سۈرىيە پىرېزىدېنتى ئەھمەد شارا (شەرئ) يەكشەنبە كۈنى، بەشار ئەسەد ھاكىمىيىتىنى ئاغدۇرۇپ تاشلاشنىڭ پەقەت سۈرىيە ئۈچۈنلا ئەمەس، بەلكى تېخىمۇ كەڭ رايون ئۈچۈنمۇ زۆرۈر ئىكەنلىكىنى بىلدۈردى.
سۈرىيە ئەرەب خەۋەر ئاگېنتلىقى (SANA) نىڭ خەۋەر قىلىشىچە، قاتارغا جايلاشقان «ئەلجەزىرە» تېلېۋىزىيەسىنىڭ زىيارىتىنى قوبۇل قىلغان شارا سۈرىيەنى «رايوننىڭ مەركىزىي ئوقى» دەپ تەرىپلىگەن ھەمدە ئەسەد ھاكىمىيىتىنىڭ سۈرىيە خەلقىگە قارشى ئۆتكۈزگەن جىنايەتلىرى سەۋەبىدىن گۇمران بولىدىغانلىقىغا ئۇزۇندىن بۇيان ئىشىنىدىغانلىقىنى بىلدۈرۈپ: «كونا تۈزۈمنىڭ يوقىتىلىشى پەقەت سۈرىيە ئۈچۈنلا ئەمەس، بەلكى رايوننىڭ پۈتۈنلۈكى ئۈچۈنمۇ زۆرۈر ئىدى» دېگەن.
جەڭ مەيدانىدىن ھالقىغان تەدبىرلەر
شارا ئۆكتىچىلەرنىڭ پەقەت ھەربىي ھەرىكەتكىلا ئەمەس، بەلكى ئەسەد ئاغدۇرۇلغاندىن كېيىن دۆلەتنى باشقۇرۇشقا ۋە قايتا قۇرۇشقىمۇ تەييارلىق قىلغانلىقىنى ئېيتىپ: «ھەربىي ھەرىكەت بىزنىڭ خىزمەت ۋاسىتىلىرىمىزدىن بىرىدۇر، ئەمما ھەممە نەرسە ئەمەس. سىز يەنە ئۈنۈملۈك بىر ئاخبارات تەشۋىقاتىغا، ئاممىنىڭ قوللىشىغا، ئۈنۈملۈك بىر باشقۇرۇش سىستېمىسىغا ۋە ئورگانلارنى قۇرۇپ چىقىشقا، ئىقتىسادنى تەرەققىي قىلدۇرۇشقا شۇنداقلا ئىمكانىيەتلىك سىجىل تەرەققىيات ئۈچۈن شارائىت يارىتىشقا تەييار بولغان كەڭ كۆلەملىك بىر ئەترەتكە ئېھتىياجلىق بولىسىز» دېدى.
ئۆكتىچىلەرنىڭ ئىستراتېگىيەسىدە ئىتتىپاقلىقنىڭ مەركىزىي ئەھمىيەتكە ئىگە ئىكەنلىكىنى، ئۇنىڭ كۈرەش جەريانىدا بىر كۈچ مەنبەسى بولغانلىقىنى ئېيتقان شارا؛ ئىلگىرىكى چېكىنىشلەر ۋە چەكلىك بايلىقلارنىڭ ئۆزلىرىگە قىممەتلىك ساۋاقلارنى بەرگەنلىكىنى، بۇنىڭ ئۆزىنى دەمەشىق ئىچىدىن ھاكىمىيەتنى ئاغدۇرۇشقا قارىتىلغان تىرىشچانلىقلارنى تەشكىللەشكە، شۇنداقلا ئۆكتىچىلەرنىڭ كونتروللۇقىدىكى رايونلاردا ئورگانلارنى قۇرۇپ چىقىشقا يېتەكلىگەنلىكىنى سۆزلىرىگە ئىلاۋە قىلدى.
ئىدلىب بىر مودېل
سۈرىيە پىرېزىدېنتى ئۆزلىرىنىڭ ھېچقانداق تاشقى ياردەم ئالمىغانلىقىنى؛ بۇنىڭ ئورنىغا كېيىنچە ئەسەدنى ئاغدۇرغان ھۇجۇمنىڭ باشلىنىش نۇقتىسىغا ئايلانغان غەربىي شىمالدىكى ئىدلىب ۋىلايىتىدە تەڭپۇڭ بىر يەرلىك ئىقتىسادنى تەرەققىي قىلدۇرۇشقا ئەھمىيەت بەرگەنلىكىنى بىلدۈردى.
«قورشاۋ ئاستىدىكى بىر رايوندا، كۈچلۈك بېسىم ئاستىدا پائالىيەت ئېلىپ بېرىۋاتقان بولۇشىمىزغا قارىماي، ئۇرۇشقا، قايتا قۇرۇشقا ۋە ئىقتىسادقا ئوخشاشلا ئەھمىيەت بەردىم» دېگەن شارا، ئۆكتىچى ئەمەلدارلارنىڭ ئىدلىبتا ئاممىۋى ئورگانلارنى، ئۇنىۋېرسىتېتلارنى، ئاخبارات ئورگانلىرىنى، سانائەت رايونلىرى ۋە ئاساسىي قۇرۇلۇشلارنى قۇرۇپ چىقىش بىلەن بىرگە، خەلقنىڭ تۇرمۇش سەۋىيەسىنىمۇ ئۆستۈرگەنلىكىنى ئېيتتى.
«بىز ھەتتا ئىدلىبتا تۇرمۇش سەۋىيەسى جەھەتتىمۇ كونا تۈزۈمنى ئارقىدا قالدۇردۇق» دېگەن پىرېزىدېنت شارا؛ ئۆزىنىڭ شەخسىي ۋە سىياسىي مۇساپىسى ھەققىدىمۇ توختىلىپ، ئائىلىسىنىڭ يىلتىزىنىڭ ئىشغالىيەت ئاستىدىكى گولان تۆپىلىكلىرىگە تۇتىشىدىغانلىقىنى، بۇنىڭ ئۆز كىملىكىنى شەكىللەندۈرگەنلىكىنى ھەمدە ئەرەب مىللەتچىلىك ئىدىيەسى بىلەن ئىسلامىي تەپەككۇرنىڭ ئۆزىگە يېقىندىن تەسىر كۆرسەتكەنلىكىنى ئىپادىلىدى.
شارا زىيارەتنىڭ ئاخىرىدا سۈرىيەنى مەدەنىيەتنىڭ بۆشۈكى دەپ تەرىپلەپ: «مەن ئىنسانىيەتنىڭ دەل مۇشۇ يەردە، يەنى سۈرىيەدە باشلانغانلىقىغا ئىشىنىمەن، بىز دەمەشىقنىڭ ئالدىدا تۇرغىنىمىزدا، ئەمەلىيەتتە ئىنسانىيەت مەدەنىيىتى بۆشۈكىنىڭ ئالدىدا تۇرغان بولىمىز» دېگەنلەرنى قەيت قىلدى.
