ئىران تاشقى ئىشلار مىنىستىرى ئابباس ئاراقچى شەنبە كۈنى ئېلان قىلغان باياناتىدا، ئىراندا يۈز بەرگەن نامايىشلار جەريانىدا 32 مىڭ پۇقرانىڭ ئۆلتۈرۈلگەنلىكىگە ئائىت ئامېرىكا دەۋالىرىنى رەت قىلدى. تېھراننىڭ رەسمىي رەقەملەرنى ئاللىبۇرۇن ئورتاقلاشقانلىقىنى بىلدۈرگەن ئاراقچى، بۇنىڭدىن يۇقىرى پەرەزلەرنى قوللايدىغان دەلىللەر بولسا، ئوتتۇرىغا قويۇشقا چاقىردى.
ئامېرىكا پىرېزىدېنتى دونالد ترامپ جۈمە كۈنى قىلغان سۆزىدە: «بىلىسىلەر، ئىران خەلقى ئىران رەھبەرلىرىدىن ئىنتايىن پەرقلىق، بۇ ئىنتايىن ئېچىنىشلىق ئەھۋال» دېدى ۋە ئۇ يەردە «نېسىبەتەن قىسقا ۋاقىت ئىچىدە» 32 مىڭ كىشىنىڭ ئۆلتۈرۈلگەنلىكىنى سۆزىگە ئىلاۋە قىلدى.
ئاراقچى X (تۋىتتېر) سۇپىسىدا ئېلان قىلغان باياناتىدا، تېھراننىڭ «يېقىنقى تېررورلۇق ھەرىكەتلىرىدە قۇربان بولغان 3117 كىشىنىڭ (بۇنىڭ ئىچىدە 200 گە يېقىن خەۋپسىزلىك خادىمى بار) ئىسىملىكىنى رەسمىي ھۆججەت سۈپىتىدە ئېلان قىلىپ، تولۇق سۈزۈك بولۇش ۋەدىسىنى ئورۇندىغانلىقىنى» ئېيتتى. ئۇ يەنە: «بىزنىڭ سانلىق مەلۇماتلىرىمىزنىڭ توغرىلىقىغا ئېتىرازى بارلار بولسا، مەرھەمەت قىلىپ قولىدىكى دەلىللەرنى ئورتاقلاشسۇن» دېدى.
جۈمە كۈنى ئەتىگىنى ترامپ تېخىمۇ كۆپ تەپسىلات بەرمەستىن، ئىراننى بىر كېلىشىمگە مەجبۇرلاش ئۈچۈن چەكلىك بىر ھەربىي ھۇجۇمنى «ئويلىشىۋاتقانلىقىنى» ئېيتقان ئىدى.
يېقىنقى قولغا ئېلىش دولقۇنى، ئىراندا ئىقتىسادىي قىيىنچىلىقلار سەۋەبىدىن تىنچ شەكىلدە باشلىنىپ، كېيىن زوراۋانلىققا ئايلانغان ۋە رەسمىي رەقەملەرگە كۆرە 3000 دىن ئارتۇق ئادەمنىڭ ئۆلۈمى بىلەن نەتىجىلەنگەن نامايىشلاردىن بىر قانچە ھەپتە كېيىن يۈز بەردى. ئىران دائىرىلىرى ئامېرىكا قوشما ئىشتاتلىرى ۋە ئىسرائىلىيەنى ئۆزلىرى «ئىسيان» ۋە «تېررورلۇق» دەپ ئاتىغان ۋەقەلەرنى قوللاش بىلەن ئەيىبلىدى.
ئىران بىلەن ئامېرىكا يادرو سۆھبىتىنى بۇ ئاينىڭ بېشىدا ئوماننىڭ پايتەختى مەسقەتتە قايتا باشلىغان، ئارقىدىن سەيشەنبە كۈنى ئوماننىڭ ۋاسىتىچىلىكىدە جەنۋەدە سۆھبەت ئۆتكۈزۈلگەن ئىدى. بۇ يېڭى دىپلوماتىك مۇساپە، پارس قولتۇقىدىكى غايەت زور ئامېرىكا ھەربىي كۈچىنىڭ مەۋجۇتلۇقى شۇنداقلا ئىراننىڭ ھەربىي مانېۋىرلىرى سەۋەبىدىن جىددىي ۋەزىيەت يۇقىرى پەللىگە چىققان بىر پەيتتە ئېلىپ بېرىلماقتا.
پەيشەنبە كۈنى ۋاشىنگتوندىكى تىنچلىق كېڭىشىنىڭ ئېچىلىش يىغىنىدا سۆز قىلغان ترامپ، سۆھبەت مەغلۇپ بولغان تەقدىردە، ئامېرىكىنىڭ «10 كۈندىن 15 كۈنگىچە بولغان ۋاقىت ئىچىدە» ئىرانغا قارشى ھەربىي ھەرىكەت قوللىنىدىغانلىقى ھەققىدە ئاگاھلاندۇرۇش بەردى.
