ھىندىستاننىڭ مېگالايا ئىشتاتىدىكى كۆمۈر كان پارتلاش ۋەقەسىدە قازا قىلغانلارنىڭ سانى 27 گە يەتتى، ئىزدەش خىزمەتلىرى داۋاملاشماقتا.
ئاممىۋى تارقىتىش ئورگىنى «All India Radio» نىڭ خەۋىرىگە قارىغاندا، ئىشتاتنىڭ شەرقىي جەينتىيا تاغلىق رايونىدىكى پارتلاشتىن كېيىن، ئىزدەش ۋە قۇتقۇزۇش خىزمەتلىرى «داۋاملىشىۋاتقان» جەرياندا تېخىمۇ كۆپ كىشىنىڭ جەسىتى تېپىلغان.
بۇنىڭدىن ئىلگىرى ئىشتات باش مىنىستىرى كونراد ساڭما پارتلاشنىڭ قانۇنسىز بىر كۆمۈر كانىدا يۈز بەرگەنلىكىنى ئېيتقان ئىدى.
ساڭما ھۆكۈمەتنىڭ ۋەقە بىلەن مۇناسىۋەتلىك «تولۇق بىر تەكشۈرۈش» باشلىغانلىقىنى بىلدۈردى.
ساقچى دائىرىلىرى ۋەقە ئۈستىدە تەكشۈرۈش باشلاش بىلەن بىرگە، پارتلاش بىلەن ئالاقىسى بار دەپ قارالغان ئىككى كىشىنى قولغا ئالدى.
«چاشقان تۆشۈكى تىپىدىكى كان» لار ئادەتتە تاغ باغرىغا قېزىلغان چوڭقۇر تىك قۇدۇقلاردىن تارتىپ چىقىرىلىدىغان ۋە تار تونېللارغا شاخلىنىپ كۆمۈر ۋە باشقا قېزىلما بايلىقلار ئېلىنىدىغان قۇرۇلمىلاردۇر.
ھىندىستاننىڭ فېدېراتسىيە مۇھىت ئاسراش سوت مەھكىمىسى، يەرلىك جەمئىيەتلەرنىڭ سۇ مەنبەلىرىنىڭ بۇلغانغانلىقى ۋە ھاياتىنىڭ خەتەرگە ئۇچرىغانلىقى ھەققىدىكى ئەرز-شىكايەتلىرىدىن كېيىن، 2014-يىلى مېگالايادا «چاشقان تۆشۈكى تىپىدىكى كانچىلىق» نى چەكلىگەن ئىدى.
بىراق بۇ خىل ئۇسۇل بولۇپمۇ شەرقىي جەينتىيا تاغلىق رايونىدا ۋە ئىشتات مىقياسىدا يەنىلا ئومۇملىشىپ كەلمەكتە.
رايونلۇق ساقچى ئىدارىسىنىڭ باشلىقى ۋىكاش كۇمار پەيشەنبە كۈنى، پارتلاشنىڭ دىنامىت سەۋەبىدىن يۈز بەرگەنلىك ئېھتىماللىقى بارلىقىنى ئېيتتى.
