كۇبا ئامېرىكا قوشما ئىشتاتلىرىنىڭ ئارالغا يېقىلغۇ ۋە باشقا ماللارنى توشۇشنى چەكلىگەن جازالىرىدىن ھالقىپ ئۆتۈشنى مەقسەت قىلغان «بىزنىڭ ئامېرىكا» (Nuestra América) ئەترىتىنىڭ ئىنسانپەرۋەرلىك ياردەم بۇيۇملىرىنى تاپشۇرۇۋالدى.

كىچىك بىر پاراخوتقا بېسىلغان ياردەم بۇيۇملىرى ئۆتكەن ھەپتە مېكسىكادىكى پروگرېسو پورتىدىن يولغا چىقىپ سەيشەنبە كۈنى ئەتىگەندە ھاۋانا پورتىغا يېتىپ كەلدى. كۇبا دائىرىلىرىگە 14 توننا يېمەكلىك، دورا-دەرمەك، قۇياش ئېنېرگىيەلىك باتارېيە تاختىسى ۋە ۋېلىسىپىت تاپشۇرۇپ بېرىلدى.

ھاۋاناغا يېتىپ كەلگەن پاراخوت پروگرېسودىن يولغا چىققان فىلوتتىكى ئۈچ پاراخوتنىڭ بىرى بولۇپ، قالغان ئىككى پاراخوتنىڭ ئالدىمىزدىكى كۈنلەردە يېتىپ كېلىشى كۈتۈلمەكتە.

پائالىيەتچىلەر ئۆتكەن ھەپتىمۇ جەمئىي 6 توننىلىق ياردەم بۇيۇملىرىنى ئايروپىلان بىلەن ئېلىپ كېلىپ دوختۇرخانىلارغا تاپشۇرۇپ بەرگەنىدى. مال تاپشۇرۇش جەريانى كۇبا دۆلەت تېلېۋىزىيەسىدە كۆرسىتىلدى.

كۇبا پىرېزىدېنتى مىگۇئېل دىياز-كانېل ئۆتكەن ھەپتە ئەنگلىيە ئىشچىلار پارتىيەسىنىڭ سابىق رەھبىرى جېرېمى كوربىنغا ئوخشاش ياۋروپالىق سىياسەتچىلەرنىمۇ ئۆز ئىچىگە ئالغان ياردەم ئەترىتى ئەزالىرىنى پىرېزىدېنتلىق مەھكىمىسىدە قوبۇل قىلدى.

«بىزنىڭ ئامېرىكا» ئەترىتى ناملىق ئىجتىمائىي كۈچلەر باشقۇرۇشىدىكى تەشكىلات ئىشچىلار ئۇيۇشمىلىرى، سىياسىي پارتىيەلەر ۋە پارلامېنت ئەزالىرىنى ئۆز ئىچىگە ئالغان 30 دىن ئارتۇق دۆلەتتىن كەلگەن 300 گە يېقىن تەشكىلاتنى ئۆز ئىچىگە ئالىدۇ.

بىرازىلىيەلىك پائالىيەتچى تىياگو ئاۋىلا قىرغاققا چىققاندىن كېيىن «بۇ پەقەت بىرىنچى قەدەم. تېخىمۇ كۆپ ياردەم كېلىدۇ» دېدى.

بۇ سىمۋوللۇق بىر ياردەم

كارىب دېڭىزىدىكى ناچار ھاۋا رايى سەۋەبىدىن كېچىكىپ كەلگەن سەيشەنبە كۈنىدىكى بۇ ياردەم، قاتناش، سەھىيە مۇلازىمىتى ۋە توك چىقىرىش قاتارلىق ساھەلەرگە تەسىر كۆرسەتكەن ئېغىر ئىقتىسادىي كىرىزىسقا دۇچ كېلىۋاتقان بىر دۆلەت ئۈچۈن «سىمۋوللۇق ياردەم» دەپ تەسۋىرلەندى.

ترامپ ھۆكۈمىتى ئارالنى يېقىلغۇ بىلەن تەمىنلەشنى توختىتىپ، كۇبانى نېفىت بىلەن تەمىنلەيدىغان دۆلەتلەرگە تاموژنا بېجى قويىدىغانلىقىنى ئېيتىپ تەھدىت سالغانىدى.

بۇ ئەڭ ئاخىرقى ياردەم كوستارىكا ئېكۋادورغا ئەگىشىپ كۇبا بىلەن بولغان دىپلوماتىك مۇناسىۋىتىنى ئۈزگەنلىكىنى ئېلان قىلىپ ئۇزۇن ئۆتمەيلا ئىشقا ئاشتى.