ئامېرىكا پىرېزىدېنتى دونالد ترامپ، پەلەستىن قارشىلىق كۆرسىتىش تەشكىلاتى ھاماسنى گۆرۈدىكىلەرنى قويۇپ بېرىش ۋە تىنچلىق سۆھبىتىدە تېز ھەرىكەت قىلىشقا چاقىردى. ھاماس جۈمە كۈنى ئېلان قىلغان باياناتىدا، بارلىق ئىسرائىلىيەلىك ئەسىرلەرنى — ھايات قالغان ۋە قازا قىلغانلارنى ئۆز ئىچىگە ئالغان ھالدا — قويۇپ بېرىشكە ۋە غەززەنىڭ باشقۇرۇشىنى تېخنوكىراتلاردىن تەشكىل تاپقان مۇستەقىل بىر پەلەستىن ئورگىنىغا تاپشۇرۇپ بېرىشكە تەييار ئىكەنلىكىنى ئېلان قىلغان ئىدى.
ترامپ ئۆزىنىڭ «Truth Social» ناملىق ئىجتىمائىي ئالاقە سۇپىسىدا: «ئىسرائىلىيەنىڭ گۆرۈدىكىلەرنى قويۇپ بېرىش ۋە تىنچلىق كېلىشىمىنى تاماملاشقا پۇرسەت يارىتىش ئۈچۈن بومباردىمان قىلىشنى ۋاقتىنچە توختاتقانلىقىنى تەقدىرلەيمەن. ھاماس تېز ھەرىكەت قىلىشى كېرەك، بولمىسا بارلىق كېلىشىملەر بىكار بولىدۇ» دېگەن سۆزلەرنى ئىشلەتتى.
بىراق، ترامپنىڭ ئىسرائىلىيەنىڭ غەززەنى بومباردىمان قىلىشنى توختاتقانلىقى توغرىسىدىكى سۆزلىرىگە قارىماي، ئىسرائىلىيە شەنبە كۈنىمۇ قورشاۋدىكى پەلەستىن رايونىغا ھۇجۇملىرىنى داۋاملاشتۇردى. سەھىيە خادىملىرىنىڭ بىلدۈرۈشىچە، بۇ ھۇجۇملاردا كەم دېگەندە 29 پەلەستىنلىك ھاياتىدىن ئايرىلغان.
ھاماس جۈمە كۈنىدىكى باياناتىدا، غەززەنىڭ كەلگۈسى ۋە پەلەستىن خەلقىنىڭ ھوقۇق-مەنپەئەتلىرىنىڭ تېخىمۇ كەڭ دائىرىلىك مىللىي پەلەستىن رامكىسى ئىچىدە مۇزاكىرە قىلىنىشى كېرەكلىكىنى تەكىتلىگەن ئىدى.
ترامپ بولسا ھەمبەھىرلىگەن يازمىسىدا: «كېچىكتۈرۈشكە سەۋرىم يوق، نۇرغۇن كىشىلەر بۇنىڭ يۈز بېرىدىغانلىقىنى ئويلاۋاتىدۇ، ياكى غەززەنىڭ قايتىدىن بىر تەھدىتكە ئايلىنىدىغان نەتىجىنى قوبۇل قىلمايمەن. كېلىڭلار، بۇ ئىشنى تېزدىن بىر تەرەپ قىلايلى. ھەممە ئادەم ئادىل مۇئامىلىگە ئېرىشىدۇ!» دېدى.
ترامپ جۈمە كۈنى ھاماسقا، پىلاننى تەستىقلىشى ئۈچۈن يەكشەنبە كۈنى ۋاشىنگتون ۋاقتى كەچ سائەت 18:00 (GMT 22:00) گىچە ۋاقىت بەردى.
بۇ پىلاندا غەززەنى قورالسىز رايونغا ئايلاندۇرۇش ۋە ئىجرا قىلىنىشىنى نازارەت قىلىش ئۈچۈن ترامپ رەھبەرلىكىدە يېڭى بىر خەلقئارالىق مېخانىزم ئارقىلىق ۋاقىتلىق بىر باشقۇرۇش مېخانىزمى قۇرۇش كۆزدە تۇتۇلغان.
پىلان ھاماسنىڭ قولىدىكى بارلىق ئىسرائىلىيەلىك ئەسىرلەرنىڭ تەستىقلانغاندىن كېيىنكى 72 سائەت ئىچىدە قويۇپ بېرىلىشىنى، بۇنىڭ بەدىلىگە ئىسرائىلىيە تۈرمىلىرىدىكى يۈزلىگەن پەلەستىنلىك مەھبۇسنىڭ قويۇپ بېرىلىشىنى ئۆز ئىچىگە ئالىدۇ.
ئۇنىڭدىن باشقا، توقۇنۇشلارنى توختىتىش، غەززەدىكى بارلىق قوراللىق گۇرۇپپىلارنى قورالسىزلاندۇرۇش ۋە ئۇرۇش ۋەيران قىلغان دېڭىز بويى رايونىدىن ئىسرائىلىيەنىڭ قەدەممۇ-قەدەم چېكىنىپ چىقىشى كۆزدە تۇتۇلغان. بۇ رايون ئامېرىكا پىرېزىدېنتىنىڭ رەھبەرلىكىدىكى بىر خەلقئارالىق ئورگاننىڭ نازارىتى ئاستىدا تېخنوكراتىك بىر ئورگان تەرىپىدىن باشقۇرۇلىدۇ.
