سەئۇدى ئەرەبىستان پۇقرالار مۇداپىئە باش ئىدارىسى X ئىجتىمائىي تاراتقۇ سۇپىسىدىكى ئادرېسى ئارقىلىق بايانات ئېلان قىلىپ، خەمىس مۇشەيت، ئەبھا، جازان ۋە نەجران شەھەرلىرىدە يۈز بېرىش ئېھتىمالى بولغان جىددىي ئەھۋاللارغا قارىتا ئاگاھلاندۇرۇش چىقاردى.
باياناتتا رايوندىكى پۇقرالار ۋە ئاھالىلەرنىڭ ھاياتى ۋە مال-مۈلكىنىڭ بىخەتەرلىكىنى قوغداش ئۈچۈن، جىددىي ھالەت تەرتىپلىرىگە رىئايە قىلىشى، ئالاقىدار دائىرىلەرنىڭ كۆرسەتمە ۋە ئاگاھلاندۇرۇشلىرىغا يېقىندىن دىققەت قىلىشىنىڭ مۇھىملىقى تەكىتلەندى.
ئەمما يوشۇرۇن خەۋپنىڭ تۈرى ياكى تەپسىلاتى ھەققىدە ھېچقانداق ئۇچۇر بېرىلمىدى.
سەئۇدى ئەرەبىستان باشچىلىقىدىكى ئەرەب ئىتتىپاقىنىڭ يەمەندە ھۇسىيلارغا قارشى ئېلىپ بېرىۋاتقان ھەربىي ھەرىكەتلىرىگە جاۋابەن، ھۇسىيلار سەئۇدى ئەرەبىستاننىڭ چېگرا رايونلىرى ۋە جەنۇبىي ۋىلايەتلىرىنى پات-پات ھۇجۇم قىلماقتا.
رايوندىكى ھەربىي رايونلار ۋە ئىستراتېگىيەلىك مۇھىم ئەسلىھەلەر بەزىدە يەمەن چېگراسىدىن قويۇپ بېرىلگەن ئۇچقۇچىسىز ھاۋا ئاپپاراتلىرى ۋە باللىستىك باشقۇرۇلىدىغان بومبىلارنىڭ ھۇجۇمىغا ئۇچراپ كەلمەكتە.
