ياۋروپا ئىتتىپاقى كومىتېتى ئۇكرائىناغا ئۇچقۇچىسىز ھاۋا ئاپپاراتى، ھاۋا مۇداپىئە سىستېمىسى، باشقۇرۇلىدىغان بومبا، رادار، ئېلېكترونلۇق ئۇرۇش سىستېمىسى ۋە ئوق-دورا بىلەن تەمىنلەش ئۈچۈن 2 مىليارد 860 مىليون ياۋرو پۇل تۆلىدى.
ياۋروپا ئىتتىپاقى كومىتېتى ئۇكرائىنانىڭ جىددىي ھەربىي ئېھتىياجىنى قاندۇرۇش ئۈچۈن ئاجرىتىلغان يېڭى پۇل-مۇئامىلە ياردىمى ھەققىدە بايانات ئېلان قىلدى. باياناتتا، 90 مىليارد ياۋرولۇق ئۇكرائىنانى قوللاش قەرزىنىڭ مۇداپىئە قىسمى دائىرىسىدە ئۇكرائىناغا 2 مىليارد 860 مىليون ياۋرو بېرىلگەنلىكى بىلدۈرۈلدى.
مەزكۇر مەنبەنىڭ ئۇچقۇچىسىز ھاۋا ئاپپاراتى، ھاۋا مۇداپىئە سىستېمىسى، باشقۇرۇلىدىغان بومبا، رادار، ئېلېكترونلۇق ئۇرۇش سىستېمىسى ۋە ئوق-دورا سېتىۋېلىشقا ئىشلىتىلىدىغانلىقى تىلغا ئېلىنغان باياناتتا، مۇداپىئە ئەسلىھەلىرىنى دەرھال يەتكۈزۈپ بېرىشنىڭ ئۇكرائىنا ئارمىيەسىنىڭ پۇقرالارنى ۋە شەھەرلەرنى رۇسىيەنىڭ ھۇجۇملىرىدىن قوغدىشىغا تۆھپە قوشىدىغانلىقى قەيت قىلىندى.
باياناتتا يەنە، 2026-2027-يىللىرىنى ئۆز ئىچىگە ئالىدىغان ئۇكرائىنا قەرزىنىڭ تەخمىنەن 60 مىليارد ياۋروسىنىڭ مۇداپىئەگە، 30 مىليارد ياۋروسىنىڭ بولسا خامچوت ياردىمىگە ئاجرىتىلغانلىقى ئەسكەرتىلدى. بۇ يىل ئۇكرائىنانىڭ مۇداپىئە سانائىتى ئىقتىدارىنى قوللاش مەقسىتىدە جەمئىي 28 مىليارد 300 مىليون ياۋرو تۆلەش پىلانلانغان بولۇپ، مۇداپىئە قىسمى دائىرىسىدىكى پۇل يۆتكەش خىزمەتلىرىنىڭ كېيىنكى ھەپتىلەردە داۋاملىشىدىغانلىقى ئۇقتۇرۇلدى.
ياۋروپا ئىتتىپاقى ۋە ئۇنىڭغا ئەزا دۆلەتلەر رۇسىيە بىلەن بولغان ئۇرۇش باشلانغان 2022-يىلىدىن بۇيان ئۇكرائىناغا جەمئىي 231 مىليارد 500 مىليون ياۋرو ياردەم قىلغانلىقى ئەسكەرتىلدى.
