USA Today گېزىتىنىڭ خەۋىرىگە قارىغاندا، پېنتاگون كۇباغا قارىتا ئېلىپ بېرىلىشى مۇمكىن بولغان ھەربىي ھۇجۇم پىلانىنى تەييارلاش خىزمىتىنى «تېزلەتكەن». مەسىلىگە يېقىن ئىككى مەنبەنىڭ بىلدۈرۈشىچە، ترامپ ھۆكۈمىتىنىڭ ئارالغا قارىتا ھەربىي ھەرىكەت باشلاش بۇيرۇقى بېرىلگەندە، تاشلىنىدىغان قەدەملەرنىڭ كېچىكىپ كەتمەسلىكى ئۈچۈن تەييارلىقلارنى كۈچەيتىش ھەققىدە كۆرسەتمە بېرىلگەن.
«Zeteo» خەۋەر تورىمۇ ئاقساراينىڭ ئامېرىكا ئەمەلدارلىرىغا كۇبادا ھەربىي ھەرىكەت ئېلىپ بېرىش پىلانىنى كۈچەيتىش توغرىسىدا «يېڭى بىر يوليورۇق» بېرىلگەنلىكىنى خەۋەر قىلدى. بۇ ئەھۋال ئۇزۇن يىللىق ئىقتىسادىي بېسىمدىن كېيىن، ۋەزىيەتنىڭ يەنىمۇ جىددىيلىشىشى مۇمكىنلىكىدىن بېشارەت بەرمەكتە.
پېنتاگوننىڭ بىر ئەمەلدارى ئانادولۇ خەۋەر ئاگېنتلىقىغا بايانات بېرىپ: «بىز پەرەزلەر ئاساسىدىكى سېنارىيەلەر ئۈستىدە توختالمايمىز. مىنىستىرلىقىمىز تۈرلۈك جىددىي ئەھۋاللارغا تەييارلىق قىلىدۇ ۋە پىرېزىدېنتنىڭ كۆرسەتمىلىرىنى ئىجرا قىلىشقا ھەر ۋاقىت تەييار» دېدى.
بۇ خەۋەرلەر ترامپنىڭ دۈشەنبە كۈنى ئىران مەسىلىسىدىن كېيىن، ئامېرىكانىڭ «كۇباغا كىرىپ چىقىشى مۇمكىنلىكى»نى تىلغا ئېلىپ، ئارالنى «مەغلۇپ بولغان دۆلەت» دەپ تەسۋىرلىشىدىن كېيىن ئوتتۇرىغا چىقتى. ترامپ بۇنىڭدىن ئىلگىرىمۇ كۇبانى «ئازاد قىلالايدىغانلىقى»نى ئىلگىرى سۈرگەن ئىدى.
كۇبا تاشقى ئىشلار مۇئاۋىن مىنىستىرى ئانايانسى رودرىگۇز كامېجو بولسا، دۆلىتىنىڭ سىياسىي سىستېمىسى ۋە رەھبەرلىكىنىڭ «سۆھبەتكە يېپىق» ئىكەنلىكىنى، ئەمما ئورتاق مەنپەئەتكە ئىگە ساھەلەردە دىيالوگقا ئوچۇق ئىكەنلىكىنى بىلدۈردى.
نۆۋەتتە كۇبا يېقىلغۇ قىسلىقى، توك توختاپ قېلىش ھەمدە يېمەك-ئىچمەك ۋە دورا-دەرمەك يېتىشمەسلىك بىلەن خاراكتېرلىنىدىغان ئېغىر ئىقتىسادىي كىرىزىسقا دۇچ كەلمەكتە. ھاۋانا دائىرىلىرى بۇ قىيىنچىلىقلارنى ئامېرىكانىڭ نەچچە ئون يىللىق جازاسىغا باغلىسا، ئامېرىكا ئەمەلدارلىرى بۇنىڭغا قۇرۇلمىلىق ئىقتىسادىي مەسىلىلەرنىڭ سەۋەب بولغانلىقىنى ئىلگىرى سۈرمەكتە.
