ھەم ھاكىمىيەت تەرەپدارى ھەم ھاكىمىيەتكە قارشى نامايىشلارنىڭ داۋاملىشىشىغا ئەگىشىپ، بەزى ياۋروپا ئەللىرى ئىراندا تۇرۇشلۇق پۇقرالىرىغا بۇ دۆلەتتىكى مۇقىمسىزلىق، تۇتقۇن قىلىنىش ۋە زوراۋانلىق ھەرىكەتلىرى سەۋەبىدىن ئىراننى دەرھال تەرك ئېتىشىنى تەۋسىيە قىلدى.
بىرنەچچە ياۋروپا دۆلىتى ھەم ھاكىمىيەتكە قارشى ھەم ھاكىمىيەت تەرەپدارى نامايىشلارنىڭ داۋاملىشىشى ۋە ئامېرىكانىڭ ئىرانغا باشقۇرۇلىدىغان بومبا ھۇجۇملىرى ئېلىپ بېرىش ئېھتىماللىقى توغرىسىدىكى ئەندىشىلەرنىڭ كۈچىيىشى سەۋەبىدىن بۇ دۆلەتنىڭ بىخەتەرلىك ئەھۋالىنىڭ يامانلاشقانلىقىنى بىلدۈرۈپ، پۇقرالىرىنى ئىراندىن ئايرىلىشقا چاقىردى.
چارشەنبە كۈنى ئىسپانىيە تاشقى ئىشلار مىنىستىرلىقى پۇقرالىرىغا ئىراننى تەرك ئېتىشنى تەۋسىيە قىلىپ، ئىراننىڭ ھەرقايسى جايلىرىدا ۋەزىيەتنىڭ مۇقىمسىز ئىكەنلىكى توغرىسىدا پۇقرالىرىنى ئاگاھلاندۇردى. بۇ ھەقتە يېڭىلانغان ساياھەت ئاگاھلاندۇرۇشىدا مۇنداق دېيىلدى:
«ئىراندا تۇرۇۋاتقان ئىسپانىيە پۇقرالىرىنىڭ ھازىرقى ئىمكانىيەتلەردىن پايدىلىنىپ دۆلەتنى تەرك ئېتىشى تەۋسىيە قىلىنىدۇ، پۈتكۈل ئىراننىڭ ۋەزىيىتى مۇقىمسىز، ھەرقايسى مەنبەلەردە بەزى نامايىشچىلارنىڭ ھاياتىدىن ئايرىلغانلىقى ۋە تۇتقۇن قىلىنغانلىقى خەۋەر قىلىنماقتا.»
ئىتالىيەمۇ بىخەتەرلىك ئەندىشىلىرى سەۋەبىدىن پۇقرالىرىغا ئىراننى تەرك ئېتىش چاقىرىقىنى يېڭىلىدى.
ئىتالىيە تاشقى ئىشلار مىنىستىرلىقى نۆۋەتتە بۇ دۆلەتتە تەخمىنەن 600 ئىتالىيەلىكنىڭ بارلىقىنى ۋە ئۇلارنىڭ كۆپىنچىسىنىڭ تېھراندا ئىكەنلىكىنى بىلدۈردى.
مىنىستىرلىق رايوندا 900 دىن ئارتۇق ئىتالىيە دۆلەت خەۋپسىزلىك كۈچلىرى ئەزاسىنىڭ بارلىقى، قوشنا ئەللەردە ۋەزىپە ئۆتەۋاتقان خادىملارنى قوغداش ئۈچۈن ئالدىنى ئېلىش تەدبىرلىرىنىڭ ئېلىنغانلىقىنى بىلدۈردى.
پولشامۇ مۇشۇنىڭغا ئوخشاش بىر ئاگاھلاندۇرۇش ئېلان قىلىپ، پۇقرالىرىنى دەرھال ئىراننى تەرك ئېتىشكە چاقىرىش بىلەن بىرگە، بۇ دۆلەتكە ساياھەت قىلماسلىقنى تەۋسىيە قىلدى.
گېرمانىيەمۇ خالىغانچە تۇتقۇن قىلىنىش خەۋپى توغرىسىدا ئاگاھلاندۇرۇش بېرىپ، ئىراندا تۇرۇۋاتقانلارنى بۇ دۆلەتنى تەرك ئېتىشكە چاقىردى ۋە ئىرانغا ساياھەتكە بارماسلىقنى تەۋسىيە قىلدى.
ئاراقچى ھۆكۈمەتنىڭ ۋەزىيەتنى كونتىرول قىلىۋاتقانلىقىنى بىلدۈردى
ئامېرىكا پىرېزىدېنتى دونالد ترامپ ھاكىمىيەتكە قارشى نامايىشچىلارنى ۋە رەھبەرلىرىنى قەتل قىلغان تەقدىردە ئىرانغا قارشى ھەربىي ھەرىكەت قوزغايدىغانلىقى توغرىسىدا ئاگاھلاندۇرۇش بەردى. ترامپ چارشەنبە كۈنى كۈنلەرچە داۋاملاشقان ئەيىبلەش ۋە تەھدىتلەردىن كېيىن: «بىزگە ئىراندا ئۆلۈملەرنىڭ ئاخىرلىشىۋاتقانلىقى ئېيتىلدى — ئاخىرلاشتى — ئاخىرلىشىۋاتىدۇ» دېدى.
ترامپ ئامېرىكانىڭ قانداق ئىنكاس قايتۇرىدىغانلىقى ھەققىدە تەپسىلىي مەلۇمات بەرمىدى، ئۇنىڭ ئېلان قىلغان باياناتىدا ئىرانغا قارشى ھەرىكەتكە ئۆتۈشنى كېچىكتۈرۈپ – كېچىكتۈرمەيدىغانلىقى مەسىلىسى ئېنىق ئەمەس ئىدى.
يانۋار ئېيىنىڭ باشلىرىدىن بۇيان دۆلەت پۇلىنىڭ ئادەتتىن تاشقىرى دەرىجىدە چۈشۈپ كېتىشى ۋە ناچارلاشقان ئىقتىسادىي شارائىتلار كەلتۈرۈپ چىقارغان نامايىش دولقۇنلىرى ئىراننى زىلزىلىگە سالماقتا.
نامايىشلار تېھراندىكى چوڭ بازاردا باشلاندى، ئارقىدىنلا نۇرغۇن شەھەرلەرگە كېڭەيدى.
ئىران دائىرىلىرى ۋەقەلەرنى چەت ئەلنىڭ ئارىلىشىشى سەۋەبىدىن كېلىپ چىققانلىقىنى ئىلگىرى سۈردى، ھەمدە نامايىشچىلارنى «تېررورلۇق ھەرىكەتلىرى» نى سادىر قىلىش بىلەن ئەيىبلىدى.
چارشەنبە كۈنى ئىران تاشقى ئىشلار مىنىستىرى ئابباس ئاراقچى ئامېرىكانىڭ Fox News تېلېۋىزىيە قانىلىنىڭ «Special Report» پىروگراممىسىدا: «ئۈچ كۈن داۋاملاشقان تېررورلۇق ھەرىكەتلىرىدىن كېيىن، ھازىر ۋەزىيەت مۇقىم، ۋەزىيەتنى تولۇق كونتىرول ئاستىغا ئالدۇق» دېدى.
