فىنلاندىيەنىڭ غەربىي جەنۇبىدىكى ياۋرو ئايرودرومى ئەتراپىدىكى ئورمانلىقتا ئىككى تىك ئۇچار ھاۋا  بوشلۇقىدا سوقۇلۇپ كېتىپ بەش كىشى قازا قىلدى.

ساقچىلار سوقۇلۇش ۋەقەسىنىڭ شەنبە كۈنى چۈشتىن كېيىن كاۋتۇئا بازىرىغا يېقىن جايدا يۈز بەرگەنلىكى،  تىك ئۇچارنىڭ ئوخكۇلكۇتيې يولىدىن 700 مېتىر يىراقلىققا چۈشكەنلىكىنى بىلدۈردى.

فىنلاندىيە بۇ ھەقتە  رەسمىي بايانات ئېلان قىلدى. دۆلەتلىك تەكشۈرۈش ئىدارىسىنىڭ باش مۇپەتتىشى جوھاننىس سىيرىلا: «شەنبە كۈنى ياۋرو ئايرودورومىغا يېقىن جايدا يۈز بەرگەن تىك ئۇچار ۋەقەسىدە بەش كىشى ھاياتىدىن ئايرىلدى» دېدى.

ساقچىلار ئۇچۇش پىلانىغا ئاساسەن، بىر تىك ئۇچاردا ئىككى ئكىشى ، يەنە بىرىدە ئۈچ كىشى بارلىقىنى، ھەر ئىككى تىك ئۇچارنىڭ فىنلاندىيە رۇيخەتكە ئالدۇرۇلغان تىك ئۇچار ئىكەنلىكىنى  بىلدۈردى.  ئېستونىيە ئاممىۋى رادىئو شىركىتى (ERR) نىڭ فىنلاندىيەنىڭ خېلسىنگىن سانومات گېزىتىدىن نەقىل كەلتۈرگەن خەۋىرىگە ئاساسلانغاندا، تىك ئۇچارلارنىڭ بىرسى ئېستونىيەدە، يەنە بىرسى ئاۋىستىرىيەدە رۇيخەتكە ئېلىنغان.

ئىگىلىنىشچە، ھەر ئىككى تىك ئۇچار ئېستونىيە شىركەتلىرىگە تەۋە بولۇپ، ئۇلاردىن بىرسى نوبە شىركىتىگە، يەنە بىرسى ئېلىئون شىركىتىگە تەۋە ئىكەن. «Yle News» نىڭ خەۋەر قىلىشىچە، تىك ئۇچارلار قىزىقارلىق ئاۋىئاتسىيە پائالىيىتىگە قاتنىشىش ئۈچۈن يولغا چىققان ئىكەن.

فىنلاندىيە دۆلەتلىك تەكشۈرۈش ئىدارىسى يەرلىك ساقچىلار بىلەن بىرلىكتە تەكشۈرۈش ئېلىپ بارماقتا، فىنلاندىيە ۋە ئېستونىيە دائىرىلىرى ۋەقەنىڭ پەردە ئارقىسىنى ئايدىڭلاشتۇرۇش ئۈچۈن ھەمكارلاشماقتا.