مۇسۇلمان رەھبەرلەر غەززەدىكى ئۇرۇشنىڭ داۋاملىشىشىنىڭ رايوننىڭ مۇقىمسىزلىقىنى كەلتۈرۈپ چىقىرىدىغانلىقىدىن ئاگاھلاندۇرۇش بىلەن بىرگە، ترامپتىن دەرھال ئۇرۇش توختىتىش، ياردەم بۇيۇملىرىنى يەتكۈزۈش ۋە پەلەستىن دۆلىتى ئۈچۈن يول خەرىتىسىنى قوللاشنى تەلەپ قىلدى.
«Politico» ژۇرنىلىنىڭ نىڭ بۇنىڭغا مۇناسىۋەتلىك ئالتە كىشىدىن نەقىل كەلتۈرۈشىچە، ئامېرىكا پىرېزىدېنتى دونالد ترامپ مۇسۇلمان رەھبەرلەرگە ئىسرائىلىيەنىڭ ئىشغالىيىتى ئاستىدىكى غەربىي قىرغاقنى قوشۇۋېلىشىغا يول قويمايدىغانلىقىغا كاپالەت بەرگەن.
ترامپ بۇ ۋەدىنى نيۇ-يوركتىكى بىرلەشكەن دۆلەتلەر تەشكىلاتى ئومۇمىي كېڭىشى يىغىنى ئارىلىقىدا ئۆتكۈزۈلگەن يېپىق يىغىندا بەردى. يىغىندا ئەرەب ۋە مۇسۇلمان رەھبەرلەر ۋاشىنگتونغا ئىسرائىلىيەنىڭ غەززەدىكى ئۇرۇشىنى ئاخىرلاشتۇرۇشنى ئالدىنقى ئورۇنغا قويۇش ئۈچۈن بېسىم ئىشلەتتى.
«Politico» ترامپ گۇرۇپپىسىنىڭ قوشۇۋېلىشقا قارشى تۇرۇش ۋەدىسىنى ئۆز ئىچىگە ئالغان ھۆكۈمەتنىڭ توقۇنۇشنى توختىتىش پىلانىنى خۇلاسىلىگەن بىر ھۆججەتنى تارقاتقانلىقىنى ئىلگىرى سۈردى.
قاتار ئەمىرى شەيخ تەمىم بىن ھەماد ئەل سانى رىياسەتچىلىك قىلغان يىغىنغا، تۈركىيە جۇمھۇر رەئىسى رەجەپ تاييىپ ئەردوغان، ئىئوردانىيە پادىشاھى 2-ئابدۇللا، ھىندونېزىيە پىرېزىدېنتى پرابوۋو سۇبىيانتو، پاكىستان باش مىنىستىرى شاھباز شەرىف، مىسىر باش مىنىستىرى مۇستافا مەدبۇلى، ئەرەب بىرلەشمە خەلىپىلىكى تاشقى ئىشلار مىنىستىرى شەيخ ئابدۇللا بىن زەيىد ئەل نەھيان ۋە سەئۇدى ئەرەبىستان تاشقى ئىشلار مىنىستىرى شاھزادە فەيسەل بىن فەرھان قاتناشتى.
«ئادىل ۋە مەڭگۈلۈك تىنچلىقنى ئىشقا ئاشۇرۇش»
رەھبەرلەر رىياد تەرىپىدىن ئېلان قىلىنغان ئورتاق باياناتتا، غەززە ئۇرۇشىنى ئاخىرلاشتۇرۇشنىڭ «ئادىل ۋە مەڭگۈلۈك تىنچلىققا ئېرىشىشنىڭ بىرىنچى قەدىمى» ئىكەنلىكىنى بىلدۈرۈش بىلەن بىرگە، «چىدىغۇسىز ئىنسانىي ئاپەت» ۋە پۇقرالارنىڭ ئېغىر تالاپىتى ھەققىدە ئاگاھلاندۇردى.
غەززە سەھىيە دائىرىلىرى 2023-يىلى ئۆكتەبىردىن بۇيان 65 مىڭدىن ئارتۇق پەلەستىنلىكنىڭ ھاياتىدىن ئايرىلغانلىقىنى خەۋەر قىلدى.
پەلەستىنلىكلەرنىڭ مەجبۇرىي كۆچۈرۈلۈشىنى رەت قىلغان رەھبەرلەر، يۇرت-ماكانلىرىدىن ئايرىلغان ئاھالىلەرنىڭ قايتىپ كېلىشىگە ۋە ئىنسانپەرۋەرلىك ياردىملىرىنىڭ توسالغۇسىز يەتكۈزۈلۈشىگە شارائىت ھازىرلايدىغان جىددىي ئۇرۇش توختىتىشنى تەلەپ قىلدى.
ئۇلار يەنە ئىشغالىيەت ئاستىدىكى غەربىي قىرغاق ۋە قۇددۇستىكى مۇقەددەس جايلارنى ئۆز ئىچىگە ئالغان مۇقىم يول خەرىتىسى، پەلەستىن ھۆكۈمىتى ئىچىدە ئىسلاھات ئېلىپ بېرىش ۋە ئەرەب دۆلەتلىرى بىلەن ئىسلام ھەمكارلىق تەشكىلاتىنىڭ قوللىشى ئاستىدا غەززەنى ئومۇميۈزلۈك قايتا قۇرۇش پىلانىنى تۈزۈشنى تەلەپ قىلدى.
بىرلەشكەن دۆلەتلەر تەشكىلاتى تەتقىقاتچىلىرى يېقىندا ئىسرائىلىيەنىڭ غەززەدە ئىرقىي قىرغىنچىلىق يۈرگۈزگەنلىكىنى ۋە يىللارچە داۋاملاشقان بومباردىماندىن كېيىن رايوننىڭ كۆپ قىسمىنىڭ ئىنسان تەرىپىدىن پەيدا قىلىنغان ئاچارچىلىق ۋە ۋەيرانچىلىققا دۇچ كەلگەنلىكىنى ئېلان قىلدى.
