ئىسرائىلىيە قورشاۋ ئاستىدىكى غەززەگە قاراپ يولغا چىققان خەلقئارالىق پائالىيەتچىلەرنىڭ پاراخوتىنى توختىتىشنى پىلانلاۋاتقانلىقىنى ئېلان قىلدى. بۇ ئۇرۇنۇش، ئىسرائىلىيەنىڭ داۋاملىشىۋاتقان ھۇجۇملىرى سەۋەبىدىن چوڭقۇرلىشىۋاتقان ئىنسانپەرۋەرلىك كىرىزىسى شارائىتىدا غەززەدىكى قورشاۋغا سوئال قويۇشنى مەقسەت قىلىدۇ.
ئارمىيە رادىيوسى دۈشەنبە كۈنى ئىسرائىلىيە دېڭىز ئارمىيەسىنىڭ سىسىلىيادىن يولغا چىققان غەززە فىلوتى سەپەرۋەرلىكىنىڭ بىر قىسمى بولغان «مادلىن» ناملىق پاراخوتنىڭ كېلىشىگە تەييارلىق قىلىۋاتقانلىقىنى خەۋەر قىلدى. خەۋەرگە ئاساسلانغاندا، 12 خادىمى بار مەزكۇر پاراخوت «دېڭىز قورشاۋىنى بۇزۇش»نى نىشان قىلماقتا ئىكەن.
ۋەزىپىنى تەشكىللىگەن «ئەركىنلىك فىلوتى ئىتتىپاقى» باياناتىدا، «مادلىن» ناملىق پاراخوتنىڭ «كىشىلىك ھوقۇق قوغدىغۇچىلىرى ۋە ئىنسانپەرۋەرلىك ياردەم بۇيۇملىرىنى توشۇۋاتقان پۇقراۋى بىر پاراخوت» ئىكەنلىكىنى ۋە ئىسرائىلىيەنىڭ «قانۇنسىز ۋە ئىرقىي قىرغىنچىلىق خاراكتېرىدىكى قورشاۋىغا بىۋاسىتە جەڭ ئېلان قىلىش»نى مەقسەت قىلىدىغانلىقىنى ئوتتۇرىغا قويدى.
يولۇچىلار ئارىسىدا ئەسلىي فىرانسىيەنىڭ پەلەستىنلىك ياۋروپا پارلامېنت ئەزاسى رىما ھەسەن قاتارلىق ھەر قايسى دۆلەتلەردىن كەلگەن پىدائىيلارمۇ بار. پاراخوتقا غەززە ئاھالىسى ئۈچۈن جىددىي ئېھتىياجلىق بولغان بوۋاقلار سۈت پاراشوكى، ئۇن، گۈرۈچ، بالىلار زاكىسى، ئاياللار تازىلىق بۇيۇملىرى، سۇ بىلەن ئىشلىتىلىدىغان تازىلاش يۈرۈشلۈكلىرى، داۋالاش ئەسلىھەلىرى، ھاسا ۋە بالىلار ئۈچۈن تېببىي ياسالما ئەزالار قاتارلىق بۇيۇملار بېسىلغان.
«بۇ، تىنچلىقپەرۋەر پۇقراۋى قارشىلىق ھەرىكىتىدۇر» دەپ تەكىتلىگەن ئىتتىپاق، «<مادلىن> ناملىق پاراخوتتىكى بارلىق پىدائىيلار ۋە خادىملارنىڭ زوراۋانلىقتىن ساقلىنىش توغرىسىدا تەربىيە»سى ئالغانلىقىنى بىلدۈردى.
كېمىنىڭ تەخمىنەن بىر ھەپتە ئىچىدە غەززە قىرغاقلىرىغا يېتىپ كېلىشى كۈتۈلۈۋاتقان بولسىمۇ، ئىسرائىلىيە كۈچلىرىنىڭ خەلقئارا دېڭىز تەۋەلىكىدە توختىتىلىش خەۋپى ئىنتايىن يۇقىرىدەك قىلىدۇ.
بۇ سەپەر، ئىتتىپاقنىڭ ماي ئېيىنىڭ باشلىرىدا قىلغان مۇشۇنىڭغا ئوخشاش بىر ئۇرۇنۇشىنى داۋاملاشتۇرۇش خاراكتېرىگە ئىگە. ئۇ چاغدا، «ۋىجدان» ناملىق پاراخوتلار فىلوتى خەلقئارا دېڭىز تەۋەلىكىدە ئىسرائىلىيە ئۇچقۇچىسىز ھاۋا ئاپپاراتلىرىنىڭ ھۇجۇمىغا ئۇچرىغانىدى. ھۇجۇم نەتىجىسىدە پاراخوتقا ئوت كېتىپ، پاراخوت گەۋدىسىدە بىر تۆشۈك پەيدا بولغانلىقى خەۋەر قىلىنغانىدى.
غەززە ئاخبارات ئىشخانىسى بولسا، ئىسرائىلىيەنى غەززەنىڭ 2 مىليون 400 مىڭ ئاھالىسىنى يۇرت-ماكانىدىن ئايرىۋېتىش ئۈچۈن ئاچارچىلىقنى بىر قورال سۈپىتىدە ئىشلىتىش بىلەن ئەيىبلەپ، ئىسرائىلىيەنىڭ 2-مارتتىن بۇيان بارلىق چېگرا ئېغىزلىرىنى تاقىۋېلىپ، بولۇپمۇ يېمەكلىك ياردىمىنى توسۇۋالغانلىقىنى بىلدۈردى.
ئىسرائىلىيەنىڭ ھۇجۇملىرى
ئىسرائىلىيە، 2023-يىلى ئۆكتەبىردىن بۇيان غەززەدە ئىرقىي قىرغىنچىلىقنى داۋاملاشتۇرماقتا. پەلەستىنلىكلەر، قازا قىلغانلارنىڭ كۆپىنچىسىنىڭ ئاياللار ۋە بالىلار ئىكەنلىكىنى بىلدۈرۈپ، 54 مىڭ 470 دىن ئارتۇق پەلەستىنلىكنىڭ ئۆلگەنلىكىنى بىلدۈرمەكتە.
پەلەستىننىڭ رەسمىي خەۋەر ئاگېنتلىقى—ۋافانىڭ خەۋىرىگە ئاساسلانغاندا، تەخمىنەن 11 مىڭ پەلەستىنلىكنىڭ ۋەيران بولغان ئۆيلەرنىڭ خارابىلىرى ئاستىدا قالغانلىقى مۆلچەرلەنمەكتە ئىكەن.
ئەمما مۇتەخەسسىسلەر، ھەقىقىي قازا قىلغانلار سانىنىڭ غەززە دائىرىلىرىنىڭ دوكلاتىدىن كۆپ يۇقىرى ئىكەنلىكىنى، بۇ ساننىڭ تەخمىنەن 200 مىڭ ئەتراپىدا بولۇشى مۇمكىنلىكىنى ئىلگىرى سۈرمەكتە.
ئىرقىي قىرغىنچىلىق جەريانىدا ئىسرائىلىيە، رايوننىڭ زور بىر قىسمىنى خارابىلىككە ئايلاندۇرۇپ، ئاھالىنى پۈتۈنلەي دېگۈدەك ئۆي-ماكانىدىن مەھرۇم قىلدى. ياردەم تەشكىلاتلىرى، 2 مىليوندىن ئارتۇق ئىنسان ياشاۋاتقان بۇ رايوننىڭ قەھەتچىلىك خەۋپىگە دۇچ كەلگەنلىكى توغرىسىدا ئاگاھلاندۇردى.
ئۆتكەن يىلى نويابىردا خەلقئارا جىنايى ئىشلار سوت مەھكىمىسى، ئىسرائىلىيە باش مىنىستىرى بېنيامىن نېتانياھۇ ۋە سابىق دۆلەت مۇداپىئە مىنىستىرى يوئاۋ گالانت ئۈستىدىن غەززەدىكى ئۇرۇش جىنايەتلىرى ۋە ئىنسانىيەتكە قارشى جىنايەتلەرنى سادىر قىلغانلىقى سەۋەبىدىن قولغا ئېلىش بۇيرۇقى چىقاردى.
ئىسرائىلىيە يەنە، رايوندىكى پۇقرالارغا قارىتىلغان ئۇرۇش جىنايەتلىرى سەۋەبىدىن خەلقئارا ئەدلىيە سوتىدا بىر ئىرقىي قىرغىنچىلىق دەۋاسىغا دۇچ كەلمەكتە.
