ئاۋسترالىيە باش مىنىستىرى ئانتونىي ئالبانېس دۈشەنبە كۈنى بايانات بېرىپ، ئىسرائىلىيەنىڭ غەززەگە ياردەم كىرىشىنى توسۇش ئۈچۈن ئوتتۇرىغا قويغان «باھانە ۋە ئىزاھاتلىرىنىڭ» «ئاقلىغىلى بولمايدىغانلىقىنى» ۋە «قايىل قىلارلىق ئەمەسلىكىنى» ئېيتىپ، تېل ئاۋىۋ ھۆكۈمىتىنى ئەڭ كەسكىن شەكىلدە تەنقىد قىلدى.

كانبېررادا ئۆتكۈزۈلگەن مۇخبىرلارنى كۈتۈۋېلىش يىغىنىدا ئالبانېس مۇنداق دېگەن: «ئىسرائىلىيەنىڭ قىلمىشلىرىنى ھەرگىز قوبۇل قىلغىلى بولمايدۇ. ئېھتىياجلىق كىشىلەر تۇرۇۋاتقان غەززەگە يېمەكلىك ۋە باشقا بۇيۇملارنىڭ كىرگۈزۈلۈشىنى توسۇش ئىنتايىن رەزىللىكتۇر».

ئالبانېس بۇ تەنقىدنى بىر نەچچە كۈن ئىلگىرى رىمدا ئىسرائىلىيە پىرېزىدېنتى ئىسھاق ھېرتزوگ بىلەن كۆرۈشكەندە ئوتتۇرىغا قويغانلىقىنى ئېيتىپ، ئىسرائىلىيە پىرېزىدېنتىغا: «ئىسرائىلىيەنىڭ باھانىلىرى ۋە ئىزاھاتلىرى پۈتۈنلەي ئاقلىغىلى بولمايدۇ ھەمدە قايىل قىلارلىق ئەمەس» دېگەنلىكىنى بىلدۈردى.

ئۇ سۆزىنى داۋاملاشتۇرۇپ: «ئىنسانلار ئاچلىقتىن ئۆلۈۋاتىدۇ. بىر دېموكراتىك دۆلەتنىڭ ياردەم بۇيۇملىرىنىڭ كىرىشىنى چەكلىشى ھەقىقىي مەنىدىكى زۇلۇمدۇر» دېدى.

ئالبانېسنىڭ بۇ تەنقىدلىرى بىرلەشكەن دۆلەتلەر تەشكىلاتىنىڭ غەززەنىڭ ئاچارچىلىق ھارپىسىدا ئىكەنلىكى ھەققىدىكى يېقىنقى ئاگاھلاندۇرۇشى بىلەن ئوخشاش ۋاقىتقا توغرا كەلدى.

ئىسرائىلىيەگە قارشى ئېمبارگو تەھدىتلىرى

ئەنگلىيە، فىرانسىيە ۋە كانادا قاتارلىق نۇرغۇن غەرب دۆلەتلىرى ئىسرائىلىيە باش مىنىستىرى بېنيامىن نېتانياھۇنىڭ قورشاۋدىكى رايونغا «ئاز مىقداردا» ئىنسانپەرۋەرلىك ياردىمى كىرگۈزۈشكە رۇخسەت قىلىش قارارىغا نارازىلىق بىلدۈرۈپ، تېل ئاۋىۋ ھۆكۈمىتىگە ئېمبارگو يۈرگۈزۈش بىلەن تەھدىت سالدى.

كانبېررا بۇ ئورتاق تەھدىتكە ئىمزا قويمىغان بولسىمۇ، ئىسرائىلىيە ئوتتۇرىغا قويغان ياردەم لايىھەسىگە قارىتا كۈچىيىۋاتقان خەلقئارا تەنقىدلەرگە قوشۇلۇپ، غەززەگە ئىنسانپەرۋەرلىك ياردەملىرىنىڭ تولۇق ۋە دەرھال ئەسلىگە كەلتۈرۈلۈشى كېرەكلىكىنى تەكىتلىدى.

خەلقئارانىڭ ئۇرۇش توختىتىش چاقىرىقلىرىنى رەت قىلىپ، 2023-يىلى ئۆكتەبىردىن بۇيان غەززەگە قارشى شىددەتلىك ھۇجۇملىرىنى داۋاملاشتۇرۇۋاتقان ئىسرائىلىيە ئارمىيەسى، كۆپىنچىسى ئاياللار ۋە بالىلار بولغان 53 مىڭ 900 دىن ئارتۇق پەلەستىنلىكنى ئۆلتۈردى.

خەلقئارا كۆچمەنلەر تەشكىلاتى (IOM) نىڭ جۈمە كۈنىدىكى باياناتىغا ئاساسلانغاندا، ئۆتكەن ھەپتە ئىسرائىلىيەنىڭ شىددەتلىك ھۇجۇملىرى ۋە قورشاۋى سەۋەبىدىن غەززەدە 172 مىڭدىن ئارتۇق كىشى ئۆي-ماكانىدىن ئايرىلغان.

ئۆتكەن يىلى نويابىردا خەلقئارا جىنايى ئىشلار سوت مەھكىمىسى، غەززەدە ئۇرۇش جىنايىتى ۋە ئىنسانىيەتكە قارشى جىنايەت ئۆتكۈزگەنلىكىنى سەۋەب كۆرسىتىپ، ئىسرائىلىيە باش مىنىستىرى بېنيامىن نېتانياھۇ ۋە سابىق دۆلەت مۇداپىئە مىنىستىرى يوئاۋ گالانت ئۈستىدىن تۇتۇش بۇيرۇقى چىقارغانىدى.

ئىسرائىلىيە يەنە، رايوندا ئېلىپ بېرىۋاتقان ئۇرۇشى سەۋەبلىك خەلقئارا ئەدلىيە سوتىدا بىر ئىرقىي قىرغىنچىلىق دېلوسىغىمۇ دۇچ كەلمەكتە.