ئامېرىكا پىرېزىدېنتى دونالد ترامپ ھۆكۈمىتىنىڭ كۇبا دائىرىلىرى بىلەن سۆھبەت ئېلىپ بېرىۋاتقانلىقىنى ئېيتقان بولسا، كۇبا ھۆكۈمىتى بۇنى رەت قىلىپ، نۆۋەتتە ھېچقانداق دىيالوگنىڭ يوقلۇقىنى تەكىتلىدى.

دۈشەنبە كۈنى سۆز قىلغان ترامپ، ۋاشىنگتوننىڭ «كۇبادىكى ئەڭ يۇقىرى دەرىجىلىك شەخسلەر» بىلەن سۆھبەتلىشىۋاتقانلىقىنى تىلغا ئالدى ۋە كۇبانى كۈنسېرى ئېشىۋاتقان ئىقتىسادىي بېسىمغا دۇچ كەلگەن «مەغلۇپ بىر دۆلەت» دەپ ئەيىبلىدى.

سۆھبەت ئارقىلىق نېمىگە ئېرىشىشنى ئۈمىد قىلىدىغانلىقى سورالغاندا، ترامپ جاۋاب بېرىپ: «ئۇ ھازىر مەغلۇپ بولغان بىر دۆلەت، ۋېنېزۇئېلادىنمۇ، باشقا ھېچقانداق يەردىن پۇل ئالالمايدۇ. مەغلۇپ بولغان دۆلەت. مېكسىكا ئۇلارغا نېفىت ئەۋەتىشنى توختىتىدۇ. شۇڭا بۇ يەردە تۇرۇۋاتقان كۇبالىقلارنىڭ ئەھۋالىغا كۆڭۈل بۆلۈشنى خالايمەن. ئۇلارنىڭ كۆپىنچىسى قايتىپ كېتىشنى خالايدۇ. كۆپىنچىسى كەم دېگەندە ئۇرۇق-تۇغقانلىرىنى يوقلاشنى خالايدۇ. مېنىڭچە بىز بىر نۇقتىغا خېلىلا يېقىنلاشتۇق، ئەمما ھازىرچە كۇبا دائىرىلىرى بىلەن سۆھبەتلىشىۋاتىمىز» دېدى.

كۇبا سۆھبەتنى رەت قىلدى

يەنە بىر تەرەپتىن، كۇبا ھۆكۈمىتى ئامېرىكا پىرېزىدېنتىنىڭ باياناتىنى رەت قىلدى. كۇبا تاشقى ئىشلار مىنىستىرلىقىنىڭ مۇئاۋىن مىنىستىرى كارلوس فېرناندېز دې كوسسىيو، ھاۋانا بىلەن ۋاشىنگتون ئوتتۇرىسىدا «ئالاقە» بارلىقىنى، ئەمما ئاكتىپ بىر دىيالوگنىڭ يوقلۇقىنى ئېيتىپ: «نۆۋەتتە ئالاھىدە بىر دىيالوگ يوق» دېدى ۋە ئىككى تەرەپنىڭ ئۇچۇر ئالماشتۇرۇۋاتقانلىقىنى، ئەمما بىر كېلىشىم ئۈستىدە سۆھبەتلەشمەيۋاتقانلىقىنى سۆزلىرىگە ئىلاۋە قىلدى.

ترامپ فلورىدادىكى مار-ئا-لاگو قورۇقىدا يەكشەنبە كۈنىمۇ شۇنىڭغا ئوخشاش باياناتلارنى بېرىپ، ئامېرىكانىڭ بىر «كېلىشىم تۈزۈشى»نىڭ كۈتۈلۈۋاتقانلىقىنى ئېيتقان، ئەمما تەپسىلات بەرمىگەن ئىدى.

ترامپ 3-يانۋار كۈنى ئامېرىكا ئالاھىدە قىسىملىرىنىڭ ۋېنېزۇئېلا پىرېزىدېنتى نىكولاس مادۇرونى تۇتقۇن قىلىپ قېچىشىدىن كېيىن، ھاۋاناغا قارىتىلغان بېسىمنى كۈچەيتتى. مادۇرو كۇبانىڭ مۇھىم بىر ئىتتىپاقدىشى ۋە مالىيە جەھەتتىن قوللىغۇچىسى ئىدى.

ئۆتكەن ھەپتە ترامپ ئارالنى نېفىت بىلەن تەمىنلەيدىغان دۆلەتلەرگە تاموژنا بېجى قويۇدىغانلىقىنى ئېيتىپ تەھدىت سالدى. ۋېنېزۇئېلانىڭ يېڭى ھۆكۈمىتى شۇ ۋاقىتتىن باشلاپ كۇباغا خام نېفىت ئەۋەتىشنى توختاتتى، ترامپ بولسا دۈشەنبە كۈنى مېكسىكىنىڭمۇ «نېفىت ئەۋەتىشنى توختىتىدىغانلىقى»نى بىلدۈردى. ئەمەلىيەتتە يۈرگۈزۈلۈۋاتقان نېفىت قامالى، يېقىلغۇ يېتىشمەسلىك سەۋەبىدىن ئېلېكتر ئىستانسىلىرى ئېنېرگىيە بىلەن تەمىنلەشتە قىينىلىۋاتقان كۇبانىڭ ئېنېرگىيە كىرىزىسىنى تېخىمۇ چوڭقۇرلاشتۇرۇۋېتىشى مۇمكىن.