«R4» مېخانىزمى، تۈركىيە، مىسىر، پاكىستان ۋە سەئۇدى ئەرەبىستان تەرىپىدىن رايونلۇق ئىگىدارچىلىق قىلىش ئېڭى ئاساسىدا ئۇزاق مۇددەتلىك مۇقىملىقنى قوللاش ۋە رايونلۇق مەسىلىلەردە دىيالوگنى كۈچەيتىش مەقسىتىدە قۇرۇلدى.

فىدان، رايونلۇق مەجبۇرىيەتلەرنى ئەسكەرتىدۇ

تاشقى ئىشلار مىنىستىرى خاقان فىداننىڭ يىغىندىكى نۇتىقىدا، رايونلۇق خەۋپسىزلىكنىڭ ئەڭ ئاۋۋال رايون دۆلەتلىرىنىڭ مەجبۇرىيەتنى ئۈستىگە ئېلىشىنى تەلەپ قىلىدىغانلىقىنى، تۈركىيەنىڭ بۇ چۈشەنچە ئاساسىدا رايونلۇق ئىگىدارچىلىقنى ئاساس قىلغان ھەمكارلىق مېخانىزملىرىنى كۈچەيتىشنى ئالدىنقى ئورۇنغا قويىدىغانلىقىنى تەكىتلىشى كۈتۈلمەكتە.

فىداننىڭ، ئىسرائىلىيەنىڭ پەلەستىندە داۋاملاشتۇرۇۋاتقان ئىشغالىيىتىنىڭ، خەلقئارا جەمئىيەتنىڭ تىنچلىق تىرىشچانلىقلىرىغا بۇزغۇنچىلىق قىلىۋاتقان مۇرەسسەسىز پوزىتسىيەسىنىڭ ۋە پۈتۈن رايونغا كېڭىيىۋاتقان تاجاۋۇزچىلىقىنىڭ ئوتتۇرا شەرقتىكى جىددىيچىلىكلەرنىڭ ئاساسلىق سەۋەبى ئىكەنلىكىنى قايتا تەكىتلىشى مۆلچەرلەنمەكتە.

خاقان فىداننىڭ، بارلىق دۆلەتلەرنىڭ قۇددۇسنىڭ تارىخىي ۋە قانۇنىي ئورنىغا دەخلى يەتكۈزىدىغان شۇنداقلا ئىككى دۆلەتلىك ھەل قىلىش چارىسى تىرىشچانلىقلىرىغا زىيان يەتكۈزىدىغان قىلمىشلاردىن ساقلىنىشىنىڭ ۋە خەلقئارا جەمئىيەتنىڭ ئىسرائىلىيەگە بېسىمىنى ئاشۇرۇشىنىڭ مۇھىملىقىنى ئەسكەرتىشى كۈتۈلمەكتە.

ئامېرىكا بىلەن ئىران ئوتتۇرىسىدىكى ئىختىلاپنىڭ پەقەت دىپلوماتىيە ۋە دىيالوگ يولى بىلەنلا ھەل قىلىنىدىغانلىقىنى، ھەربىي ئۇسۇللارنىڭ ئۇزاق مۇددەتلىك بىر ھەل قىلىش چارىسى يارىتالمايدىغانلىقى شۇنداقلا رايوندىكى نازۇك ۋەزىيەتنى جىددىيلەشتۈرۈۋېتىدىغانلىقىنى ۋە تېخىمۇ كەڭ كۆلەملىك بىر توقۇنۇش خەۋپىنى كەلتۈرۈپ چىقىرىدىغانلىقىنى قەيت قىلىشى مۆلچەرلىنىۋاتقان فىداننىڭ، ھۇسىيلار گۇرۇھىنىڭ سەئۇدى ئەرەبىستاندا پۇقرالارنى ۋە پۇقراۋى ئۇل ئەسلىھەلەرنى نىشان قىلغان ھۇجۇملىرى ئالدىدا تۈركىيەنىڭ سەئۇدى ئەرەبىستاننىڭ بىخەتەرلىكىگە كاپالەتلىك قىلىشنى قوللايدىغانلىقىنى جەزملەشتۈرۈپ، مەككە مۇداپىئە ئىتتىپاقى ئوتتۇرىغا قويغان ھەمكارلىق ۋە ئورتاق بىخەتەرلىك چۈشەنچىسىنىڭ مۇھىملىقىنى كۆرسىتىپ ئۆتۈشى كۈتۈلمەكتە.