ئۇكرائىنا پىرېزىدېنتى ۋولودىمىر زېلېنىسكىي، كىيېۋ قىسىملىرىنىڭ دۆلەتنىڭ شەرقىدىكى مۇھىم تەمىنات مەركىزى بولغان پوكروۋىسك شەھىرى ئەتراپىدا كەسكىن توقۇنۇشلارغا دۇچ كېلىۋاتقانلىقىنى ۋە بۇ يەردە رۇسىيەنىڭ ھەر كۈنى دېگۈدەك ئىلگىرىلەۋاتقانلىقىنى بىلدۈردى.
زېلېنىسكىي ھەر كۈنلۈك كەچلىك سىنلىق نۇتۇقىدا، يۇقىرى دەرىجىلىك قوماندان ئولېكساندىر سىرسكىينىڭ يۇقىرى دەرىجىلىك ئەمەلدارلارغا ئەھۋال ھەققىدە دوكلات بېرىپ، پوكروۋىسكىنىڭ ھازىر ھەربىي ھەرىكەتلەرنىڭ ئاساسلىق فوكۇس نۇقتىسىغا ئايلانغانلىقىنى دەلىللىگەنلىكىنى بىلدۈردى.
زېلېنىسكىي: «بارلىق ھەرىكەت رايونلىرى كۆزدىن كەچۈرۈلدى، بولۇپمۇ پوكروۋىسكىغا ئالاھىدە ئەھمىيەت بېرىلدى. دىققەت ئەڭ يۇقىرى دەرىجىدە بۇ يەرگە مەركەزلەشتۈرۈلمەكتە» دېدى.
ئۇ يەنە، رۇسىيە كۈچلىرى يېقىندا چېگرادىن ئۆتۈپ، ئىلگىرىلەش ھاسىل قىلغان شىمالدىكى سۇمى ئوبلاستىدا، ئۇكرائىنا ئەسكەرلىرىنىڭمۇ «قارشى ھەرىكەتلىرىنى داۋاملاشتۇرۇۋاتقانلىقىنى» بىلدۈردى.
سىرسكىي تېلېگرامدا ئېلان قىلغان باياناتىدا، پوكروۋىسكى ۋە باشقا بەش ساھەنى 1000 كىلومېتىرلىق ئالدىنقى سەپتىكى ئەڭ مۈشكۈل فرونتلار دەپ ئاتىدى.
ئۇ: «رۇسىيە فېدېراتسىيەسى ‹يازلىق ھۇجۇم› ئۇرۇنۇشى ئۈچۈن ئەڭ ئېغىر بەدەل تۆلەۋاتىدۇ» دېدى.
ئايلاردىن بۇيان پوكروۋىسكىغا قاراپ ئىلگىرىلەۋاتقان رۇسىيە ئەسكەرلىرىنىڭ ھۇجۇمىغا ئۇچرىغان بۇ شەھەر، ئىلگىرى 60 مىڭغا يېقىن نوپۇسقا ئىگە ئىدى. ئۇ، مۇھىم قاتناش تۈگۈنى بولۇپلا قالماي، يەنە ئۇكرائىنانىڭ پولات-تۆمۈر سانائىتى ئۈچۈن ھاياتىي ئەھمىيەتكە ئىگە بىردىنبىر كۆك كۆمۈرى كېنىنىمۇ ئۆز ئىچىگە ئالىدۇ.
پۇقرالارنىڭ كۆپ قىسمى شەھەردىن تارقاقلاشتۇرۇلدى.
پەيشەنبە كۈنى رۇسىيە دۆلەت مۇداپىئە مىنىستىرلىقى، پوكروۋىسكىنىڭ غەربىدىكى زىۋىروۋ ۋە شەرقىدىكى نوۋوئېكونومىچنېنىڭ قولغا چۈشۈرۈلگەنلىكىنى ئېلان قىلدى. ھەپتە بېشىدا بولسا، يېقىن ئەتراپتىكى نوۋوتورېتسكېنى «ئازاد قىلغانلىقلىرىنى» ئىلگىرى سۈرگەن ئىدى.
ئۇكرائىنا ئارمىيەسى ھېچقانداق زېمىننىڭ قولدىن كەتكەنلىكىنى دەلىللىمىدى. باش ئىشتاب كەچلىك دوكلاتىدا، رۇسىيە قىسىملىرىنىڭ زىۋىروۋ ۋە نوۋوئېكونومىچنې ئەتراپىدىكى رايونلاردا ئاكتىپ ھۇجۇملىرىنى داۋاملاشتۇرۇۋاتقانلىقىنى بىلدۈردى.
يەنە بىر تەرەپتىن، پىرېزىدېنت ۋلادىمىر پۇتىن «تەڭپۇڭ رايون» قۇرۇشنى نىشان قىلىۋاتقان سۇمى ئوبلاستىدا ئۇكرائىنا ئارمىيەسىنىڭ ئىلگىرىلەپ ئورۇنلىشىۋالغانلىقى خەۋەر قىلىندى.
ئوچۇق مەنبەلىك ئىستىخباراتلاردىن پايدىلىنىدىغان «DeepState» ناملىق ھەربىي بىلوگ، ئۇكرائىنا ئەسكەرلىرىنىڭ كىندراتىۋكا يېزىسىنى قايتۇرۇۋالغانلىقىنى ئېيتتى.
بۇ ھەقتە ئۇكرائىنا ياكى رۇسىيە دائىرىلىرى تەرىپىدىن تېخىچە رەسمىي دەلىللەش ئېلان قىلىنمىدى.
قىيىن سۆھبەتلەر كۈتۈلمەكتە
شۇنىڭ بىلەن بىر ۋاقىتتا، رۇسىيە كېلەر ھەپتە ئىستانبۇلدا ئۇكرائىنا بىلەن ئۆتكۈزۈلىدىغان سۆھبەتنىڭ «ئىنتايىن قىيىن» بولىدىغانلىقى ھەققىدە ئاگاھلاندۇرۇپ، ئۈچ يىلدىن ئارتۇق داۋاملاشقان ئۇرۇشتا ئىلگىرىلەش بولۇش ئۈمىدىنى تۆۋەنلەتتى.
ھەر ئىككى دۆلەت ۋەكىللەر ئۆمىكى ئىستانبۇلغا قاراپ يولغا چىققان بولۇپ، سۆھبەتنىڭ كەچ سائەتلىرىدە باشلىنىشى مۆلچەرلەنمەكتە.
ماي ۋە ئىيۇن ئايلىرىدىكى ئىلگىرىكى سۆھبەتلەر پەقەت ئەسىر ئالماشتۇرۇش ۋە ئەسكەرلەرنىڭ جەسەتلىرىنى قايتۇرۇش بىلەنلا نەتىجىلەنگەن ئىدى.
كىرېمىل سارىيىنىڭ باياناتچىسى دىمىترىي پېسكوۋ «سۆھبەتنىڭ ئىنتايىن قىيىن بولىدىغانلىقى»نى، ھېچكىمنىڭ ئاسان بىر جەرياننى كۈتمەسلىكى كېرەكلىكىنى تەكىتلىدى.
