خىتاي مۇداپىئە مىنىستىرلىقى باياناتچىسى چارشەنبە كۈنى، ھەپتە ئاخىرىدا ئىككى دۆلەت ھەربىي ئايروپىلانلىرى ئارىسىدا يۈز بەرگەن ھاۋا سۈركىلىشىدىن كېيىن، خىتاينىڭ ئاۋسترالىيەگە «كەسكىن نارازىلىق» بىلدۈرگەنلىكىنى ئېلان قىلدى.
ئاۋسترالىيە تەرەپ يەكشەنبە كۈنى خىتاي ئۇرۇش ئايروپىلانىنىڭ جەنۇبىي خىتاي دېڭىزى ئۈستىدە چارلاش ۋەزىپىسىنى ئۆتەۋاتقان «پوسېيدون» رازۋېدكا ئايروپىلانىغا «خەتەرلىك دەرىجىدە» يېقىنلىشىپ، سىگنال ئېتىلدىقى ئېتىپ، ئايروپىلان خادىملىرىنىڭ ھاياتىنى خەۋپكە ئۇچراتقانلىقىنى بىلدۈرگەنىدى.
بۇنىڭغا قارىتا خىتاي ئارمىيەسى دۈشەنبە كۈنى بايانات بېرىپ، ئاۋسترالىيە ئايروپىلانىنىڭ شىشا ئاراللىرى (بېيجىڭ ھۆكۈمىتىنىڭ پاراسېل ئاراللىرىغا قويغان نامى) ئۈستىدىكى خىتاي ھاۋا تەۋەلىكىگە «قانۇنسىز بېسىپ كىرگەنلىكى»نى ئىلگىرى سۈرۈپ، بۇنىڭغا جاۋابەن «بىر قاتار ئۈنۈملۈك قارشى تەدبىرلەر»نى قوللانغانلىقىنى جاكارلىدى.
ئاسىيادىكى تالاش-تارتىشى كۈنسېرى كۈچىيىۋاتقان ھاۋا بوشلۇقى ۋە دېڭىز لىنىيەلىرىدە خىتاي بىلەن ئاۋسترالىيە ئوتتۇرىسىدا بۇ خىلدىكى سۈركىلىشلەر ئىلگىرىمۇ يۈز بەرگەنىدى.
بېيجىڭ كانبېررانى قۇتراتقۇلۇق قىلىش بىلەن ئەيىبلىدى
خىتاي دۆلەت مۇداپىئە مىنىستىرلىقى چارشەنبە كۈنى ئېلان قىلغان باياناتىدا ئاۋسترالىيەنىڭ چۈشەندۈرۈشىنى تەنقىد قىلىپ، بۇنىڭ «ھەق بىلەن ناھەقنى ئاستىن-ئۈستۈن قىلىپ، جاۋابكارلىقنى خىتايغا ئارتىشقا ۋە ئۆزىنىڭ يامان غەرەزلىك قانۇنسىز تاجاۋۇزچىلىقىنى يېپىشقا ئۇرۇنۇش» ئىكەنلىكىنى ئېيتتى.
باياناتچى جياڭ بىن توردا ئېلان قىلغان باياناتىدا: «بىز بۇ ئەھۋالدىن قاتتىق نارازى بولدۇق ۋە ئاۋسترالىيە تەرەپكە كەسكىن نارازىلىقىمىزنى يەتكۈزدۇق» دېدى.
جياڭ كانبېررانىڭ مەزكۇر ھاۋا ۋەقەسىدە خىتاينى خەتەرلىك ھەرىكەتلەر بىلەن «پۈتۈنلەي ئاساسسىز ئەيىبلىگەنلىكى»نى بىلدۈرۈپ: «بۇ ئەيىبلەش پۈتۈنلەي توقۇلما. بىز ئاۋسترالىيەنى تاجاۋۇزچىلىق، قۇتراتقۇلۇق ۋە ۋەقەنى چوڭايتىۋېتىش ھەرىكەتلىرىنى دەرھال توختىتىشقا دەۋەت قىلىمىز» دېدى.
ئۇ يەنە خىتاي ئارمىيەسىنىڭ «دۆلەتنىڭ ئىگىلىك ھوقۇقىنى قەتئىي قوغداش ئۈچۈن زۆرۈر تەدبىرلەرنى داۋاملىق قوللىنىدىغانلىقى»نى سۆزلىرىگە ئىلاۋە قىلدى.
