ئۇكرائىنا دائىرىلىرىنىڭ ئاشكارىلىشىچە، ئۇكرائىنانىڭ پايتەختى كىيېۋ رۇسىيەنىڭ ئۇچقۇچىسىز ھاۋا ئاپپاراتلىرى ۋە باشقۇرۇلىدىغان بومبىلىرىنىڭ كەڭ كۆلەملىك ھۇجۇمىغا ئۇچرىغان.
كىيېۋ باش ئىشتاب باشلىقى تىمۇر تىكاچېنكو پەيشەنبە كۈنى ئەتىگەن تەرەپلەردە چۈشكەن ئۇچقۇچىسىز ھاۋا ئاپپاراتى پارچىلىرىنىڭ، شەھەرنىڭ ئوخشىمىغان مەھەللىلىرىدىكى تۇرالغۇ بىنالىرىنى ئۆز ئىچىگە ئالغان بىرنەچچە بىناغا تەگكەنلىكىنى ئېيتتى.
كىيېۋ شەھەر باشلىقى ۋىتالى كلىتچكومۇ پايتەختنىڭ ئاممىۋى ئورتاقلىشىش تور بېتى تېلېگرام سەھىپىسىدە ئېلان قىلغان باياناتىدا، پايتەختنىڭ رۇسىيەنىڭ قويۇق ھۇجۇمى ئاستىدا قالغانلىقىنى بىلدۈرۈپ، «دۈشمەن كىيېۋنى ئۇچقۇچىسىز ھاۋا ئاپپاراتلىرى ۋە باللىستىك بومبىلار بىلەن ئوققا تۇتماقتا، پايتەخت دۈشمەننىڭ قويۇق ھۇجۇمى ئاستىدا» دېدى.
كلىتچكو پەيشەنبە كۈنى كىيېۋغا قىلىنغان ھۇجۇملارنىڭ بەش قەۋەتلىك بىر تۇرالغۇ بىناسىغا زىيان يەتكۈزگەنلىكىنى ۋە توختىتىپ قويۇلغان بىر ئاپتوموبىلغا ئوت كېتىشىگە سەۋەب بولغانلىقىنى تىلغا ئېلىپ، راكېتا پارچىلىرىنىڭ يەنە بىر «غەيرىي تۇرالغۇ بىناسى» غىمۇ تەگكەنلىكىنى ئەسكەرتتى.
رەسمىي بولمىغان تېلېگرام سەھىپىلىرىدە ئولتۇراق بىنالارنىڭ بەزى قىسىملىرىنىڭ يالقۇن ئىچىدە قالغانلىقىنى كۆرسىتىدىغان ۋىدېيولار ھەمبەھرىلەنگەن بولسىمۇ، لېكىن جانغا زامىن بولۇش ئەھۋالى مەلۇم قىلىنمىدى.
ئۇكرائىنا ھاۋا ئارمىيەسى يەنە رۇسىيەنىڭ باشقۇرۇلىدىغان بومبىلىرىنىڭ شىمالدىكى خاركىۋ، سۇمى ۋە چېرنىخىۋ بىلەن مەركىزىي قىسىمدىكى پولتاۋا رايونى قاتارلىق دۆلەتنىڭ باشقا جايلىرىنىمۇ نىشان قىلغانلىقىنى بىلدۈردى.
