ۋاشىنگتون پوچتا (WP) گېزىتى ئىسمىنى ئاشكارىلاشنى خالىمىغان بىر يۇقىرى دەرىجىلىك ھۆكۈمەت ئەمەلدارىنىڭ سۆزىنى نەقىل كەلتۈرۈپ ئېلان قىلغان خەۋىرىدە، ئامېرىكا پىرېزىدېنتى دونالد ترامپ ھۆكۈمىتىنىڭ ئىسرائىلىيەگە يېقىنقى تارىختىكى ئەڭ چوڭ قورال سېتىش سودىسىنىڭ بىرىگە تەييارلىق قىلىۋاتقانلىقىنى خەۋەر  قىلدى.

خەۋەردە ئېيتىلىشىچە، ئامېرىكا ھۆكۈمىتى ھەر بىرىنىڭ ئېغىرلىقى تەخمىنەن بىر توننا كېلىدىغان 20 مىڭ دانە «MK-84» ۋە 20 مىڭ دانە «BLU-117» تىپلىق بومبىنىڭ ئىسرائىلىيەگە سېتىلىشىغا يېشىل چىراغ ياققان. شۇنىڭ بىلەن بىر ۋاقىتتا، مەزكۇر پىلان دائىرىسىدە يەنە 20 مىڭ دانە «I-2000 Penetrator» تىپلىق ئوق بېشىنى سېتىپ بېرىشنىڭمۇ تەستىقلىنىشى كۈتۈلمەكتە.

ئەگەر بۇ سودا ئىشقا ئاشسا، يېقىنقى يىللاردىن بۇيان بىر قېتىمدىلا سېتىلغان ئەڭ چوڭ ئوق-دورا سودىسى بولۇپ قالىدۇ. مەزكۇر بومبىلارنىڭ ئومۇمىي قىممىتى 2 مىليارد 800 مىليون دوللار دەپ قارالماقتا.

ئىسرائىلىيەنىڭ غەززەدىكى ئىرقىي قىرغىنچىلىقىدا كۆپ قېتىم قوللانغان «MK-84» تىپلىق بومبىلار ۋەيران قىلىش كۈچىنىڭ يۇقىرىلىقى بىلەن تونۇلغان بولۇپ، پارتلىغاندىن كېيىن پارچىلىرى يۈزلىگەن مېتىر يىراقلىققا تارقىلىدۇ، مېتال ۋە قېلىن بېتونلارنى تېشىپ ئۆتۈش ئىقتىدارىغا ئىگە ھەمدە يەر يۈزىدە چوڭ ئورەكلەرنى پەيدا قىلىدۇ.

ترامپ ھۆكۈمىتى 2025-يىلى دۆلەت مەجلىسىنىڭ تەكشۈرۈش مۇساپىسىدىن ئايلىنىپ ئۆتۈپ، ئىسرائىلىيەگە 2 مىليارد 40 مىليون دوللار قىممىتىدىكى قورال سېتىشنى تەستىقلىغان ئىدى.