تۈركىيە تاشقى ئىشلار مىنىستىرلىقى باياناتچىسى: «يىغىندا غەززە تىنچلىق پىلانىنىڭ بىرىنچى باسقۇچىنى يولغا قويۇشقا مۇناسىۋەتلىك مەسىلىلەر باھالاندى ۋە ئىككىنچى باسقۇچقا ئۆتۈش مۇساپىسى توغرىسىدا پىكىر ئالماشتۇرۇلدى» دېگەن سۆزلەرنى ئىشلەتتى.
ئامېرىكا، تۈركىيە، مىسىر ۋە قاتار مىئامىدا غەززەدىكى ۋەزىيەتنى مۇزاكىرە قىلدى.
تۈركىيە جۇمھۇرىيىتى تاشقى ئىشلار مىنىستىرلىقى باياناتچىسى ئۆنجۈ كەچەلى ئامېرىكا مەركەزلىك ئىجتىمائىي تاراتقۇ شىركىتى X تە ئېلان قىلغان يازمىسىدا، تۈركىيەگە تاشقى ئىشلار مىنىستىرى خاقان فىداننىڭ ۋاكالەتچىلىك قىلغانلىقىنى بىلدۈردى.
ئۆنجۈ يىغىن ھەققىدە توختىلىپ: «يىغىندا غەززە تىنچلىق پىلانىنىڭ بىرىنچى باسقۇچىنى يولغا قويۇشقا مۇناسىۋەتلىك مەسىلىلەر باھالاندى ۋە ئىككىنچى باسقۇچقا ئۆتۈش مۇساپىسى توغرىسىدا پىكىر ئالماشتۇرۇلدى» دېدى.
سۆھبەتتە، بىرىنچى باسقۇچتا قولغا كەلتۈرۈلگەن ئوق چىقىرىشنى توختىتىش كېلىشىمىنىڭ خىلاپلىق قىلىشلارغا قارىماي داۋاملىشىۋاتقانلىقى بىلدۈرۈلدى، تۇتقۇنلارنى قويۇپ بېرىشنىڭ تاماملانغانلىقى ۋە توقۇنۇشلارنىڭ زور دەرىجىدە توختىتىلغانلىقى قەيت قىلىندى.
ئىككىنچى باسقۇچقا مۇناسىۋەتلىك بولسا، غەززەنىڭ غەززەلىكلەر تەرىپىدىن باشقۇرۇلۇشىنى تەمىنلەيدىغان تەرتىپلەر مۇزاكىرە قىلىندى. تىنچلىق پىلانىدا كۆزدە تۇتۇلغان تىنچلىق كېڭىشى بىلەن خەلقئارالىق مۇقىملىق كۈچىگە مۇناسىۋەتلىك تاشلىنىدىغان قەدەملەر باھالاندى»
تەخمىنەن ئىككى يىلدىن بېرى داۋاملىشىۋاتقان ئىسرائىلىيەنىڭ ئىرقىي قىرغىنچىلىق خاراكتېرلىك غەززە ئۇرۇشى يامان سۈپەتلىك ۋەيرانچىلىق، ئاممىۋى كۆچۈش ۋە چوڭقۇرلىشىۋاتقان ئىنسانپەرۋەرلىك كرىزىسى بىلەن خاراكتېرلەنمەكتە؛ خەلقئارالىق ۋاسىتىچىلىك تىرىشچانلىقلىرى باسقۇچلۇق ئوق چىقىرىشنى توختىتىش ۋە ئەسلىگە كەلتۈرۈش رامكىسىغا مەركەزلەشتى.
پىلاننىڭ بىرىنچى باسقۇچى ۋاقىتلىق ئوق چىقىرىشنى توختىتىش، چەكلىك مەھبۇس ۋە ئەسىر ئالماشتۇرۇش ھەمدە ئىنسانپەرۋەرلىك ياردەملەرنىڭ كىرىشىگە مەركەزلەشتى. ئەمما ۋاسىتىچىلەر ئىجرا قىلىشنىڭ تەرتىپسىز بولغانلىقىنى؛ بولۇپمۇ ياردەم بېرىش پۇرسىتى، ئەسكەر چېكىندۈرۈش ۋە ئوق چىقىرىشنى توختىتىشنى داۋاملاشتۇرۇش مەسىلىلىرىدە ئىسرائىلىيەنىڭ ۋەدىلىرىنى تولۇق ئورۇندىماسلىق بىلەن ئەيىبلىنىۋاتقانلىقىنى بايان قىلماقتا.
ئىككىنچى باسقۇچنىڭ بولسا، قىسقا مۇددەتلىك پەسكويغا چۈشۈشنىڭ سىرتىغا چىقىشى، تېخىمۇ دائىمىي بىر ئوق چىقىرىشنى توختىتىشقا، تېخىمۇ كەڭ كۆلەملىك ئالماشتۇرۇشقا ۋە قايتا قۇرۇش بىلەن سىياسىي مۇقىملىق ئۈچۈن دەسلەپكى قەدەملەرگە يۈزلىنىشى مەقسەت قىلىنىدۇ.
كەچەلى يەنە مەزكۇر يىغىن مۇناسىۋىتى بىلەن، خاقان فىداننىڭ رۇسىيە ۋە ئۇكرائىنا ئوتتۇرىسىدىكى ئۇرۇشنى توختىتىشقا قارىتا ئېلىپ بېرىلىۋاتقان ئۇچرىشىشلار دائىرىسىدە مىئامىدا تۇرۇۋاتقان ئەمەلدارلار بىلەن پىكىر ئالماشتۇرغانلىقىنى ئۇقتۇردى.
