تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان 7 -، 8 - ئىيۇل كۈنلىرى ئەنقەرەدە ئۆتكۈزۈلىدىغان باشلىقلار يىغىنى دائىرىسىدە، جۇمھۇر رەئىسلىك سارىيىدا 32 دۆلەت ۋە ھۆكۈمەت باشلىقى بىلەن جەم بولىدۇ.
جۇمھۇر رەئىس ئەردوغان ئامېرىكا پىرېزىدېنتى دونالد ترامپ، فىرانسىيە پىرېزىدېنتى ئېممانۇئېل ماكرون، فىنلاندىيە پىرېزىدېنتى ئالېكساندېر ستۇب، سلوۋاكىيە پىرېزىدېنتى پېتېر پېللېگرىنى، ئەنگلىيە باش ۋەزىرى كېر ستارمېر، گېرمانىيە باش مىنىستىرى فرىدرىخ مېرتس، ئىتالىيە باش مىنىستىرى جورجىيا مېلونى، كانادا باش مىنىستىرى مارك كارنى، ئالبانىيە باش مىنىستىرى ئېدى راما، بولغارىيە باش مىنىستىرى رۇمېن رادېۋ، قاراتاغ باش مىنىستىرى مىلوجكو سپايىچ ۋە ناتو باش كاتىپى مارك رۇتتې شۇنداقلا ياۋروپا كېڭىشىنىڭ رەئىسى ئانتونىيو كوستا قاتارلىق رەھبەرلەر بىلەن كۆرۈشىدۇ.
ئەردوغاننىڭ 7 - ئىيۇل كۈنى ئامېرىكا پىرېزىدېنتى ترامپ بىلەن ئايرىم كۆرۈشۈشى ۋە بىرلىكتە ئاخبارات ئېلان قىلىش يىغىنى ئۆتكۈزۈشى كۈتۈلمەكتە.
جۇمھۇر رەئىس ئەردوغان ۋە رەپىقىسى ئەمىنە ئەردوغان 7 - ئىيۇل ئاخشىمى دۆلەت ۋە ھۆكۈمەت باشلىقلىرى ھەمدە ئۇلارنىڭ رەپىقىلىرىنىڭ شەرىپىگە جۇمھۇر رەئىسلىك سارىيىدا زىياپەت بېرىدۇ.
رەھبەرلەر بەشتەپە مىللەت كۆرگەزمە زالىدا ئايرىم-ئايرىم مۇخبىرلارنى كۈتۈۋېلىش يىغىنى ئۆتكۈزىدۇ
جۇمھۇر رەئىس ئەردوغان 8 - ئىيۇل كۈنى رەھبەرلەرنى يىغىن مەيدانىغا كەلگەندە كۈتۈۋالىدۇ ۋە ئۇلار بىلەن خاتىرە سۈرەتكە چۈشىدۇ. ناتو باش كاتىپى مارك رۇتتېنىڭ ئېچىلىش سۆزىدىن كېيىن، يىغىندا جۇمھۇر رەئىس ئەردوغان ۋە باشقا رەھبەرلەر سۆز قىلىدۇ.
يىغىندىن كېيىن، جۇمھۇر رەئىس ئەردوغان، ئامېرىكا پىرېزىدېنتى ترامپ ۋە بەزى رەھبەرلەر بەشتەپە مىللەت كۆرگەزمە زالىدا ئايرىم-ئايرىم مۇخبىرلارنى كۈتۈۋېلىش يىغىنى ئۆتكۈزىدۇ.
مۇداپىئە سېلىنمىلىرىنى ئاشۇرۇش قارارى دائىرىسىدە تاشلانغان قەدەملەر شۇنداقلا ئىتتىپاقنىڭ توسۇش ھەمدە مۇداپىئە ساھەسىدىكى تىرىشچانلىقلىرى 360 گرادۇسلۇق نۇقتىئىنەزەردىن باھالىنىدىغان بۇ يىغىندا، رەھبەرلەر ياۋروپا-ئاتلانتىك ئوكيان رايونىغا قارىتىلغان تەھدىتلەر، خەتەرلەر ۋە خىرىسلار ھەققىدە ئىستراتېگىيەلىك سەۋىيەدە پىكىر ئالماشتۇرىدۇ.
ئۇكرائىنادىكى ۋەزىيەت ۋە ئىتتىپاقنىڭ جەنۇبىدا يېقىنقى مەزگىللەردە يۈز بەرگەن ئۆزگىرىشلەر مۇزاكىرە قىلىنىدىغان بۇ يىغىنغا، ناتوغا ئەزا 32 دۆلەت ۋە ھۆكۈمەت باشلىقىدىن باشقا يەنە 100 گە يېقىن مىنىستىر، نۇرغۇنلىغان يۇقىرى دەرىجىلىك دىپلوماتلار، خەلقئارالىق تەشكىلاتلارنىڭ ۋەكىللىرى ۋە تەكلىپ قىلىنغان مېھمانلار قاتنىشىدۇ.
