ئۇكرائىنا پىرېزىدېنتى ۋولودىمىر زېلېنسكىي ئامېرىكا پىرېزىدېنتى دونالد ترامپ بىلەن كۆرۈشكەندىن كېيىن، ياۋروپا رەھبەرلىرى بىلەن مەسلىھەتلىشىدىغانلىقىنى بىلدۈردى.
زېلېنسكىي يەكشەنبە كۈنى دىپلوماتىك جەھەتتىن مۇھىم دپ قارالغان خىزمەتلەر مەسىلىسىدە ماس قەدەمدە ھەرىكەت قىلىش ئۈچۈن ئۇكرائىنانىڭ بىرنەچچە ئىتتىپاقدىشى بىلەن كۆرۈشكەنلىكىنى قەيت قىلدى. ئۇ ئاممىۋى ئورتاقلىشىش تور بېتى تېلېگرام سەھىپىسىدە ئېلان قىلغان باياناتىدا: «ئەتە پىرېزىدېنت ترامپ بىلەن ئىشقا ئاشۇرۇلىدىغان ئۇچرىشىشتىن كېيىن مەسلىھەتلىشىشنى داۋاملاشتۇرىمىز» دېدى.
زېلېنسكىي ئىتتىپاقداشلىرى بىلەن كۆرۈشتى ۋە ترامپ بىلەن بىر يەرگە جەم بولۇشتىن ئىلگىرى، رۇسىيەنىڭ پايتەختكە قارىتا ئېلىپ بارغان ئەڭ يېڭى باشقۇرۇلىدىغان بومبا ۋە ئۇچقۇچىسىز ھاۋا ئاپپاراتى ھۇجۇملىرىدىن كېيىن كىيېۋنى يەنە بىر قېتىم قوللايدىغانلىقىغا قارىتا ئىتتىپاقداشلىرىدىن ۋەدىلەرنى ئالدى.
ترامپ بىلەن كۆرۈشۈش ئۈچۈن فىلورىداغا قاراپ يولغا چىققان ئۇكرائىنا پىرېزىدېنتى زېلېنسكىي كانادادا توختاپ، ئالدى بىلەن كانادا باش مىنىستىرى مارك كارنىي بىلەن كۆرۈشتى. ئاندىن تور يىغىدا ياۋروپا ئىتتىپاقى، ناتو ۋە ياۋروپا رەھبەرلىرىگە مەلۇمات بەردى. گېرمانىيە باش مىنىستىرى فىرىدرىخ مېرزنىڭ بىلدۈرۈشىچە، رەھبەرلەر ئۇنىڭغا «ئۇكرائىنانى تولۇق قوللايدىغانلىقىنى» بىلدۈرگەن.
ياۋروپا ئىتتىپاقى كومىتېتىنىڭ رەئىسى ئۇرسۇلا فون دېر لېيېن ئاممىۋى ئورتاقلىشىش تور بېتىدە ئېلان قىلغان باياناتىدا، ئۇكرائىنانىڭ ئىگىلىك ھوقۇقى ۋە زېمىن پۈتۈنلىكىنى قوغدايدىغان «ئادالەتلىك ۋە ئۇزۇن مۇددەتلىك بىر تىنچلىقنى» خۇشاللىق بىلەن قارشى ئالىدىغانلىقىنى بىلدۈردى.
رۇسىيە بولسا ئۇكرائىنا ۋە ياۋروپالىق قوللىغۇچىلىرىنى توقۇنۇشنى توختىتىشقا قارىتا ئىلگىرى ئامېرىكانىڭ ۋاسىتىسى ئارقىلىق تەييارلانغان پىلاننى «بۇزۇش» بىلەن ئەيىبلىدى.
رۇسىيە ئۇرۇش مەيدانىدىكى بېسىمنى كۈچەيتىپ، ئۇكرائىنانىڭ شەرقىدىكى مىرنوگراد ۋە گۇليايپولودىن ئىبارەت يەنە ئىككى شەھەرنى كونتروللۇقى ئاستىغا ئالغانلىقىنى جاكارلىدى.
رۇسىيە پىرېزىدېنتى ۋلادىمىر پۇتىن: « كىيېۋدىكى دائىرىلەر بۇ مەسىلىنى تىنچ يول بىلەن ھەل قىلىشنى خالىمىسا، ئالدىمىزدىكى بارلىق مەسىلىلەرنى ھەربىي ۋاسىتىلەر ئارقىلىق ھەل قىلىمىز» دېدى.
