جۇمھۇر رەئىس رەجەپ تاييىپ ئەردوغان: «جۇغراپىيەمىز كىرىزىسلار، ئۇرۇشلار ۋە توقۇنۇشلار بىلەن ئېلىشىۋاتقان قىيىن بىر مەزگىلدە، خەلقىمىزنى بۇ خەۋپ - خەتەرلەردىن يىراق تۇتتۇق» دېدى.
ئەردوغان بۇنىڭدىن 107 يىل ئىلگىرى (1919-يىلى مۇستەقىللىق ئۇرۇشىنىڭ تۇنجى قەدىمى بېسىلغاندا) سامسۇندىن باشلانغان مۇستەقىللىق يۈرۈشىنىڭ، بۈگۈن بۈيۈك ۋە كۈچلۈك تۈركىيە نىشانىغا قاراپ داۋاملىشىۋاتقانلىقىنى تەكىتلىدى.
ئۇ سۆزىنى داۋاملاشتۇرۇپ مۇنداق دېدى:
«دەرھال ئارقىمىزدا مۇستەقىللىقتىن كېلەچەككە تۇتىشىدىغان بۇ لىنىيەنىڭ ئىككى كۈچلۈك سىمۋولى بىزگە ھەمراھ بولماقتا. بىر تەرەپتە باندىرما پاراخوتى، ئۇنىڭ يېنىدىلا TCG ئانادولۇ ئاۋىياماتكىسى بار. باندىرما پاراخوتى بىلەن باشلىنىپ، TCG ئانادولۇ بىلەن داۋاملاشقان بۇ مۇساپە، تۈركىيەنىڭ قەيەردىن قەيەرگە كەلگەنلىكىنىڭ بىر بەلگىسىدۇر. ئاللاھقا شۈكۈرلەر بولسۇنكى، بىز بۈگۈنگە قەدەر تۈركىيەنى دولقۇنلۇق دېڭىزلاردىن ئۆتكۈزۈپ، ئامان-ئېسەن قىرغاققا ئېلىپ چىقىشقا مۇۋەپپەق بولدۇق. جۇغراپىيەمىز كىرىزىسلار، ئۇرۇشلار ۋە توقۇنۇشلار بىلەن ئېلىشىۋاتقان قىيىن بىر مەزگىلدە، خەلقىمىزنى بۇ خەۋپ - خەتەرلەردىن يىراق تۇتتۇق. دۆلىتىمىزگە نۇرغۇن ساھەلەردە تارىخىي ئۇتۇقلارنى ۋە غەلىبىلەرنى قولغا كەلتۈرۈپ بەردۇق.»
بىر ئوقۇغۇچىنىڭ «تېررورىزمدىن خالىي تۈركىيە» مۇساپىسى ھەققىدىكى سوئالىغا جاۋاب بەرگەن ئەردوغان: «شەرقىي جەنۇبىي ۋە شەرقىي ئانادولۇ رايونلىرىدا تېررورىزم مەسىلىسى ئىنتايىن ئېغىر ئىدى، ئەمما ئاللاھقا شۈكۈرلەر بولسۇنكى، ھازىر بۇ رايونلاردا تېررورىزمدىن ئەسەر قالىمىدى» دېدى.
جۇمھۇر رەئىس ئەردوغان رايوندا ئەمدى ھېچقانداق قىيىنچىلىقنىڭ قالمىغانلىقىنى ئەسكەرتىپ، نىشاننىڭ شەرقىي جەنۇبىي ۋە شەرقىي ئانادولۇ رايونلىرىنىڭ ئومۇمىي ئەھۋالىنى تېخىمۇ تىنچ ۋە خاتىرجەم ھالەتكە كەلتۈرۈش ئىكەنلىكىنى تەكىتلىدى.
