ئامېرىكا پىرېزىدېنتى دونالد ترامپ ئۆزىنىڭ «ترۇس سوشىئال» (Truth Social) ئىجتىمائىي تاراتقۇ ھېسابىدا ئېلان قىلغان باياناتىدا، ئامېرىكانىڭ يېتەرلىك ھەربىي زاپىسى يوق دېگەن دەۋالارغا قارشى چىقتى. ئۇ ئامېرىكانىڭ ھەربىي قۇدرىتىنى تەكىتلەپ مۇنداق دېدى: «ئامېرىكانىڭ، بولۇپمۇ مەلۇم تۈردىكى ئوق-دورىلاردىن ئىنتايىن كۆپ مىقداردا زاپىسى بار. بۇنىڭدىن باشقا، ئېھتىياج تۇغۇلغان ھامان كۆپ مىقداردا ئىشلەپچىقىرىلىپ، ئارمىيەگە يەتكۈزۈلۈۋاتىدۇ».
ھەربىي سانائەت شىركەتلىرىنىڭ ئامېرىكا تارىخىدىكى ئەڭ كۆپ ساندا زاۋۇت ۋە ئەسلىھەلەرنى قۇرۇۋاتقانلىقىغا دىققەتنى تارتقان ترامپ، مەخپىي ئۇچۇرلارنى باشقىلارغا ئاشكارىلىۋەتكەنلەرگە قارىتا قاتتىق تەدبىر ئېلىنىدىغانلىقىنى ئاگاھلاندۇرۇپ مۇنداق دېدى: «بۇ خائىنلارچە باياناتلارنى سىرتقا ئاشكارىلىغانلار ئىز قوغلاپ تۇتۇلىدۇ. ئۇلارغا ئۇزۇن مۇددەتلىك قاماق جازاسى بېرىلىشى تەلەپ قىلىنىدۇ».
