تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان ئەزەربەيجاننىڭ مۇستەقىللىق كۈنى پائالىيەتلىرىگە قاتنىشىش ئۈچۈن ئەزەربەيجاننىڭ لاچىن شەھىرىدە زىيارەتتە بولدى.
جۇمھۇر رەئىس ئەردوغاننىڭ چارشەنبە كۈنى ئەزەربەيجان جۇمھۇر رەئىسى ئىلھام ئەلىيېۋ بىلەن كۆرۈشۈپ، ئىككى تەرەپلىك مۇناسىۋەتلەرنى مۇزاكىرە قىلىشى ھەمدە رايونلۇق ۋە دۇنياۋىي ئۆزگىرىشلەر ھەققىدە پىكىر ئالماشتۇرۇشى مۆلچەرلەنمەكتە.
بۇنىڭدىن باشقا، جۇمھۇر رەئىس ئەردوغاننىڭ پاكىستان باش مىنىستىرى شاھباز شەرىفمۇ قاتنىشىدىغان ئىككىنچى قېتىملىق تۈركىيە-ئەزەربەيجان-پاكىستان ئۈچ تەرەپلىك يۇقىرى دەرىجىلىكلەر يىغىنىغا قاتنىشىدىغانلىقى بىلدۈرۈلدى.
جۇمھۇر رەئىس ئەردوغان زىيارەت دائىرىسىدە لاچىن خەلقئارا ئايرودۇرۇمىنىڭ ئېچىلىش مۇراسىمىغا قاتنىشىدۇ ھەمدە ئەزەربەيجان مۇستەقىللىق كۈنى مۇناسىۋىتى بىلەن ئۆتكۈزۈلىدىغان مەدەنىيەت پائالىيەتلىرىگىمۇ قاتنىشىشى مۆلچەرلەنمەكتە.
جۇمھۇر رەئىس ئەردوغانغا بەزى مىنىستىرلار، جۇمھۇر رەئىسلىك مەھكىمىسىنىڭ يۇقىرى دەرىجىلىك مەسلىھەتچىلىرى ۋە ھاكىمىيەتتىكى پارتىيە ئەمەلدارلىرىنىمۇ ئۆز ئىچىگە ئالغان يۇقىرى دەرىجىلىك بىر ھەيئەت ھەمراھ بولماقتا.
