ئامېرىكا ئىران بىلەن بولغان جىددىيچىلىك سەۋەبىدىن ئوتتۇرا شەرققە يەنە بىر ئۇرۇش پاراخوتى ئەۋەتىدۇ

 ئامېرىكا ئاخبارات ئورگىنى CBS نىڭ پەيشەنبە كۈنى ئېلان قىلغان خەۋىرىگە قارىغاندا، ئامېرىكا پىرېزىدېنتى دونالد ترامپنىڭ «چوڭ بىر فىلوت» نىڭ ئىرانغا قاراپ ئىلگىرىلەۋاتقانلىقىنى ئېلان قىلىشىدىن كېيىن، ئامېرىكا ئوتتۇرا شەرققە يەنە بىر ئۇرۇش پاراخوتى ئەۋەتكەن.

CBS مەزكۇر ئۇرۇش ئايروپىلانىنىڭ «ئارلېي بېرك» (Arleigh Burke) تىپلىق، «ئېگىس» (Aegis) سىستېمىلىق باشقۇرۇلىدىغان بومبا قوغلىغۇچى پاراخوتى «USS Delbert D. Black» ئىكەنلىكىنى بىلدۈردى.

CBS نىڭ مەلۇماتىغا ئاساسلانغاندا، ئامېرىكا مەركىزىي قۇماندانلىق ئىشتابىنىڭ مەسئۇلىيەت دائىرىسىدە تۇرۇۋاتقان باشقا ئامېرىكا پاراخوتلىرى ئارىسىدا «USS Abraham Lincoln» ئاۋىياماتكىسى، «USS Spruance»، «USS Murphy»، «USS Frank E. Petersen»، «USS McFaul» ۋە «USS Mitscher» قوغلىغۇچى پاراخوتلىرى بىلەن بىرگە، «USS Canberra»، «USS Tulsa» ۋە «USS Santa Barbara» قىرغاق جەڭ پاراخوتلىرىمۇ بار ئىكەن.

 دۆلەت مۇداپىئە مىنىستىرلىقى تېھران بىلەن بولغان جىددىيچىلىك داۋاملىشىۋاتقان بىر پەيتتە رايونلۇق كۈچ تەڭپۇڭلۇقىدا مۇھىم ئۆزگىرىش ھاسىل قىلىپ، ئاۋىياماتكا جەڭ گۇرۇپپىسىنى، زامانىۋى ئۇرۇش ئايروپىلانلىرى فىلوتىنى ۋە باشقۇرۇلىدىغان بومبىدىن مۇداپىئەلىنىش باتارېيەلىرىنى رايونغا تېز سۈرئەتتە ئورۇنلاشتۇرۇشنى داۋاملاشتۇرماقتا.

ترامپ چارشەنبە كۈنى «چوڭ بىر فىلوت» نىڭ ئىرانغا قاراپ ئىلگىرىلەۋاتقانلىقىنى تەكرارلاپ، تېھراننىڭ ۋاشىنگتون بىلەن سۆھبەت ئۆتكۈزۈشىنى ئۈمىد قىلىدىغانلىقىنى بىلدۈردى.

دۆلەت مۇداپىئە مىنىستىرى پېت خېگسېت پەيشەنبە كۈنى بەرگەن باياناتىدا، ۋاشىنگتوننىڭ ئىراننىڭ يادرو قوراللىرىغا ئېرىشىش ئۇرۇنۇشلىرىنى توسۇش ئۈچۈن «بارلىق تاللاشلارنى» ئىشلىتىشكە تەييار ئىكەنلىكىنى، شۇنىڭ بىلەن بىرگە دىپلوماتىلىك كېلىشىم تۈزۈشنىڭ يەنىلا مۇمكىنلىكىنى تەكىتلىدى.

ئامېرىكا ئارمىيە دائىرىلىرى يانۋار ئېيىنىڭ باشلىرىدا، رايوننىڭ كەڭ كۆلەملىك بىر توقۇنۇشقا «تەييار ئەمەسلىكىنى» بىلدۈرگەن ئىدى.

ئىران ئارمىيەسى بولسا، جىددىيچىلىكنىڭ تېز سۈرئەتتە ئەۋج ئېلىپ كېتىشىگە ئەگىشىپ، ھەرقانداق ھۇجۇمغا «قەتئىي ۋە تېز سۈرئەتتە جاۋاب قايتۇرۇلىدىغانلىقى» توغرىسىدا ئاگاھلاندۇرۇش بەردى.