لىۋان ئارمىيەسى بىرلەشكەن دۆلەتلەر تەشكىلاتىنىڭ لىۋاندا تۇرۇشلۇق ۋاقىتلىق تىنچلىق ساقلاش قىسمى بىلەن ماسلىشىپ، مۇداپىئە قىسىملىرىنى جەنۇبىي لىتانى رايونىغا ئورۇنلاشتۇرۇشقا باشلىغانلىقىنى بىلدۈردى.
لىۋان ئارمىيەسى تەرىپىدىن ئېلان قىلىنغان باياناتتا، جەنۇبىي لىتانى رايونىغا مۇداپىئە قىسىملىرىنى ئورۇنلاشتۇرۇش قارارىنىڭ «بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ 1701-نومۇرلۇق قارارى ۋە مۇناسىۋەتلىك مەجبۇرىيەتلەرنى ئىجرا قىلىش ۋەدىسىگە ئاساسلىنىدىغانلىقى» بىلدۈرۈلدى.
ئامېرىكا پىرېزىدېنتى جو بايدىن تۈنۈگۈن لىۋان بىلەن ئىسرائىلىيە ھۆكۈمەتلىرى ئوتتۇرىسىدا ئۇرۇش توختىتىش كېلىشىمى تۈزۈلگەنلىكىنى جاكارلىغانىدى.
بايدىن ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، ئىسرائىلىيە ۋە لىۋان باش مىنىستىرلىرى بىلەن سۆزلەشكەنلىكىنى، ھەر ئىككى تەرەپنىڭ «ئىسرائىلىيە بىلەن ھىزبۇللاھ ئوتتۇرىسىدىكى ۋەيران قىلغۇچى توقۇنۇشنى ئاخىرلاشتۇرۇش تەكلىپىنى قوبۇل قىلغانلىقىنى» بىلدۈرگەنىدى.
لىۋان بىلەن ئىسرائىلىيە ئوتتۇرىسىدىكى ئۇرۇش توختىتىش كېلىشىمىنىڭ 3-ماددىسىدا ئەسكەرتىشىچە، تەرەپلەر بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ 1701-نومۇرلۇق قارارىنى تولۇق ئىجرا قىلىش ئۈچۈن قەدەم تاشلايدىغانلىقى توغرۇلۇق ۋەدە بەرگەن بولۇپ، بۇ قارارنىڭ 5-ماددىسىدا مۇنداق دېيىلگەنىدى:
«لىۋاننىڭ رەسمىي ھەربىي ۋە بىخەتەرلىك كۈچلىرى، ھەربىي ئەسلىھەلىرى ۋە قورال - ياراغلىرى جەنۇبىي لىتانى رايونىغا ئورۇنلاشتۇرۇلىدۇ.»
