ئىراننىڭ ئەڭ يۇقىرى بىخەتەرلىك ئورگىنى دۈشەنبە كۈنى، تېھران ئەمەلىيەتتە تاقىۋەتكەن ۋە پاراخوتلارنىڭ ئۆتۈشى ئۈچۈن پۇل (باج) تەلەپ قىلماقچى بولغان ھورمۇز بوغۇزىنى باشقۇرۇش يۈزىسىدىن يېڭى بىر ئورگاننىڭ قۇرۇلغانلىقىنى ئاشكارىلىدى.
ئىران يۇقىرى مىللىي بىخەتەرلىك كېڭىشى، ئۆزىنىڭ رەسمىي X ھېسابىدىن «Persian Gulf Strait Authority (PGSA)» دەپ ئاتالغان قۇرۇلمىغا ئائىت بىر ئۇچۇر ھەمبەھىرلەپ، بۇنىڭ «ھورمۇز بوغۇزى ھەرىكەتلىرى ۋە يېقىنقى تەرەققىياتلار تەسۋىرىدە دەقىقىلىق ئۇچۇرلار بىلەن تەمىنلەيدىغانلىقىنى» ئۇقتۇردى. ئىنقىلابىي مۇھاپىزەتچىلىرى دېڭىز ئارمىيەسىنىڭ X ھېسابىمۇ مەزكۇر ئۇچۇرنى قايتارما ھەمبەھىرلىدى.
بۇ يېڭى ئورگاننىڭ تولۇق نېمە ئىش قىلىدىغانلىقى دەسلەپتە ئېنىق ئەمەس ئىدى، ئەمما ئىراننىڭ ئىنگلىزچە ئاڭلىتىش بېرىدىغان «پرەسس تېۋى» (Press TV) قانىلى، بۇنىڭ ھورمۇز بوغۇزى ئۈستىدە «ئىگىلىك ھوقۇقىنى يۈرگۈزۈش سىستېمىسى» ئىكەنلىكىنى ۋە بوغۇزدىن ئۆتكەن پاراخوتلارغا info@pgsa.ir ئادرېسىدىن «بەلگىلىمىلەر» ئەۋەتىلگەنلىكىنى خەۋەر قىلدى.
ئىران، 28-فېۋرالدا ئامېرىكا ۋە ئىسرائىلىيە بىلەن ئۇرۇش باشلانغاندىن بۇيان ھالقىلىق بوغۇزدىن ئۆتىدىغان دېڭىز قاتنىشىنى زور دەرىجىدە چەكلىدى. 8-ئاپرېلدىن بۇيان بولسا سەزگۈر بىر ئۇرۇش توختىتىش مۇساپىسى يولغا قويۇلماقتا. ئىراننىڭ بۇ سۇ يولى ئۈستىدىكى كونتروللۇقى يەر شارى بازارلىرىنى قوزغىدى ۋە تېھرانغا مۇھىم بىر تەسىر كۈچى بەردى. بۇنىڭغا قارىتا ئامېرىكا، ئىران پورتلىرىغا ئۆزىنىڭ دېڭىز قامالىنى يولغا قويدى.
تىنچلىق مەزگىللىرىدە بۇ لىنىيە، يەر شارى نېفىت ۋە سۇيۇقلاندۇرۇلغان تەبىئىي گاز توشۇش مىقدارىنىڭ تەخمىنەن بەشتىن بىرىنى، شۇنداقلا ئوغۇتقا ئوخشاش باشقا مۇھىم تاۋارلارنى توشۇيتتى. ئۇرۇش باشلانغاندىن بۇيان ئىران، بوغۇزدىن ئۆتىدىغان دېڭىز قاتنىشىنىڭ «ئۇرۇشتىن بۇرۇنقى ھالىتىگە قايتمايدىغانلىقىنى» قايتا-قايتا ئېيتىپ كەلگەن ۋە ئۆتكەن ئايدا سۇ يولىدىن ئېلىنغان تۇنجى ئۆتۈش بېجى كىرىمىگە ئېرىشكەنلىكىنى ئېلان قىلغان ئىدى.
شەنبە كۈنى ئىران پارلامېنتى مىللىي بىخەتەرلىك كومىتېتىنىڭ باشلىقى ئىبراھىم ئەزىزى، ئىراننىڭ بوغۇزدىكى قاتناشنى باشقۇرۇش ئۈچۈن «كەسپىي بىر مېخانىزم تەييارلىغانلىقىنى» ۋە بۇنىڭ «يېقىندا ئاشكارىلىنىدىغانلىقىنى» ئېيتقان ئىدى.
