غەززەدىكى ئەمەلدارلارنىڭ بىلدۈرۈشىچە، ئۇرۇش توختىتىش دائىرىسىدە قايتۇرۇپ بېرىلگەن تۇتقۇنلارنىڭ جەسەتلىرىدە قىيناش ۋە ئۆلۈم جازاسى ئىزلىرى بايقالغان، بىراق چەكلىك ئەدلىيەلىك بىر تەرەپ قىلىش سەۋەبىدىن ئائىلىلەر يېقىنلىرىنى تونۇشتا قىينالماقتا.
چارشەنبە كۈنى يۈزلىگەن پەلەستىنلىك غەززەنىڭ مەركىزىدە، ئىسرائىلىيەنىڭ ئۇرۇش توختىتىش كېلىشىمى دائىرىسىدە قايتۇرۇپ بەرگەن 54 تۇتقۇننىڭ جىنازا نامىزىغا قاتنىشىش ئۈچۈن يىغىلدى. يەرلىك ئەمەلدارلار جەسەتلەردە قىيناش ۋە ئۆلۈم جازاسىنىڭ دەلىل-ئىسپاتلىرى بارلىقىنى ئىلگىرى سۈردى.
دەپنە مۇراسىمى دەير ئەل باللاھ شەھىرىدە ئۆتكۈزۈلگەن بولۇپ، قازا قىلغانلارغا ماتەم بىلدۈرگۈچىلەر پەلەستىن بايرىقىنى كۆتۈرۈپ دۇئا قىلدى. جەسەتلەرنىڭ كۆپىنچىسى كەپەنگە ئورالغان ھالدا دەپنە قىلىندى.
ئەمەلدارلار پەلەستىنلىك تۇتقۇنلارنىڭ كۆپىنچىسىنىڭ قاتتىق دەرىجىدە تونۇغۇسىز ھالغا كەلگەنلىكى سەۋەبىدىن كىملىكىنى دەرھال ئېنىقلىغىلى بولمىغانلىقىنى بىلدۈردى.
غەززەدىكى پەلەستىن ھۆكۈمىتى ئاخبارات ئىشخانىسىنىڭ مۇدىرى ئىسمائىل ئەل-تەۋابتا مۇخبىرلارغا قىلغان سۆزىدە، تېببىي خادىملارنىڭ قىيناش ئىزلىرىنى بايقىغانلىقىنى ئېيتتى. بۇ ئىزلار ئارىسىدا ئېسىپ قويۇش ئىزلىرى، ئارغامچا كۆيۈكى ۋە يېقىن ئارىلىقتىن ئېتىلغان ئوق يارىلىرى قاتارلىقلارمۇ بار ئىدى.
ئەل-تەۋابتا بەزى جەسەتلەردە باغلاش ئىزلىرى، كۆيۈك، سۇنۇق ۋە برونېۋىكلار بىلەن ئېزىش ئالامەتلىرى بارلىقىنى بىلدۈردى. ئەل-تەۋابتا: «بۇ قىلمىشلار نەق مەيداندا ئۆلۈم جازاسى ئىجرا قىلىنغانلىقىنىڭ ئېنىق ئىسپاتىدۇر»، دەپ خەلقئارا جىنايى ئىشلار سوتى (UCM) ۋە خەلقئارا جەمئىيەتنى بۇ مەسىلىنى تەكشۈرۈشكە چاقىردى.
ئائىلىلەر يېقىنلىرىنى تونۇشتا قىينالماقتا
يوقاپ كەتكەن بىر تۇغقىنىنى ئىزدەۋاتقان ھۇدا ھەمماد، ئائىلىلەرنىڭ يېقىنلىرىنى تونۇشتا قىينىلىۋاتقانلىقىنى ئېيتتى. ئۇ مۇنداق دېدى: «بىز ھەر كۈنى كېلىمىز، ئەمما ئۇلارنىڭ يۈزىنى تونۇيالمايمىز، ئۇلار ئۆزىگە خاس ئالاھىدىلىكلىرىنى يوقاتقان».
ھەمماد جەسەتلەرنىڭ كۆپىنچىسىنىڭ پارچىلانغان ياكى تونۇغۇسىز ھالەتتە ئىكەنلىكىنى ئېيتىپ، DNA تەكشۈرۈشىنىڭ زۆرۈرلىكىنى قوشۇمچە قىلدى.
داۋاملىشىۋاتقان ئىسرائىلىيە قورشاۋى ۋە ئۇل ئەسلىھەلەرنىڭ ۋەيران بولۇشى سەۋەبىدىن، غەززەدە DNA تەكشۈرۈشى ئېلىپ بارغىلى بولىدىغان ئەسلىھەلەر چەكلىك. بۇ ئەھۋالدا ئائىلىلەر كىملىكنى ئېنىقلاش ئۈچۈن كىيىم-كېچەك ياكى شەخسىي بۇيۇملارغا تايىنىدۇ.
غەززەدىكى پەلەستىن سەھىيە مىنىستىرلىقىنىڭ بىلدۈرۈشىچە، ئۇرۇش توختىتىش كېلىشىمى دائىرىسىدە 14-ئۆكتەبىردىن بۇيان خەلقئارا قىزىل كرىست كومىتېتى (ICRC) ئارقىلىق 165 جەسەت تاپشۇرۇۋېلىنغان.
ئۇرۇش توختىتىشنىڭ بىرىنچى باسقۇچى، ئىسرائىلىيەلىك گۆرۈگە ئېلىنغانلارنى پەلەستىنلىك تۇتقۇنلار بىلەن ئالماشتۇرۇش ھەمدە غەززەنى قايتا قۇرۇش ۋە يېڭى بىر مەمۇرىي قۇرۇلما بەرپا قىلىش ئۈچۈن بىر يول خەرىتىسى تەييارلاشنى ئۆز ئىچىگە ئالاتتى.
پەلەستىن سەھىيە ئەمەلدارلىرىنىڭ بىلدۈرۈشىچە، ئىسرائىلىيەنىڭ 2023-يىلى ئۆكتەبىردە غەززەگە قوزغىغان ئۇرۇشىدا 68 مىڭ 200 دىن ئارتۇق پەلەستىنلىك ئۆلتۈرۈلگەن ۋە 170 مىڭ 300 دىن ئارتۇق كىشى يارىلانغان.
