تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر-ئالاقە ئىدارىسىنىڭ ئۇقتۇرۇشىچە، مۇداپىئە سانائىتى ئىجرائىيە كومىتېتى جۇمھۇر رەئىس رەجەپ تاييىپ ئەردوغاننىڭ رىياسەتچىلىكىدە يىغىن ئاچقان. چارشەنبە كۈنى ئېلان قىلىنغان باياناتتا قەيت قىلىنىشىچە، كېڭەش 2026-يىللىق تۇنجى يىغىنىدا تۈركىيە مۇداپىئە سانائىتىنىڭ 2025-يىلى قولغا كەلتۈرگەن نەتىجىلىرى، ئېكسپورت جەھەتتىكى ئۇتۇقلىرى، كەلگۈسى نىشانلىرى ۋە ئاچقۇچلۇق تۈرلەر ھەققىدە مۇھاكىمە ئېلىپ بارغان.
باياناتتا مۇداپىئە سانائىتىنىڭ ئېكسپورت مۇۋەپپەقىيەتلىرى، كەلگۈسى پىلانلىرى ۋە ئىستراتېگىيەلىك تۈرلەر مۇزاكىرە قىلىنغان بولۇپ، يەرلىك ۋە مىللىي مۇداپىئە سانائىتىنى قوللاش جەھەتتىكى قەتئىي ئىرادە يەنە بىر قېتىم تەكىتلەنگەن. شۇنىڭ بىلەن بىر ۋاقىتتا، مىللىي مۇداپىئە ۋە ئىچكى ئىشلار مىنىستىرلىقلىرىنىڭ ئېھتىياجىغا ئاساسەن، نۆۋەتتە داۋاملىشىۋاتقان ۋە يېڭىدىن يولغا قويۇلىدىغان تۈرلەر مۇزاكىرە قىلىنىپ، مۇناسىۋەتلىك قارارلار چىقىرىلغان.
ئۇچۇر-ئالاقە ئىدارىسى تۈركىيە مۇداپىئە سانائىتىنىڭ نەتىجىلىرىنى «مىللەت ۋە دۆلەتنىڭ كۈچلۈك قوللىشى»نىڭ مەھسۇلى دەپ باھالاپ، بۇنىڭدىن سۆيۈنگەنلىكىنى بىلدۈردى. 2026-يىلى خىزمەتلەرنىڭ تېخىمۇ يۇقىرى غەيرەت بىلەن داۋاملىشىدىغانلىقى تەكىتلەنگەن باياناتتا، يەرلىك ۋە مىللىي تېخنىكىلارغا تايىنىش ئارقىلىق مۇداپىئە سانائىتىدىكى ئۈلگىلىك تەرەققىياتنىڭ قەتئىيلىك بىلەن داۋاملاشتۇرۇلىدىغانلىقى تىلغا ئېلىندى ۋە يىغىندا قوبۇل قىلىنغان قارارلارنىڭ جامائەتچىلىككە ئاشكارىلانغانلىقى قەيت قىلىندى.
