوللارغا يەتكەنلىكىنى تىلغا ئالدى.
تەخمىنەن 40 مىليونلۇق نوپۇسنىڭ تۇرمۇش سەۋىيەسىنى كۆرۈنەرلىك دەرىجىدە يۇقىرى كۆتۈرۈش ئۈچۈن يىللىق ئىقتىسادىي ئېشىش نىسبىتىنى %9 تىن %10 كىچە بولغان سەۋىيەگە كۆتۈرۈش كېرەكلىكىنى تەكىتلىگەن مىرزىيايېۋ، بۇ دائىرىدە رايون ۋە ساھە مەسئۇللىرىنىڭ قولىدىكى بارلىق ئىمكانىيەتلەردىن ئەڭ يۇقىرى سەۋىيەدە ئۈنۈملۈك پايدىلىنىشى لازىملىقىنى ئالاھىدە ئەسكەرتىپ ئۆتتى.
ئۇ دۇنياۋى ئىقتىسادتىكى ئېنىقسىزلىقلارنىڭ داۋاملىشىۋاتقانلىقىغا ئىشارەت قىلىپ، بارلىق مىنىستىرلىقلار ۋە يەرلىك ھۆكۈمەتلەرنىڭ يۈز بېرىش ئېھتىمالى بولغان خەۋپ-خەتەرلەرگە قارشى ئالتېرناتىپ (زاپاس) لايىھەلەرنى تەييارلىشى كېرەكلىكىنى بىلدۈردى.
پىرېزىدېنت مىرزىيايېۋ شۇنداقلا دۇنياۋى ئىقتىسادىي تەۋرىنىشلەرنىڭ تەسىرىنى ئازايتىش مەقسىتىدە رايونلاردا ئىگىلىك تىكلەش ۋە ئىجتىمائىي ئۇل ئەسلىھەلەرنى تەرەققىي قىلدۇرۇش ئۈچۈن تېخىمۇ كۆپ مالىيە مەبلىغى ئاجرىتىلغانلىقىنىمۇ سۆزلىرىگە ئىلاۋە قىلدى.
ئۆزبېكىستان ئىقتىساد ۋە مالىيە مىنىستىرلىقى بۇنىڭدىن ئىلگىرى 2026-يىللىق ئېشىش مۆلچەرىنى %6.6 تىن %8.1 گە كۆتۈرگەن ئىدى.
«كوۋىد-19» يۇقۇمىدىن (2020-يىلىدىن 2022-يىلىغىچە) ئىلگىرى يىللىق ئېشىش نىسبىتى %5 تىن %6 كىچە بولغان ئۆزبېكىستان ئىقتىسادى 2020-يىلى %1.6، 2021-يىلى %7، 2022-يىلى %5.7 ۋە 2023-يىلى %6، 2024-يىلى %6.7، 2025-يىلى بولسا، %7.7 ئېشىشنى قولغا كەلتۈرگەنىدى.
