ئامېرىكا قوشما ئىشتاتلىرى پىرېزىدېنتى دونالد ترامپ ئىسرائىلىيە باش مىنىستىرى بېنيامىن نېتانياھۇغا تۈركىيە بىلەن يۈز بېرىش ئېھتىمالى بولغان ھەرقانداق كېلىشەلمەسلىكتە «ئاقىلانە بولۇشى كېرەكلىكى»نى ئېيتقانلىقىنى ئاشكارىلىدى.
ترامپ يەنە تۈركىيە جۇمھۇر رەئىسى رەجەپ تاييىپ ئەردوغان بىلەن بولغان مۇناسىۋىتىنى ماختاپ، ئۆزىنىڭ ئوتتۇرىدىكى مەسىلىلەرنى ھەل قىلالايدىغانلىقىغا ئىشىنىدىغانلىقىنى بىلدۈردى.
ئاق سارايدا نېتانياھۇنى كۈتۈۋالغان ترامپ مۇخبىرلارغا: «ئەگەر تۈركىيە بىلەن بىرەر مەسىلەڭ بولسا، مېنىڭچە مەن ئۇنى ھەل قىلالايمەن. ئەلۋەتتە، بۇنىڭ ئۈچۈن سىز ئەقىلگە ئۇيغۇن ھەرىكەت قىلىشىڭىز شەرت. سىز چوقۇم ئەقىلگە ئۇيغۇن بولۇشىڭىز كېرەك. ھەممىمىز ئەقىلگە ئۇيغۇن بولۇشىمىز لازىم» دېدى.
ترامپ نېتانياھۇغا خىتاب قىلىپ مۇنداق دېدى: «بىبى (Bibi)، ئەگەر تۈركىيە بىلەن بىرەر مەسىلەڭ بولسا، مەن ئۇنى ھەل قىلالايدىغانلىقىمغا ئىشىنىمەن. مېنىڭ تۈركىيە ۋە ئۇنىڭ رەھبەرلىرى بىلەن ئىنتايىن ياخشى مۇناسىۋەتلىرىم بار. بىز بۇ مەسىلىنى ھەل قىلالايمىز. شۇڭا، بۇنىڭ بىر مەسىلە بولۇپ قالماسلىقىنى ئۈمىد قىلىمەن. ئۇنداق بولىدىغىنىغىمۇ ئىشەنمەيمەن».
ترامپ نېتانياھۇغا خىتاب قىلغاندا ئىسرائىلىيە باش مىنىستىرىنىڭ «بىبى» (Bibi) دېگەن لەقىمىنى ئىشلەتتى.
ترامپ يەنە جۇمھۇر رەئىس ئەردوغان بىلەن بولغان مۇناسىۋىتىنىڭ «ئاجايىپ ياخشى» ئىكەنلىكىنى تەكىتلىدى ۋە ئۇنى «قاتتىق قول، ئەمما ئىنتايىن ئەقىللىق» دەپ تەسۋىرلىدى.
ترامپ ئەردوغاننىڭ «ھېچكىم قىلالمىغان بىر ئىشنى قىلغانلىقىنى» ئېيتتى؛ ئۇ بۇ سۆزى ئارقىلىق ئۆتكەن يىلى دېكابىردا سۈرىيەنىڭ سابىق رەھبىرى بەششار ئەسەدنىڭ ئاغدۇرۇلۇشىدا تۈركىيەنىڭ ھالقىلىق رول ئوينىغانلىقىغا ئىشىنىدىغانلىقىنى يەنە بىر قېتىم تەكىتلىدى.
ئىلگىرى تۈركىيەنى «ياخشى دۆلەت»، جۇمھۇر رەئىس ئەردوغاننى «ياخشى رەھبەر» دەپ تەرىپلىگەن ترامپ، ئەلچىلىككە نامزات كۆرسىتىلگەن زاتلار بىلەن ئۆتكۈزگەن بىر يىغىندا تۈركىيەنى ماختاپ: «ئۇ ياخشى بىر جاي، رەھبىرىمۇ ياخشى» دېگەنىدى.
