ئامېرىكا پىرېزىدېنتى يەنە، ۋاشىنگتوننىڭ جەنۇبىي كورېيەنىڭ يادرو كۈچى بىلەن ھەرىكەتلىنىدىغان سۇ ئاستى پاراخوتى ياسىشىغا ماقۇللۇق بىلدۈرگەنلىكىنى سۆزلىرىگە ئىلاۋە قىلدى.
دونالد ترامپ جەنۇبىي كورېيەنىڭ ئامېرىكا بىلەن كەڭ دائىرىلىك ئىقتىسادىي ۋە مۇداپىئە پىلانى توغرىسىدا كېلىشىم ھاسىل قىلغانلىقىنى جاكارلىدى.
ترامپ پەيشەنبە كۈنى «ھەقىقەت ئىجتىمائىي تاراتقۇ» سۇپىسىدا بايانات بېرىپ مۇنداق دېدى: «جەنۇبىي كورېيە ئامېرىكانىڭ ئۆزىگە قارىتا يولغا قويغان تاموژنا بېجىنى تۆۋەنلىتىشى بەدىلىگە ئامېرىكاغا 350 مىليارد دوللار تۆلەشنى قوبۇل قىلدى.»
ترامپ يەنە، جەنۇبىي كورېيەنىڭ ئامېرىكادىن كەڭ كۆلەمدە نېفىت ۋە تەبىئىي گاز سېتىۋېلىشقا قوشۇلغانلىقىنى، ھەمدە جەنۇبىي كورېيە شىركەتلىرى بىلەن سودىگەرلىرىنىڭ ئامېرىكاغا سالىدىغان مەبلىغىنىڭ 600 مىليارد دوللاردىن ئاشىدىغانلىقىنى بىلدۈردى.
ئامېرىكا رەھبىرى مۇنداق دېدى: «ھەربىي ئىتتىپاقىمىز ئىلگىرىكىدىن تېخىمۇ كۈچلۈك بولۇپ، بۇ ئاساستا، كونا تىپتىكى ۋە ئانچە تېز بولمىغان دىزېل ماتورلۇق سۇ ئاستى پاراخوتلىرىنىڭ ئورنىغا، يادرو ئېنېرگىيەلىك سۇ ئاستى پاراخوتى ياساش ئۈچۈن ماقۇللۇق بەردىم.»
ترامپ چۈشەنبە كۈنى جەنۇبىي كورېيەدە پىرېزىدېنت لى جې-ميۇڭ بىلەن ئۆتكۈزگەن ئۇچرىشىشىدا، جەنۇبىي كورېيە بىلەن ئۇزۇن ۋاقىتتىن بۇيان ئىمزالىنىشى كۈتۈلۈۋاتقان بىر سودا كېلىشىمىنىڭ «تۈگىشىگە ئاز قالغانلىقىنى» ئېيتقان، بىراق رەھبەرلەر ھەل قىلغۇچ بىر كېلىشىمنىڭ ھاسىل قىلىنغانلىقىنى ئېنىق بىلدۈرۈشتىن ئۆزلىرىنى قاچۇرغانىدى.
