ئامېرىكا پىرېزىدېنتى دونالد ترامپ ئىران بىلەن بولغان ئۇرۇش يەتتىنچى كۈنىگە قەدەم قويغاندا، ئامېرىكا دۆلەت مۇداپىئە شىركەتلىرىنىڭ ئەڭ ئىلغار قوراللارنى ئىشلەپچىقىرىشنى تۆت ھەسسە ئاشۇرۇشقا قوشۇلغانلىقىنى ئېيتتى.

ئىران ئىسرائىلىيەنىڭ «تۆمۈر گۈمبەز» (Iron Dome)، «داۋۇدنىڭ  رىگەتكىسى»  (David’s Sling) ۋە «ۋەتەنپەرۋەر» (Patriot) ناملىق باشقۇرۇلىدىغان بومبا ھاۋا قالقىنىغا ئوخشاش باشقۇرۇلىدىغان بومبا مۇداپىئە سىستېمىلىرىنى بۆسۈپ ئۆتۈش ئۈچۈن ئوخشىمىغان تاكتىكىلارنى قوللانماقتا. بۇ ئەھۋال ئامېرىكا-ئىسرائىلىيەنىڭ ھاۋا قالقىنى باشقۇرۇلىدىغان بومبا تەمىناتىنىڭ ئۇزۇن مۇددەتلىك سىجىللىقىغا نىسبەتەن گۇمان پەيدا قىلدى.

پىرېزىدېنت ترامپ جۈمە (2026-يىلى 6-مارت)  كۈنى«ھەقىقىي مېديا» (Truth Social) دىكى يازمىسىدا، «ئامېرىكادىكى ئەڭ چوڭ دۆلەت مۇداپىئە شىركەتلىرى» نىڭ ئەمەلدارلىرى بىلەن يىغىن ئۆتكۈزگەنلىكىنى ۋە شىركەتلەرنىڭ «ئەڭ ئىلغار» قوراللارنى ئىشلەپچىقىرىشنى قوبۇل قىلغانلىقىنى بىلدۈردى.

ترامپ يازمىسىدا مۇنداق دېدى: «بىز ھازىر ئامېرىكانىڭ ئەڭ چوڭ دۆلەت مۇداپىئە شىركەتلىرى بىلەن ئىشلەپچىقىرىش ۋە ئىشلەپچىقىرىش پىلانى توغرىسىدىكى ئىنتايىن ياخشى بىر يىغىننى ئاخىرلاشتۇردۇق. ئۇلار ئەڭ ئىلغار قوراللارنى ئىشلەپچىقىرىشنى تۆت ھەسسە ئاشۇرۇشقا قوشۇلدى، چۈنكى بىز ئىمكانقەدەر تېز سۈرەتتە ئەڭ يۇقىرى مىقدارغا يەتمەكچى.»

ترامپ ئىشلەپچىقىرىشنى كېڭەيتىش خىزمىتىنىڭ يىغىندىن ئۈچ ئاي بۇرۇن باشلانغانلىقىنى ئەسكەرتتى.

ئۇ: «بۇ قوراللارنىڭ كۆپىنچىسىنى ئىشلەپچىقىرىش ئاللىقاچان باشلاندى» دېدى.

ئۇ ئامېرىكانىڭ نۆۋەتتە باشقا تۈردىكى قوراللارنىڭ زور مىقداردىكى زاپىسىغا ئىگە ئىكەنلىكىنى تەكىتلەپ: «بىزنىڭ ئوتتۇرا ۋە ئوتتۇرىدىن يۇقىرى دەرىجىلىك ئوق-دورا زاپىسىمىز چەكسىز، بىز بۇلارنى مەسىلەن ئىراندا ئىشلىتىۋاتىمىز، يېقىندا ۋېنېزۇئېلادىمۇ ئىشلەتكەن ئىدۇق. بۇ خىلدىكى قوراللارغا بېرىلىدىغان زاكاسلارنىمۇ كۆپەيتتۇق» دېدى.

ترامپنىڭ سۆزىگە قارىغاندا، بىر قانچە چوڭ دۆلەت مۇداپىئە شىركىتىنىڭ مەسئۇللىرىمۇ يىغىنغا قاتناشقان.

بۇ شىركەتلەرنىڭ ئارىسىدا، BAE Systems، Boeing، Honeywell Aerospace، L3Harris Missile Solutions، Lockheed Martin، Northrop Grumman  ۋە Raytheon قاتارلىق شىركەتلەرنىڭ باش ئىجراچى ئەمەلدارلىرى بار.

ترامپ مۇداپىئە شىركەتلىرىنىڭ ئەمەلدارلىرى بىلەن ئىككى ئايدىن كېيىن، يەنە بىر قېتىم يىغىن ئۆتكۈزۈلىدىغانلىقىنى ئېيتتى.

ئۇ بىر قانچە ئىشىتاتنىڭ يېڭى قورال ئىشلەپچىقىرىش زاۋۇتلىرىنى قۇرۇش ئۈچۈن رىقابەتلىشىۋاتقانلىقىنى ئەسكەرتىپ: «ھەر قايسى ئىشىتاتلار بۇ يېڭى زاۋۇتلارنى قولغا كەلتۈرۈش ئۈچۈن تىرىشىۋاتىدۇ» دېدى.

مۇناسىۋەتلىك ئۇچۇرلارTRT World - Interceptor shortage? South Korea, US discuss possible relocation of Patriot missiles to Middle East