تۈركىيە ئىسرائىلىيەنىڭ قامال ئاستىدىكى غەززەگە قىلغان يېڭى ھاۋا ھۇجۇملىرىنى قاتتىق ئەيىبلىدى، بۇ ھۇجۇملارنىڭ نېتانياھۇ ھۆكۈمىتىنىڭ «تەل ئاۋىۋنىڭ ئىرقىي قىرغىنچىلىق سىياسىتى» نىڭ داۋامى ئىكەنلىكىنى بىلدۈردى.
تۈركىيە تاشقى ئىشلار مىنىستىرلىقىنىڭ سەيشەنبە كۈنى ئېلان قىلىنغان باياناتىدا، بۇ زورۋانلىقنىڭ نېتانياھۇ ھۆكۈمىتىنىڭ يېڭى بىر زۇلۇم باسقۇچىغا ئۆتكەنلىكىنى كۆرسىتىدىغانلىقى قەيت قىلىندى.
باياناتتا مۇنداق دېيىلدى:
«ئىسرائىلىيە خەلقئارا قانۇن ۋە ئالەمشۇمۇل قىممەت ئۆلچەملىرىنى ئەڭ ئېغىر شەكىلدە دەپسەندە قىلىپ، ئىنسانىيەتكە قارشى دۇئېل ئېلان قىلماقتا.»
مىنىستىرلىق ئىسرائىلىيەنىڭ بۇ ھەرىكەتلىرىنىڭ دۇنيا مىقياسىدا قايتىدىن تىنچلىق ئورنىتىش يولىدا ئۈزلۈكسىز تىرىشچانلىق كۆرسىتىلىۋاتقان بىر ۋاقىتتا رايوننىڭ مۇقىملىقىغا تەھدىت سېلىۋاتقانلىقىنى ئەسكەرتتى، بۇنى قوبۇل قىلىنغىلى بولمايدىغانلىقىنى تەكىتلەپ خەلقئارا جەمئىيەتنى ئاگاھلاندۇردى:
«ئىسرائىلىيەنىڭ يېڭى بىر زوراۋانلىق مۇھىتى يارىتىش ئورۇنۇشلىرىنى قەتئىي قوبۇل قىلغىلى بولمايدۇ.»
ئەنقەرە خەلقئارا جەمئىيەتنى ئىسرائىلىيەنىڭ بۇ ھۇجۇملىرىغا قارىتا قاتتىق پوزىتسىيە تۇتۇشقا چاقىردى، دەرھال ۋە ئۇزۇن مۇددەتلىك ئۇرۇش توختىتىش كېلىشىمى ھاسىل قىلىنىپ، پەلەستىننىڭ غەززە رايونىغا ئىنسانپەرۋەرلىك ياردەم بۇيۇملىرىنى توسالغۇسىز يەتكۈزۈپ بېرىشكە كاپالەتلىك قىلىشنىڭ زۆرۈرلىكىنى تەكىتلىدى:
«تۈركىيە پەلەستىن خەلقىنىڭ ھەققانىي دەۋاسىنى ھازىرغىچە داۋاملىشىپ كەلگىنىدەك، بۇنىڭدىن كېيىنمۇ قەتئىي قوللايدۇ، رايوندا تىنچلىق ۋە مۇقىملىق ئورنىتىش تىرىشچانلىقلىرىغا داۋاملىق ھەسسە قوشىدۇ.»
