ئامېرىكادىكى خارۋارد، ستانفورد ئۇنىۋېرسىتېتلىرىنى ئۆز ئىچىگە ئالغان مىڭلىغان مائارىپ ئورۇنلىرى، ئىلگىرى يۈز بەرگەن بىر قېتىملىق سانلىق مەلۇمات بىخەتەرلىكى بوشلۇقىدىن كېيىن، كەڭ كۆلەملىك تور ھۇجۇمىغا دۇچ كەلدى.
كەم دېگەندە 2019-يىلىدىن بۇيان پائالىيەت قىلىۋاتقان ۋە تونۇلغان تور تاۋلىمىچىلىقى گۇرۇھى «شاينىيخانتېرس» ئۆزۈم قىلدىم دەپ ئېلان قىلغان پەيشەنبە كۈنىدىكى ھۇجۇم، «كانۋاس» ئۆگىنىش سۇپىسىنىڭ مۇلازىمىتىنىڭ ئۈزۈلۈپ قېلىشىنى كەلتۈرۈپ چىقاردى. مەزكۇر گۇرۇھ 8809 ئۇنىۋېرسىتېت، مەكتەپ رايونى ۋە توردا تەربىيەلەش سۇپىسىدىن 280 مىليون ئوقۇغۇچى ۋە خىزمەتچىنىڭ ئۇچۇرىنى قولغا چۈشۈرگەنلىكىنى ئىلگىرى سۈرمەكتە.
«خارۋارد كرىمسون» (Harvard Crimson) ئوقۇغۇچىلار گېزىتى ۋە ئىجتىمائىي تاراتقۇلاردا ھەمبەھرىلەنگەن ئۇچۇرلارغا ئاساسلانغاندا، سىستېمىغا كىرىشكە ئۇرۇنغان ئوقۇغۇچىلار خاككېرلارنىڭ «كانۋاس»نىڭ ئانا شىركىتى «Instructure»غا تەۋە مۇلازىمېتىرلارنى «قايتىدىن» بۇزۇپ كىرگەنلىكى ھەققىدىكى ئۇچۇرىنى كۆرگەن.
خاككېرلار: «مەسىلىنى ھەل قىلىش ئۈچۈن بىز بىلەن ئالاقىلىشىشنىڭ ئورنىغا، بىزگە پىسەنت قىلماي بىر قىسىم ‹بىخەتەرلىك ياماقلىرى›نى قىلدى. تىزىملىكتىكى مەكتەپلەرنىڭ قايسىبىرى ئۇچۇرلىرىنىڭ ئاشكارىلىنىپ كېتىشىنىڭ ئالدىنى ئېلىشنى خالىسا، بىر تور مەسلىھەتچىلىك شىركىتى بىلەن مەسلىھەتلىشىڭ ۋە كېلىشىم تۈزۈش ئۈچۈن بىز بىلەن ئالاھىدە ئالاقىلىشىڭ» دەپ بايانات بەردى. شۇنداقلا، ئەگەر مەكتەپلەر 12-مايغىچە ئالاقىلاشمىسا، ئوغرىلانغان بارلىق ئۇچۇرلارنى ئاشكارىلايدىغانلىقىنى ئېيتىپ ئاگاھلاندۇردى. ئۇچۇردا يەنە «شاينىيخانتېرس»نىڭ قولغا چۈشۈرگەنلىكىنى ئىلگىرى سۈرگەن مەكتەپلەرنىڭ تىزىملىك ئۇلىنىشىمۇ بار ئىدى.
كولۇمبىيە، رۇتگېرس، پرىنستون، كېنت ستات، خارۋارد ۋە جورجتاۋن قاتارلىق ئامېرىكا مىقياسىدىكى نۇرغۇن ئۇنىۋېرسىتېتلار، پۈتۈن مەملىكەتتىكى مائارىپ ئورۇنلىرىغا تەسىر كۆرسەتكەن تور ھۇجۇمى ھەققىدە ئوقۇغۇچىلارغا ئاگاھلاندۇرۇش بەردى. بۇ ۋەقە يەنە كالىفورنىيە، فلورىدا، جورجىيە، ئوكلاخوما، ئورېگون، نېۋادا، شىمالىي كارولىنا، تېننېسسى، يۇتا ۋە ۋىرگىنىيە ئىشتاتلىرىدىكى مەكتەپ رايونلىرىغىمۇ تەسىر كۆرسەتتى.
ستانفورد ئۇنىۋېرسىتېتى «كانۋاس»نىڭ «مۇلازىمەت بىلەن تەمىنلىگۈچى شىركەتتە كۆرۈلگەن بىر مەسىلە سەۋەبىدىن نۆۋەتتە ئىشلىتىشكە بولمايدىغانلىقىنى» بىلدۈرۈپ، «Instructure»نىڭ يېقىندا پۈتۈن مەملىكەت مىقياسىدا بىر ئۇچۇر بىخەتەرلىكى مەسىلىسىگە يولۇققانلىقىنى ۋە بۇنىڭ كونترول ئاستىغا ئېلىنغانلىقىنى ئەسكەرتتى. بىراق، ئۇنىۋېرسىتېت ستانفورد ۋە پۈتۈن مەملىكەتتىكى باشقا كۆپلىگەن مائارىپ ئورۇنلىرىنى ئۆز ئىچىگە ئالغان «كانۋاس» خېرىدارلىرىغا تەسىر كۆرسىتىۋاتقان يېڭى بىر تور ئۈزۈلۈپ قېلىش ۋەقەسىنىڭ بارلىقىنىمۇ قەيت قىلدى.
«Instructure» شىركىتى تۇنجى قېتىملىق بۇزۇپ كىرىشتە ئوغرىلانغان سانلىق مەلۇماتلارنىڭ ئىشلەتكۈچىلەر ئارىسىدىكى شەخسىي ئۇچۇرلاردىن سىرت، ئىسىم-فامىلە، ئېلېكترونلۇق خەت ئادرېسى ۋە ئوقۇغۇچى كىملىك نومۇرى قاتارلىق ئۇچۇرلارنى ئۆز ئىچىگە ئالىدىغانلىقىنى ئاشكارىلىدى.
