سەيشەنبە كۈنى تايلاند ۋە كامبودژانىڭ بەش ئۆلكىسىگە كېڭىيىپ، قايتا پارتلىغان توقۇنۇشلارغا ھەققىدە ھەر ئىككى تەرەپ بىر-بىرىنى «ۋەزىيەتنى قۇترىتىش» بىلەن ئەيىبلىمەكتە.
ھەر ئىككى دۆلەت ھۆكۈمىتى قايتا ئەۋج ئالغان چېگرا توقۇنۇشى سەۋەبىدىن تايلاند ۋە كامبودژادا بىخەتەر رايونلارغا قاچقانلارنىڭ سانىنىڭ 500 مىڭدىن ئاشقانلىقىنى بىلدۈردى. بۇ رەقەم، مۇشۇ يىلنىڭ بېشىدىكى ئوخشاش توقۇنۇشلاردا تارقاقلاشتۇرۇلغان ئومۇمىي ئادەم سانىدىنمۇ ئېشىپ كەتتى.
تايلاند دۆلەت مۇداپىئە مىنىستىرلىقى باياناتچىسى سۇراسانت كوڭسىرى مۇخبىرلارنى كۈتۈۋېلىش يىغىنىدا مۇنداق دېدى: «ۋەزىيەتنى بىخەتەرلىككە بىر تەھدىت دەپ باھالىغانلىقىمىز ئۈچۈن، كۆپ ساندا پۇقرالارنى يۆتكەشكە توغرا كەلدى. يەتتە ئۆلكىدە 400 مىڭدىن ئارتۇق كىشى بىخەتەر پاناھگاھلارغا ئورۇنلاشتۇرۇلدى. بىز 2025-يىلى ئىيۇلدا كۆرۈلگەن پۇقرالارغا ھۇجۇم قىلىش ۋەقەلىرىنىڭ قايتىلىنىشىنى خالىمايمىز».
كامبودژا دۆلەت مۇداپىئە مىنىستىرلىقى باياناتچىسى مالىي سوچېئاتا بولسا، سەيشەنبە ئاخشىمىغىچە «بەش ئۆلكىدە 101 مىڭ 229 كىشىنىڭ بىخەتەر پاناھگاھلارغا ۋە تۇغقانلىرىنىڭ ئۆيلىرىگە تارقاقلاشتۇرۇلغانلىقىنى» مۇخبىرلارغا مەلۇم قىلدى.
شەرقىي جەنۇبىي ئاسىيادىكى بۇ ئىككى قوشنا دۆلەت ئارىسىدا، مۇستەملىكە دەۋرىدە سىزىلغان 800 كىلومېتىرلىق (500 مىل) چېگرا لىنىيەسى بويىچە ئۇزۇندىن بۇيان ئىختىلاپ مەۋجۇت بولۇپ، تارىخىي ئىبادەتخانىلارنىڭ ئىگىلىك ھوقۇقىنى تالىشىش مەسىلىسى قوراللىق توقۇنۇشلارغا ئايلىنىپ كەتتى.
ئىيۇل ئېيىدا بەش كۈن داۋاملاشقان توقۇنۇشتا ئونلارچە ئادەم ئۆلگەن ۋە چېگرانىڭ ھەر ئىككى تەرىپىدە تەخمىنەن 300 مىڭ كىشى يۇرت - ماكانلىرىدىن ئايرىلغان ئىدى. بۇ ھەپتىدىكى توقۇنۇشلار بولسا، شۇ قېتىم ئامېرىكا قوشما ئىشتاتلىرى پىرېزىدېنتى دونالد ترامپنىڭ ئارىلىشىشى بىلەن ھاسىل قىلىنغان نازۇك ئۇرۇش توختىتىش كېلىشىمىدىن بۇيانقى ئەڭ قانلىق توقۇنۇش بولۇپ ھېسابلىنىدۇ.
