ئىران ۋاشىنگتوننىڭ «ئويۇن پىلانى» نىڭ يەنە «مەغلۇپ بولىدىغانلىقى» نى بىلدۈرمەكتە.
ئامېرىكا پىرېزىدېنتى دونالد ترامپ ئىران دائىرىلىرىنىڭ بەزى نامايىشچىلارغا قارىتا ئېلان قىلغان ئۆلۈم جازاسى تەھدىتىنى ئىجرا قىلىشقا باشلىسا، تەپسىلاتىنى ئاشكارىلىمىغان ھالدا «ناھايىتى قاتتىق» تەدبىرلەرنىڭ قوللىنىلىدىغانلىقى ھەققىدە ئاگاھلاندۇرۇش بەردى؛ تېھران بولسا ئامېرىكانىڭ ئاگاھلاندۇرۇشلىرىنى «ھەربىي ئارىلىشىش ئۈچۈن باھانا ئىزدەش» دەپ ئاتىدى.
ئىلگىرى ئىراندا نامايىش قىلىۋاتقانلارغا «ياردەم يولدا» دېگەن ترامپ، سەيشەنبە كۈنى «CBS News» قانىلىنىڭ زىيارىتىنى قوبۇل قىلغاندا، ئەگەر ئىران ئۆلۈم جازاسىنى ئىجرا قىلىشقا باشلىسا، ئامېرىكانىڭ ھەرىكەتكە ئۆتىدىغانلىقىنى ئەسكەرتتى.
تېھران تەپتىشلىرى يېقىنقى كۈنلەردىكى نامايىشلار سەۋەبىدىن قولغا ئېلىنغان بەزى گۇماندارلار ئۈستىدىن «مۇھارەبە» يەنى «ئاللاھقا قارشى ئۇرۇش ئېلان قىلىش» جىنايىتى بىلەن ئۆلۈم جازاسى بېرىلىدىغانلىقىنى جاكارلىدى.
ئىرانغا كۆپ قېتىم ھەربىي ئارىلىشىش بىلەن تەھدىت سالغان ترامپ: «ئەگەر مۇنداق بىر ئىشنى قىلسا، بىز ناھايىتى قاتتىق تەدبىرلەرنى قوللىنىمىز. ئۇلار مىڭلىغان كىشىنى ئۆلتۈرۈشكە باشلىسا — ھازىر سىلەر ماڭا ئۆلۈم جازاسىدىن سۆز ئېچىۋاتىسىلەر — بۇنىڭ ئۇلار ئۈچۈن قانداق ئاقىۋەتلەرنى ئېلىپ كېلىدىغانلىقىنى كۆرىمىز» دېدى.
ئامېرىكا تاشقى ئىشلار مىنىستىرلىقى پارس تىلىدىكى X سەھىپىسىدە 26 ياشلىق نامايىشچى ئەرفان سۇلتانىنىڭ چارشەنبە كۈنى ئۆلۈم جازاسىغا ھۆكۈم قىلىنغانلىقىنى ئۇقتۇردى.
تاشقى ئىشلار مىنىستىرلىقىنىڭ بۇ ھەقتىكى باياناتىدا مۇنداق دېيىلدى:
«ئەرفان سۇلتانى ئۆلۈمگە ھۆكۈم قىلىنغان تۇنجى نامايىشچى، ئەمما ئەڭ ئاخىرقىسىمۇ بولمايدۇ. 10 مىڭ 600 دىن ئارتۇق ئىرانلىق تۇتقۇن قىلىندى.»
ئىراننىڭ ب د ت دە تۇرۇشلۇق دائىمىي ۋاكالەتخانىسى X سەھىپىسىدە بايانات ئېلان قىلىپ، ۋاشىنگتوننىڭ «ئويۇن پىلانى» نىڭ «يەنە مەغلۇپ بولىدىغانلىقى» نى بىلدۈردى.
ۋاكالەتخانىنىڭ بۇ ھەقتە ئېلان قىلغان باياناتىدا مۇنداق دېيىلدى:
«ئامېرىكانىڭ ئىران ھەققىدىكى خىياللىرى ۋە سىياسىتى ھاكىمىيەت ئالماشتۇرۇشنى نىشان قىلىدۇ؛ ئېمبارگولار، تەھدىتلەر، قۇتراتقۇلۇق نەتىجىسىدە ئوتتۇرىغا چىققان جىددىيچىلىك ۋە قالايمىقانچىلىقلار ھەربىي ئارىلىشىش ئۈچۈن باھانا تېپىش مەقسىتىدە قوللىنىلماقتا.»
ئىران دۆلەت تاراتقۇلىرى دۆلەت خەۋپسىزلىك كۈچلىرىنىڭ ئونلىغان خادىمىنىڭ ئۆلگەنلىكىنى ۋە ئۇلارنىڭ دەپنە مۇراسىملىرىنىڭ ھۆكۈمەتنى قوللايدىغان چوڭ تىپتىكى نامايىشلارغا ئايلانغانلىقىنى خەۋەر قىلدى.
تېھران دائىرىلىرى يېقىنقى كۈنلەردە ھاياتىدىن ئايرىلغان «شېھىتلار» ئۈچۈن چارشەنبە كۈنى پايتەختتە ئاممىۋى مېيىت ئۇزىتىش مۇراسىمى ئۆتكۈزۈلىدىغانلىقىنى ئۇقتۇردى.
كىشىلىك ھوقۇق تەشكىلاتلىرى بولسا ھۆكۈمەتنى نامايىشچىلارنى ئوققا تۇتۇپ ئۆلتۈرۈش ۋە ئۇدا بەش كۈندىن ئارتۇق داۋاملاشقان تور مۇلازىمىتىنىڭ توختاپ قېلىشى نەتىجىسىدە باستۇرۇشنىڭ كۆلىمىنى يوشۇرۇش بىلەن ئەيىبلىمەكتە.
ئىران دائىرىلىرى بولسا، ئارقا - ئارقىدىن كېچىدە يۈز بەرگەن ۋە مەملىكەت مىقياسىدا يېيىلغان نامايىشلاردىن كېيىن دۆلەتتە ۋەزىيەتنىڭ قايتىدىن تىنچىتىلغانلىقىنى ئىلگىرى سۈرمەكتە.
