فىلورىدا ئىشتاتىنىڭ مارالاگو شەھىرىدە ئۆتكۈزۈلگەن مۇخبىرلارنى كۈتۈۋېلىش يىغىنىدا سۈرىيەدىكى بەششار ئەسەد تۈزۈمىنىڭ ئاغدۇرۇلۇشىنى كەلتۈرۈپ چىقارغان يېڭى ۋەزىيەت ھەققىدە توختالغان دونالد ترامپ: «تۈركىيە ناھايىتى ئەقىللىك. (جۇمھۇر رەئىس ئەردوغان) ناھايىتى ئەقىللىك ۋە كۈچلۈك بىرى. ئەسەدنىڭ بالىلارغا قىلغانلىرىغا قاراپ، ئۇنى جاللات دېيىشكە بولىدۇ» دېدى.
ئامېرىكا قوشما ئىشتاتلىرىنىڭ رايوندا تۈركىيە بىلەن ھەمكارلىشالايدىغانلىقىنى بىلدۈرگەن ترامپ، بىر مۇخبىرنىڭ «سۈرىيەدىكى 900 ئامېرىكا ئەسكىرى مەسىلىسىنى قانداق بىر تەرەپ قىلماقچى بولۇۋاتىسىز؟» دېگەن سوئالىغا: «بۇنى قىلىشنىڭ باشقا بىر يولى بولۇشى كېرەك. بۇلارنىڭ بىرى تۈركىيە» دەپ جاۋاب بەردى.
تۈركىيەنىڭ «مۇھىم بىر كۈچ» ئىكەنلىكىنى تىلغا ئالغان ترامپ: «(جۇمھۇر رەئىس) ئەردوغان مەن ياخشى چىقىشىدىغان بىرى. (تۈركىيەنىڭ) چوڭ ھەربىي كۈچى بار. بۇ كۈچ ئۇرۇشلاردا ھالسىرىمىدى. ئۇ ناھايىتى قۇدرەتلىك ۋە تەسىرى كۈچلۈك بىر ئارمىيە قۇردى» دېدى.
ترامپ، ئامېرىكانىڭ شىمالىي ئاتلانتىك ئەھدى تەشكىلاتى — ناتو ئىتتىپاقدىشى بولغان تۈركىيە بىلەن سۈرىيەدە تېخىمۇ ياخشى ھەمكارلىشايدىغانلىقىنىڭ سىگنالىنى بېرىپ ئۆتتى.
سۈرىيەدىكى ئىلگىرىلەۋاتقان كۈچلەرنىڭ ئارقىسىدا تۈركىيەنىڭ بارلىقىنى ئىلگىرى سۈرگەن ۋە بۇنىڭ ئۆزىگە نىسبەتەن مەسىلە ئەمەسلىكىنى قەيت قىلغان ترامپ: «سۈرىيەنىڭ ئاچقۇچى تۈركىيەنىڭ قولىدا بولىدۇ. باشقا بىرىنىڭ بۇنداق دەۋاتقانلىقىنى ئاڭلىمىغان بولۇشۇڭلار مۇمكىن، ئەمما ئەمەلىيەت بۇ» دېگەنلەرنى سۆزلىرىگە ئىلاۋە قىلدى
