جۇمھۇر رەئىس رەجەپ تاييىپ ئەردوغان جۇمھۇر رەئىسلىك مەھكىمىسىدە فەنەر رۇم پاترىكى بارتھولومېئوس بىلەن كۆرۈشتى.
تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسىنىڭ ئاممىۋى ئورتاقلىشىش تور بېتىدىكى سەھىپىسىدە ئېلان قىلىنغان باياناتىدا بىلدۈرۈلۈشىچە، ئۇچرىشىشتا، فەنەر رۇم پاترىكى بارتھولومېئوس سۈرىيەدىكى بارلىق ئاز سانلىق مىللەتلەرنىڭ بىخەتەرلىكىنى كاپالەتكە ئىگە قىلىش توغرىسىدا جۇمھۇر رەئىس ئەردوغاندىن ياردەم تەلەپ قىلغان.
فەنەر رۇم پاترىكخانەسىىدىن ئېلان قىلىنغان باياناتتا ئەسكەرتىلىشىچە، فەنەر رۇم پاترىكى بارتھولومېئوس جۇمھۇر رەئىس ئەردوغان بىلەن سۈرىيەدىكى خىرىستىيانلارنىڭ ئەھۋالى، ئانتاكيە پاترىكخانەسى بىلەن بولغان تارىخىي مۇناسىۋەتلەر توغرۇلۇق سۆھبەتلەشكەن ھەمدە سۈرىيەدىكى بارلىق ئاز سانلىق مىللەتلەرنىڭ بىخەتەرلىكىنى كاپالەتكە ئىگە قىلىش توغرىسىدا ئەردوغاندىن ياردەم سورىغان.
باياناتتا تەكىتلىنىشىچە، بارتھولومېئوس ھەيبەلىئادا رۇھبان مەكتىپىنى قايتا ئېچىش توغرىسىدىكى خىزمەتلەرنىڭ باشلانغانلىقى ئۈچۈن جۇمھۇر رەئىس ئەردوغانغا رەھمەت ئېيتقان ھەمدە بۇ ھەقتىكى رەسمىيەتلەرنى تېزلىتىش جەھەتتە ياردەم سورىغان.
سۆھبەت جەريانىدا 2025-يىلى 1700 - يىللىقى تەبرىكلىنىدىغان بىرىنچى ئىزنىك قۇرۇلتىيى ۋە پاپا فرەنسىسنىڭ مۇراسىمغا قاتنىشىش ئۈچۈن تۈركىيەگە قىلىدىغان زىيارىتى ھەققىدە مۇزاكىرە ئېلىپ بېرىلغان.
