تۈركىيە قوشۇمچە شاللاش مۇسابىقىسىدە كوسوۋونى 0 گە قارشى 1 نەتىجە بىلەن يېڭىپ، ھەل قىلغۇچ مۇسابىقىلەرگە قاتنىشىش ھوقۇقىنى قولغا كەلتۈردى.

كەرەم ئاقتۈركئوغلۇ مۇسابىقىنىڭ 53-مىنۇتىدا كوماندىغا غەلىبىگە ئېرىشتۈرگەن توپىنى كىرگۈزدى.

جۇمھۇر رەئىس رەجەپ تاييىپ ئەردوغان بايانات ئېلان قىلىپ، «بىزنىڭ بالىلار» دەپ ئاتالغان دۆلەتلىك پۇتبول كوماندىسىنىڭ ھەل قىلغۇچ مۇسابىقىلەرگە قاتنىشىش سالاھىيىتىگە ئېرىشكەنلىكىنى تەبرىكلىدى.

جۇمھۇر رەئىس ئەردوغان دۆلەتلىك كوماندىنىڭ 24 يىلدىن كېيىن پۇتبول دۇنياسىنىڭ ئەڭ چوڭ سەھنىسىدە تۈركىيەگە كۈچلۈك شەكىلدە ۋەكىللىك قىلىشىنى ئۈمىد قىلىدىغانلىقىنى بىلدۈرۈپ: «‹بىزنىڭ بالىلار›نىڭ ھەر ۋاقىتتىكىگە ئوخشاشلا ئاي يۇلتۇزلۇق فورمىنى كىيىپ غەلبىدىن غەلبىگە تۇتىشىدىغانلىقىغا، مىللىتىمىزنىڭ پەخرىنى ئاشۇرىدىغانلىقىغا ئىشەنچىمىز كامىلدۇر. بارلىق تەنھەرىكەتچىلىرىمىزگە ھۆرمەت بىلدۈرىمەن» دېدى.

جۇمھۇر رەئىس ئەردوغان يەنە كوماندىنىڭ ئاۋسترالىيە، پاراگۋاي ۋە ئامېرىكا بىلەن ئوينايدىغان گۇرۇپپا مۇسابىقىلىرىگە ئۇتۇق تىلىدى.

تۈركىيە تارىخىدا بۇنىڭدىن ئىلگىرى ئىككى قېتىم دۇنيا لوڭقىسىغا قاتنىشىش سالاھىيىتىنى قولغا كەلتۈرگەن ئىدى.

تۈركىيە ھەل قىلغۇچ مۇسابىقىلەرگە تۇنجى قېتىم 1954-يىلى قاتناشقان بولسىمۇ، لېكىن گۇرۇپپا باسقۇچىدا كۆرۈنەرلىك نەتىجە كۆرسىتەلمەيلا شاللىنىپ كەتكەن.

تۈركىيەنىڭ ھەل قىلغۇچ مۇسابىقىلەرگە ئىككىنچى قېتىملىق قاتنىشىشى پۈتۈنلەي باشقىچە نەتىجىلەنگەن؛ جەنۇبىي كورېيە ۋە ياپونىيە بىرلىكتە ساھىبخانلىق قىلغان 2002-يىللىق دۇنيا لوڭقىسىدا تۈركىيە ئۈچىنچىلىككە ئېرىشىپ، تۇرنىرنىڭ ئەڭ گەۋدىلىك كوماندىلىرى قاتارىدىن ئورۇن ئالغان ۋە تارىخىي ئۇتۇقنى قولغا كەلتۈرگەنىدى.