خىربەت ئەلتۇبا رايونىدا بىر قانچە پەلەستىنلىكنىڭ ئۆيى كۆيۈپ زىيانغا ئۇچرىدى ۋە 6 كىشى يارىلاندى. ئىسرائىلىيە كۈچلىرى يەنە ئۆيلەرگە بېسىپ كىرىش ھەرىكىتى ئېلىپ باردى.
قانۇنسىز ئىسرائىلىيەلىك كۆچمەنلەر چارشەنبە كۈنى خېبروننىڭ جەنۇبىدىكى مەسافەر ياتتا رايونىغا قاراشلىق خىربەت ئەلتۇبا يېزىسىغا ھۇجۇم قىلىپ، بىر قانچە پەلەستىنلىكنىڭ ئۆيىگە ئوت قويۇپ بەردى ھەمدە 6 كىشىنىڭ يارىلىنىشىغا سەۋەب بولدى. ئىسرائىلىيە قىسىملىرى بولسا، ئىشغالىيەت ئاستىدىكى غەربىي قىرغاقتا پاراكەندىچىلىك پەيدا قىلىشتىن سىرت ئۆيلەرگە بېسىپ كىرىش ھەرىكەتلىرىنى كۈچەيتتى.
پەلەستىن قىزىل ئاي جەمئىيىتى ھۇجۇمدا يارىلانغان 3 ئايالنى قوشقاندا جەمئىي 6 يارىدارغا جىددىي تىببىي مۇداخىلە قىلغاندىن كېيىن دوختۇرخانىغا يۆتكىگەنلىكىنى بىلدۈردى.
پەلەستىن رەسمىي ئاگېنتلىقى «ۋافا» نىڭ خەۋەر قىلىشىچە، قوراللىق كۆچمەنلەر بىر قانچە ئۆينى كۆيدۈرۈپ ۋەيران قىلغان، ئاياللار ۋە بالىلار ئىس-تۈتەكتىن زەھەرلىنىشكە ئۇچرىغان.
يەرلىك مەنبەلەرنىڭ ئېيتىشىچە، ئىسرائىلىيە قوشۇنلىرى بەيتىلەھەمنىڭ جەنۇبىدىكى بەيت فاججار بىلەن راماللاھنىڭ شەرقىدىكى كەفر مالىك ۋە دەير جەرىر قاتارلىق بىر قانچە رايونلاردا بېسىپ كىرىش مەشغۇلاتى ئېلىپ بارغان.
ئەل بىرە شەھىرىدە ئەسكەرلەر 3 ئۆينىڭ ئاھالىسىنى مەجبۇرىي ئۆيدىن قوغلاپ چىقارغان ۋا تارتىۋېلىغان يەرلەرنى ھەربىي قاراۋۇلخانىغا ئايلاندۇرۇۋالغان. ئەسكەرلەر يەنە يېقىن ئەتراپتىكى ئۇم ئەل شارايەت مەھەللىسىگە ئورۇنلىشىپ، ئاساسلىق يوللارنى توسۇۋالغان ۋە پەلەستىنلىكلەرنىڭ ھەرىكىتىنى چەكلىگەن.
باشقا يەرلەردە بولسا، ئىسرائىلىيەلىك كۆچمەنلەر چارۋا-ماللىرى بىلەن ئەل مۇغاييىر يېزىسىنىڭ غەربىدىكى شەئاب ئەللۇز رايونىغا بېسىپ كىرىپ، پەلەستىنلىكلەرنىڭ يەر-زېمىنلىرى ۋە مۈلكىگە قارىتىلغان ھۇجۇمىنى داۋاملاشتۇرغان.
ئىسرائىلىيە كۈچلىرى ئىشغالىيەت ئاستىدىكى شەرقىي قۇددۇسنىڭ شىمالىدا كەفر ئاقاب ۋە كالاندىيا مۇئەييەن پاناھلانغۇچىلار لاگېرىدا كەڭ كۆلەملىك تۇتقۇن قىلىش ھەرىكىتىنى داۋاملاشتۇردى. كالان دىيا تاراتقۇ مەركىزى ئەسكەرلەرنىڭ ئونلارچە ئۆيگە بېسىپ كىرىپ، بىر ئايالنى قوشقاندا جەمئىي 15 كە يېقىن پەلەستىنلىكنى تۇتقۇن قىلغانلىقىنى خەۋەر قىلدى.
پەلەستىن قىزىل ئاي جەمئىيىتى چارشەنبە كۈنىد ئىلگىرى ئېلان قىلغان باياناتىدا، كالان دىيادا ئېلىپ بېرىلغان بېسىپ كىرىشتە ئىسرائىلىيە ئەسكەرلىرىنىڭ تاياق توقمىدىا يارىلانغان 8 پەلەستىنلىككە تىببىي ياردەم قىلغانلىقىنى، يارىدارلار ۋە بىمارلارغا سەھىيە خادىملىرىنىڭ يېتىپ بارىشىغا ئىسرائىلىيە ئەسكەرلىرىنىڭ توسقۇنلۇق قىلغانلىقىنى شۇنداقتىمۇ پاناھلانغۇچىلار لاگېرىدىن 5 بىمارنى يۆتكەپ چىقالىغانلىقىنى ئېيتتى.
پەلەستىن رەسمىي مەنبەلىرىنىڭ ئاشكارىلىشىچە، 2023-يىلى ئۆكتەبىردە ئىسرائىلىيەنىڭ غەززەگە قىلغان ئىرقىي قىرغىنچىلىق خاراكتېرلىق ھۇجۇملىرى باشلانغاندىن بۇيان، ئىشغالىيەت ئاستىدىكى غەربىي قىرغاقتا ئىسرائىلىيە ئارمىيەسى ۋە قانۇنسىز كۆچمەنلەرنىڭ ھۇجۇملىرى ئاشقان. بۇ جەرياندا 1182 دىن ئارتۇق پەلەستىنلىك ھاياتىدىن ئايرىلغان، 13 مىڭغا يېقىن كىشى يارىلانغان ۋە 24 مىڭغا يېقىن كىشى تۇتقۇن قىلىنغان.
