جۇمھۇر رەئىس رەجەپ تاييىپ ئەردوغان سۈرىيەنىڭ پايتەختى دەمەشقتىكى مار ئىلياس چېركاۋىغا قىلىنغان شىددەتلىك تېررورلۇق ھۇجۇمىنى شىددەت بىلەن ئەيىبلىدى.

جۇمھۇر رەئىس ئەردوغان دۈشەنبە كۈنى ئىجتىمائىي تاراتقۇ سۇپىسى X تىكى ئادرېسىدا بايانات ئېلان قىلىپ، «دەمەشقتىكى مار ئىلياس چېركاۋىنى نىشان قىلغان قەبىھ تېررورلۇق ھۇجۇمى»نى ئەيىبلەيدىغانلىقىنى بىلدۈردى.

ئەردوغان ھاياتىدىن ئايرىلغانلارنىڭ ئائىلە-تاۋابىئاتلىرىغا، شۇنداقلا سۈرىيە ھۆكۈمىتى ۋە خەلقىگە تەزىيە بىلدۈردى. ئۇ يەنە: «يارىلانغانلارغا تېز شىپالىق تىلەيمەن» دېدى.

جۇمھۇر رەئىس ئەردوغان يەنە بۇ ھۇجۇمنىڭ سۈرىيە ۋە پۈتكۈل رايوننىڭ تىنچلىقى، بىخەتەرلىكى ۋە ئورتاق مەۋجۇتلۇق مۇھىتىنى بۇزغۇنچىلىققا ئۇچرىتىشنى مەقسەت قىلغانلىقىنى تەكىتلىدى.

ئۇ: «سۈرىيەنىڭ تىنچلىقى، بىخەتەرلىكى، ئىچكى ئەمىنلىكى ۋە ئورتاق مەۋجۇتلۇق مەدەنىيىتىنى، شۇنداقلا رايونىمىزنىڭ مۇقىملىقىنى نىشان قىلغان بۇ قەبىھ تېررورلۇق ھەرىكىتىگە قارشى تۇرۇشتا سۈرىيە خەلقى ۋە ھۆكۈمىتى بىلەن بىر سەپتە تۇرىمىز» دېگەنلەرنى قەيت قىلدى.

ئۇ سۆزىنى داۋاملاشتۇرۇپ: «يىللارچە داۋاملاشقان زۇلۇم ۋە توقۇنۇشلاردىن كېيىن، كەلگۈسىگە تۇنجى قېتىم ئۈمىد بىلەن قاراشقا باشلىغان قوشنىمىز ۋە قېرىندىشىمىز سۈرىيەنىڭ، ۋاكالەتچى تېررورلۇق تەشكىلاتلىرىنىڭ ۋاسىتىسى بىلەن يېڭى بىر مۇقىمسىزلىق ۋەزىيىتىگە سۆرەپ كىرىلىشىگە ھەرگىز يول قويمايمىز» دېدى.

ئۇ سۆزلىرىنى: «بىز سۈرىيە ھۆكۈمىتىنىڭ تېررورىزمغا قارشى كۈرىشىنى داۋاملىق قوللايمىز» دەپ خۇلاسىلىدى.

سۈرىيە سەھىيە مىنىستىرلىقىنىڭ باياناتىغا قارىغاندا، دائېش تېررورلۇق تەشكىلاتىنىڭ بىر ئەزاسى يەكشەنبە كۈنى دەمەشقنىڭ شەرقىدىكى بىر چېركاۋدا ئۆزىنى پارتلىتىشتىن ئىلگىرى ئوق چىقارغان بولۇپ، ھۇجۇمدا كەم دېگەندە 20 ئادەم قازا قىلغان، 52 ئادەم يارىلاندى.

بۇ ۋەقە سۈرىيە ئىچكى ئىشلار مىنىستىرلىقىنىڭ 26-ماي دەمەشقنىڭ يېزا-قىشلاقلىرىدا دائېش گۇرۇپپىلىرىنى بايقىغانلىقىنى ئېلان قىلىپ بىر قانچە ھەپتە ئۆتمەيلا يۈز بەردى. دائىرىلەر زەربە بېرىش ھەرىكىتى جەريانىدا يېنىك ۋە ئوتتۇرا تىپتىكى قورال-ياراغلارنى قولغا چۈشۈرگەنلىكىنى بىلدۈرگەن.

ئەسەد ھاكىمىيىتى ئاغدۇرۇلغاندىن بېرى، سۈرىيە بىخەتەرلىك قىسىملىرى جىنايەت، كىشىلىك ھوقۇق دەپسەندىچىلىكى ۋە تېررورلۇق پائالىيەتلىرىگە چېتىشلىق دەپ ئەيىبلەنگەن شەخسلەرنى داۋاملىق ئىز قوغلاپ كۆزەتمەكتە.

سۈرىيەگە 25 يىلغا يېقىن ھۆكۈمرانلىق قىلغان بەششار ئەسەد، دېكابىردا رۇسىيەگە قېچىپ كېتىپ، 1963-يىلىدىن بۇيان ھاكىمىيەت بېشىدا تۇرۇپ كەلگەن بەئەس پارتىيەسىنىڭ ھۆكۈمرانلىقىغا خاتىمە بەرگەن ئىدى.

بەششار ئەسەدنى ئاغدۇرغان ئۆكتىچى كۈچلەرگە رەھبەرلىك قىلغان ئەھمەد شارا، يانۋاردا ئۆتكۈنچى ھۆكۈمەتنىڭ پىرېزىدېنتلىقىغا تەيىنلەنگەن ئىدى.